ಚಾರ್ಮಾಡಿ ತಿರುವುಗಳಲ್ಲಿ ಕಾನ್ವೆಕ್ಸ್ ಮಿರರ್

ಚಾರ್ಮಾಡಿ ಘಾಟಿ ರಸ್ತೆಯ 12 ಕಡೆಗಳಲ್ಲಿ ಉಜಿರೆಯ ಎಸ್‌ಡಿಎಂ ಮಲ್ಟಿ ಸ್ಪೆಷಾಲಿಟಿ ಆಸ್ಪತ್ರೆ ವತಿಯಿಂದ ಕಾನ್ವೆಕ್ಸ್ ಮಿರರ್ (ಉಬ್ಬು ಕನ್ನಡಿ)ಗಳನ್ನು ಅಳವಡಿಸಲಾಗಿದೆ. ತಿರುವಗಳಿಂದ ಕೂಡಿದ ಚಾರ್ಮಾಡಿ ಘಾಟಿ ರಸ್ತೆಯ ಹಲವು ಸ್ಥಳಗಳು ಅಪಾಯಕಾರಿ ಹಾಗೂ ಅತ್ಯಂತ ಸೂಕ್ಷ್ಮವಾಗಿದ್ದು ಇಲ್ಲಿ ವಾಹನಗಳನ್ನು ಚಲಾಯಿಸುವುದು ಸಾಹಸದ ಕೆಲಸವಾಗಿದೆ. ಹೊಸದಾಗಿ ಬರುವ ಚಾಲಕರಿಗೆ ಚಾರ್ಮಾಡಿ ಘಾಟಿ ರಸ್ತೆ ನಾನಾ ಸವಾಲು ನೀಡುತ್ತದೆ.

ಘಾಟಿ ಪ್ರದೇಶದಲ್ಲಿ 12 ವಿಶೇಷ ತಿರುವುಗಳಿದ್ದು, ಇಲ್ಲಿ ವಾಹನ ಹತ್ತುವಾಗ ಹಾಗೂ ಇಳಿಯುವ ಸಮಯ ಮುಂಭಾಗದಿಂದ ಬರುವ ವಾಹನಗಳು ಪರಸ್ಪರ ಹತ್ತಿರ ಬರುವವರೆಗೂ ಗಮನಕ್ಕೆ ಬರದೆ ಹಲವಾರು ಅಪಘಾತಗಳು ನಡೆಯುತ್ತವೆ. ತಿರುವು ಪ್ರದೇಶಗಳು ಕಿರಿದಾಗಿದ್ದು, ಹೇರ್‌ಪಿನ್ ಕರ್ವ್‌ಗಳಾಗಿರುವ ಕಾರಣ ರಸ್ತೆ ಎಡಬದಿಯಲ್ಲಿ ವಾಹನ ಚಲಾಯಿಸಿಕೊಂಡು ಹೋದರು ಕೆಲವು ಸ್ಥಳಗಳಲ್ಲಿ ವಾಹನ ಬಲಬದಿಗೆ ಚಲಾಯಿಸಿದರೆ ಮಾತ್ರ ತಿರುವು ಪಡೆದುಕೊಳ್ಳಲು ಸಾಧ್ಯವಾಗುವ ಸ್ಥಿತಿ ಇದೆ. ಮುಂಭಾಗದಿಂದ ಬರುವ ವಾಹನಗಳು ಇಂಥ ಸಂದರ್ಭದಲ್ಲಿ ಗೋಚರಕ್ಕೆ ಬರುವುದಿಲ್ಲ. ಲಾರಿ, ಬಸ್‌ನಂಥ ಭಾರಿ ವಾಹನಗಳು ಮುಂಭಾಗದಿಂದ ಬಂದಾಗ ಅಪಾಯ ಕಟ್ಟಿಟ್ಟ ಬುತ್ತಿ.

ಉಜಿರೆ ಎಸ್‌ಡಿಎಂ ಆಸ್ಪತ್ರೆ ಈ ತಿರುವುಗಳಲ್ಲಿ ಉಂಟಾಗುವ ಅಪಾಯಗಳ ಕುರಿತು ಪರಿಶೀಲನೆ ನಡೆಸಿ ಅಂಥ 12 ಸ್ಥಳಗಳಲ್ಲಿ ರಾಷ್ಟ್ರೀಯ ಹೆದ್ದಾರಿ ಇಲಾಖೆಯ ಒಪ್ಪಿಗೆ ಪಡೆದು ಕಾನ್ವೆಕ್ಸ್ ಮಿರರ್ ಅಳವಡಿಸಿದೆ. ಈ ಕನ್ನಡಿಗಳು ಹಲವು ಮೀಟರ್ ದೂರದಿಂದ ಬರುವ ವಾಹನಗಳನ್ನು ಚಾಲಕರು ಗುರುತಿಸಲು ಸಹಕಾರಿಯಾಗಿದ್ದು, ಮುಂಜಾಗ್ರತೆ ಕೈಗೊಳ್ಳಲು ಸಹಾಯಕವಾಗಿವೆ. ಪ್ರಸ್ತುತ ಘಾಟಿ ಭಾಗದಿಂದ ಸಂಚರಿಸುವ ವಾಹನ ಚಾಲಕರು ತಿರುವು ಪ್ರದೇಶಗಳಲ್ಲಿ ಈ ಕನ್ನಡಿಗಳನ್ನು ಗಮನಿಸುತ್ತಾ ವಾಹನಗಳನ್ನು ಚಲಾಯಿಸುತ್ತಾರೆ. ಇದು ಅಪಘಾತಗಳಿಗೆ ಕಡಿವಾಣ ಹಾಕಲು, ಟ್ರಾಫಿಕ್ ಜಾಮ್ ಉಂಟಾಗದಂತೆ, ತಿರುವುಗಳಲ್ಲಿ ವನ್ಯಜೀವಿಗಳ ಸಂಚಾರ ಇದ್ದರೆ ಅದನ್ನು ಗಮನಿಸಲು ಅನುಕೂಲ ನೀಡುತ್ತದೆ.

ಕಾನ್ವೆಕ್ಸ್ ಮಿರರ್ ವಾಹನ ಸವಾರರಿಗೆ ದೂರದಿಂದ ರಸ್ತೆ ಗಮನಿಸಲು ಅನುಕೂಲ ನೀಡುತ್ತದೆ. ತಿರುವಿನಲ್ಲಿ ಬರುವ ವಾಹನಗಳು ಚಾಲಕನಿಗೆ ನೇರವಾಗಿ ಕಾಣಿಸುವುದಿಲ್ಲ. ಈ ಕನ್ನಡಿಗಳು ಅಂತಹ ಸೂಕ್ಷ್ಮ ಸ್ಥಳಗಳ ಪ್ರತಿಬಿಂಬ ದೂರದಿಂದ ತೋರಿಸುತ್ತವೆ. ಈ ಕನ್ನಡಿಗಳು ಬಾಗಿದ ಮೇಲ್ಮೈ ಹೊಂದಿದ್ದು, ವಿಶಾಲವಾದ ಕೋನಗಳಲ್ಲಿ ಮುಂಭಾಗದ ದೃಶ್ಯ ಪ್ರತಿಬಿಂಬಿಸುತ್ತವೆ. ರಸ್ತೆ ಸುರಕ್ಷತಾ ದೃಷ್ಟಿಯಿಂದ ಅವುಗಳನ್ನು ಇಕ್ಕಟ್ಟಾದ ಬೆಟ್ಟ ಪ್ರದೇಶದ ರಸ್ತೆ ಹಾಗೂ ತಿರುವುಗಳಿಂದ ಕೂಡಿದ ರಸ್ತೆಯಲ್ಲಿ ಅಳವಡಿಸಲಾಗುತ್ತದೆ.

ಧರ್ಮಸ್ಥಳದ ಧರ್ಮಾಧಿಕಾರಿ ಡಾ.ಡಿ.ವೀರೇಂದ್ರ ಹೆಗ್ಗಡೆ ದಂಪತಿ ಹಾಗೂ ಹರ್ಷೇಂದ್ರ ಕುಮಾರ್ ಸೂಚನೆಯತೆ ಚಾರ್ಮಾಡಿ ಘಾಟಿ ರಸ್ತೆಯ ಅಪಾಯಕಾರಿ ತಿರುವುಗಳಲ್ಲಿ ಇಲಾಖೆಯ ಅನುಮತಿ ಪಡೆದು ಆಸ್ಪತ್ರೆ ವತಿಯಿಂದ ಅಳವಡಿಸಲಾಗಿದೆ. ಇಲ್ಲಿನ ಸೂಕ್ಷ್ಮ ಸ್ಥಳಗಳನ್ನು ಗುರುತಿಸಿ ಈ ಕೆಲಸ ನಿರ್ವಹಿಸಲು ಇಲಾಖೆಯೊಂದಿಗೆ ನಮ್ಮ ಸಿಬ್ಬಂದಿ ಕೈಜೋಡಿಸಿದ್ದಾರೆ.

— ಜನಾರ್ದನ್, ಎಂ.ಡಿ. ಎಸ್‌ಡಿಎಂ ಮಲ್ಟಿ ಸ್ಪೆಷಾಲಿಟಿ ಆಸ್ಪತ್ರೆ ಉಜಿರೆ