'ಅಸ್ಮಿತಾ' ಮಹಿಳಾ ಸೈಕಲ್​ ಸಿಟಿ ಲೀಗ್​

ಉಡುಪಿ: ಉಡುಪಿಯ ಅಜ್ಜರಕಾಡುನಲ್ಲಿರುವ ಮಹಾತ್ಮಗಾಂಧಿ ಜಿಲ್ಲಾ ಕ್ರೀಡಾಂಗಣದಲ್ಲಿ ಭಾರತೀಯ ಸೈಕಲ್​ ಫೆಡರೇಷನ್​, ಜಿಲ್ಲಾ ಯುವಜನ ಹಾಗೂ ಕ್ರೀಡಾ ಇಲಾಖೆ, ಕರ್ನಾಟಕ ರಾಜ್ಯ ಅಮೆಚೂರ್​ ಸೈಕ್ಲಿಂಗ್​ ಅಸೋಸಿಯೇಷನ್​, ಉಡುಪಿ ಜಿಲ್ಲಾ ಅಮೆಚೂರ್​ ಸೈಕ್ಲಿಂಗ್​ ಅಸೋಸಿಯೇಷನ್​ ವತಿಯಿಂದ ಭಾನುವಾರ (ಜೂ.14) 'ಅಸ್ಮಿತಾ-2026- ಮಹಿಳಾ ಸೈಕಲ್​ ಸಿಟಿ ಲೀಗ್​' ಜಿಲ್ಲಾ ಮಟ್ಟದ ಸೈಕಲ್​ ರೇಸ್​-ಸ್ಪರ್ಧೆ ಆಯೋಜಿಸಲಾಗಿತ್ತು.

ಅಪರ ಜಿಲ್ಲಾಧಿಕಾರಿ ಅಬೀದ್​ ಗದ್ಯಾಳ, ಉಡುಪಿ ಜಿಲ್ಲಾ ಡಿಡಿಎಲ್​ ಆರ್​.ರವೀಂದ್ರ, ರಾಷ್ಟ್ರಮಟ್ಟದ ಟೇಬಲ್​ ಟೆನಿಸ್​ ಕ್ರೀಡಾಪಟು ಪೂರ್ಣಿಮಾ ಭೋಜರಾಜ್​, ರಾಷ್ಟ್ರಮಟ್ಟದ ಸೈಕ್ಲಿಸ್ಟ್​ ಗ್ಲಿಯೊನೋ ಡಿಸೋಜಾ, ರಾಜ್ಯ ಮಟ್ಟದ ಸೈಕ್ಲಿಸ್ಟ್​ ಶುಭಾ, ದಂತ ವೈದ್ಯರ ಸಂಘದ ಮಹಿಳಾ ಘಟಕದ ಅಧ್ಯಕ್ಷೆ ಡಾ. ವಿಭಾ ಶೆಟ್ಟಿ, ಖ್ಯಾತ ಮೂಳೆ ತಜ್ಞ ಡಾ. ಹರೀಶ್​ ನಾಯಕ್​, ಡಾ. ರಾಜೇಶ್​ ಭಕ್ತ ಸೈಕಲ್​ ರೇಸ್​ಗೆ ಚಾಲನೆ ನೀಡಿದರು.

13ರಿಂದ 16 ವರ್ಷ, 17ರಿಂದ 18 ವರ್ಷ ಹಾಗೂ 19 ವರ್ಷಕ್ಕಿಂತ ಮೇಲ್ಪಟ್ಟು ಒಟ್ಟು ಮೂರು ವಿಭಾಗದಲ್ಲಿ ಸ್ಪರ್ಧೆ ನಡೆಯಿತು. ಜಿಲ್ಲಾ ಪೊಲೀಸ್​ ಇಲಾಖೆಯ ಸಹಕಾರದಲ್ಲಿ ಹಾಗೂ ಮಳೆಯ ನಡುವೆಯೂ ಸ್ಪರ್ಧೆ ಯಶಸ್ವಿಯಾಗಿ ಸಂಪನ್ನಗೊಂಡಿತು. ವಿಜೇತರಿಗೆ ಪದಕ, ಪ್ರಶಸ್ತಿ ಪತ್ರ ನೀಡಲಾಯಿತು.

ಉಡುಪಿ ಜಿಲ್ಲಾ ಅಮೆಚೂರ್​ ಸೈಕಲ್ಲಿಂಗ್​ ಅಸೋಸಿಯೇಷನ್​ನ ಅಧ್ಯಕ್ಷ ಡಾ. ಗುರುರಾಜ್​ ಸ್ವಾಗತಿಸಿ, ಪ್ರಾಸ್ತಾವಿಕವಾಗಿ ಮಾತನಾಡಿದರು. ಮಹೇಶ್​ ನಾಯಕ್​ ಕಾರ್ಯಕ್ರಮ ನಿರೂಪಿಸಿದರು. ಕಾರ್ಯದರ್ಶಿ ರವಿಚಂದ್ರ ಉಡುಪ ವಂದಿಸಿದರು.