ಕೈಕೊಟ್ಟ 'ಕಮರ್ಷಿಯಲ್' ಗ್ಯಾಸ್

ಉಡುಪಿಯ ಕಲ್ಸಂಕದಲ್ಲಿರುವ ದುರ್ಗಾ ಪ್ರಸಾದ್ ಹೋಟೆಲ್ನಲ್ಲಿ ಕಟ್ಟಿಗೆ ಒಲೆಯ ಮೂಲಕ ಅನ್ನ ಬೇಯಿಸುತ್ತಿರುವ ಬಾಣಸಿಗ.

Published on:

16 Mar 2026, 12:50 pm

* ಹೋಟೆಲ್ಗಳಿಗೆ ಕಟ್ಟಿಗೆ ಒಲೆಯೇ ಆಧಾರ

* ಗ್ರಾಹಕರಿಗೆ ಲಭಿಸುತ್ತಿದೆ ಹೆಚ್ಚಿನ ಆಹಾರ

ಪ್ರಶಾಂತ ಭಾಗ್ವತ ಉಡುಪಿ

ಸೋಮವಾರ (ಮಾ.16) ವಾದರೂ ಕಮರ್ಷಿಯಲ್ ಗ್ಯಾಸ್ ಲಭಿಸಬಹುದೆಂಬ ನಿರೀಕ್ಷೆಯಲ್ಲಿದ್ದ ಹೋಟೆಲ್, ರೆಸ್ಟೋರೆಂಟ್ ಮಾಲೀಕರಿಗೆ ಮತ್ತೆ ನಿರಾಸೆ ಉಂಟಾಗಿದೆ. ಗ್ಯಾಸ್ ಸಿಲಿಂಡರ್ ಲಭಿಸದ್ದರಿಂದ ಕಟ್ಟಿಗೆ ಒಲೆಯೇ ಆಧಾರ ಎಂಬಂತಾಗಿದೆ.

ಅಡುಗೆ ಅನಿಲ ಲಭಿಸಿದ ಬಳಿಕವೇ ಹೋಟೆಲ್ನವರು ಹೆಚ್ಚಿನ ಪ್ರಮಾಣದಲ್ಲಿ ಹಾಗೂ ವಿವಿಧ ಬಗೆಯ ಆಹಾರೋತ್ಪನ್ನ ಸಿದ್ಧಪಡಿಸಿ ಗ್ರಾಹಕರಿಗೆ ನೀಡುವ ತವಕದಲ್ಲಿದ್ದರು. ಆದರೆ, ಗ್ಯಾಸ್ ಲಭಿಸದ್ದರಿಂದ ಕಟ್ಟಿಗೆ ಒಲೆಯಲ್ಲೇ ಇನ್ನೆರಡು ಹೆಚ್ಚಿನ ಬಗೆಯ ಆಹಾರ ಸಿದ್ಧಪಡಿಸಿದ್ದರು.

ಗ್ರಾಹಕರಿಗೆ ಲಭಿಸುತ್ತಿದೆ ಆಹಾರ

ಕಳೆದ ಒಂದು ವಾರದಿಂದ ಯಾವುದೇ ಹೋಟೆಲ್ಗಳಲ್ಲಿ ಗ್ರಾಹಕರಿಗೆ ಬೇಕಾಗಿದ್ದ ತಿಂಡಿ-ತಿನಿಸು, ಬಗೆಬಗೆಯ ಊಟ ಲಭಿಸುತ್ತಿರಲಿಲ್ಲ. ಬೆಳಗ್ಗೆ ತಿಂಡಿಗೆ ಇಡ್ಲಿ-ಸಾಂಬಾರ್ ಅಥವಾ ಉಪ್ಪಿಟ್ಟು, ಮಧ್ಯಾಹ್ನ ಹಾಗೂ ರಾತ್ರಿಯ ಊಟಕ್ಕೆ ಅನ್ನ-ರಸಂ ಮಾತ್ರ ಲಭಿಸುತ್ತಿತ್ತು. ಅನೇಕ ಹೋಟೆಲ್ನವರು ಮಧ್ಯಾಹ್ನ ಮತ್ತು ರಾತ್ರಿಯ ಊಟವನ್ನೇ ಬಂದ್ ಮಾಡಿದ್ದರು. ಇದೀಗ ಕಟ್ಟಿಗೆ ಒಲೆಯ ಮೂಲಕವೇ ಆಹಾರ ಸಿದ್ಧಪಡಿಸಲಾಗುತ್ತಿದ್ದು, ಇನ್ನೆರಡು ಒಲೆಗಳ ಮೂಲಕ ಹೆಚ್ಚಿನ ಆಹಾರ ಸಿದ್ಧಪಡಿಸುತ್ತಿದ್ದಾರೆ. ಗ್ರಾಹಕರಿಗೆ ಬಹುತೇಕ ಎಲ್ಲ ಬಗೆಯ ತಿಂಡಿ&ತಿನಿಸು, ಊಟ ನೀಡಲು ಹೋಟೆಲ್ನವರು ಅಣಿಯಾಗಿದ್ದಾರೆ.

ಇನ್ನೂ ನಾಲ್ಕೈದು ದಿನ ಸಿಗಲ್ಲ ಅನಿಲ

ನಾಲ್ಕು ದಿನದ ಹಿಂದೆ ಹಮುರ್ಜ್ ಜಲಸಂಧಿಯಿಂದ ಭಾರತಕ್ಕೆ ತೈಲ ಟ್ಯಾಂಕರ್ಗಳು ಬರುತ್ತಿದ್ದು ಸೋಮವಾರ (ಮಾ.16) ಕನಿಷ್ಠ ಪ್ರಮಾಣದಲ್ಲಾದರೂ ಕಮರ್ಷಿಯಲ್ ಗ್ಯಾಸ್ ಲಭಿಸಬಹುದು ಎಂದು ಹೇಳಲಾಗುತ್ತಿತ್ತು. ಆದರೆ, ಸದ್ಯದ ಪರಿಸ್ಥಿತಿಯಲ್ಲಿ ಇನ್ನೂ ನಾಲ್ಕೈದು ದಿನ ವಾಣಿಜ್ಯ ಬಳಕೆಯ ಗ್ಯಾಸ್ ಸಿಲಿಂಡರ್ ಲಭಿಸುವುದು ಅಸಾಧ್ಯ ಎಂದು ಬಲ್ಲ ಮೂಲಗಳಿಂದ ತಿಳಿದುಬಂದಿದೆ. ಹಾಸ್ಟೆಲ್, ಆಸ್ಪತ್ರೆ ಹಾಗೂ ವಸತಿ ಶಾಲೆಗಳಿಗೆ ರೇಶನಿಂಗ್ ಮೂಲಕ ಕಮರ್ಷಿಯಲ್ ಗ್ಯಾಸ್ ಪೂರೈಕೆ ಮಾಡಲಾಗುತ್ತಿದೆ. ಮಂಗಳೂರಿನ ಎಚ್ಪಿಸಿಎಲ್ನಲ್ಲಿ ಇನ್ನೂ ಕಮರ್ಷಿಯಲ್ ಗ್ಯಾಸ್ಗಳ ಬಿಲ್ಲಿಂಗ್ ಆರಂಭಗೊಂಡಿಲ್ಲ. ಹೀಗಾಗಿ ಅಗತ್ಯಕ್ಕೆ ತಕ್ಕಷ್ಟು ಗ್ಯಾಸ್ ಪೂರೈಕೆ ಇನ್ನೂ ನಾಲ್ಕೈದು ಸಾಧ್ಯವಿಲ್ಲ ಎನಿಸುತ್ತಿದೆ ಎನ್ನುತ್ತಾರೆ ಉಡುಪಿಯ ಎಚ್ಪಿ ಗ್ಯಾಸ್ನ ಪಾಲುದಾರ ರಾಘವೇಂದ್ರ ಗ್ಯಾಸ್ ಏಜೆನ್ಸಿಯ ಮಾಲೀಕ ಬಾಲಾಜಿ ವಿಷ್ಣು ಆಚಾರ್ಯ.

ಕಮರ್ಷಿಯಲ್ ಸಿಲಿಂಡರ್ ಇಲ್ಲದೆ ಹೋಟೆಲ್ ಉದ್ಯಮ ಹಿನ್ನಡೆ ಅನುಭವಿಸುತ್ತಿದೆ. ಶೇ.60ರಷ್ಟು ಸಣ್ಣ-ಮಧ್ಯಮ ಹೋಟೆಲ್ಗಳು ಬಂದ್ ಆಗಿವೆ. ವಾರದೊಳಗೆ ಭಾರತಕ್ಕೆ ತೈಲ ಸ್ಟೀಮರ್ ಬರಲಿದೆ ಎಂದು ಹೋಟೆಲ್ ಮಾಲೀಕರ ರಾಜ್ಯ ಸಂಘಟನೆಗೆ ಸರ್ಕಾರ ಮಾಹಿತಿ ನೀಡಿದೆ. ಬೇರೆ ಸ್ಥಳಾವಕಾಶ ಇರುವ ಕೆಲವು ಹೋಟೆಲ್ಗಳು ಅತ್ಯಂತ ಪ್ರಯಾಸದಿಂದ ಕಟ್ಟಿಗೆ ಒಲೆ ಮೂಲಕ ಆಹಾರೋತ್ಪನ್ನ ತಯಾರಿಸುತ್ತಿವೆ. ವಾಣಿಜ್ಯ ಅಡುಗೆ ಅನಿಲದ ಸಮಸ್ಯೆ ಸದ್ಯ ದೇಶವ್ಯಾಪಿ ಇರುವುದರಿಂದ ಪರಿಹಾರ ಸಿಗುವವವರೆಗೆ ಇದೇ ಪರಿಸ್ಥಿತಿ ಎದುರಿಸುವುದು ಅನಿವಾರ್ಯ ಆಗಿದೆ.

Problem