ಉಡುಪಿ: ಜನರು ಹಾಗೂ ಜನಪ್ರತಿನಿಧಿಗಳೊಂದಿಗೆ ನೇರ ಸಂಪರ್ಕ ಹೊಂದಿರುವ ಗ್ರಾಮೀಣಾಭಿವೃದ್ಧಿ ಇಲಾಖೆಯ ನೌಕರರು ನಿತ್ಯವೂ ಕೆಲಸದ ಒತ್ತಡದಲ್ಲಿರುತ್ತಾರೆ. ಉಡುಪಿ ಜಿಲ್ಲೆಯ ನೌಕರರು ಪ್ರತಿಭಾನ್ವಿತರಾಗಿದ್ದು, ಅವರಲ್ಲಿ ಸೂಕ್ಷ್ಮತೆ, ತಿಳಿವಳಿಕೆಯಿದೆ. ಶಿಸ್ತುಬದ್ಧವಾದ ಇಂತಹ ಕ್ರೀಡೆ ಹಾಗೂ ಸಾಂಸ್ಕೃತಿಕ ಉತ್ಸವಗಳಿಂದ ಒತ್ತಡದ ಬದುಕಿನಿಂದ ಹೊರಬರಲು ಸಾಧ್ಯವಿದೆ. ಅಲ್ಲದೆ, ನಿತ್ಯದ ಕಾರ್ಯಕ್ಷಮತೆಯಲ್ಲೂ ಹೆಚ್ಚಳ ಕಾಣಬಹುದಾಗಿದೆ ಎಂದು ಜಿಪಂ ಸಿಇಒ ಪ್ರತೀಕ್​ ಬಾಯಲ್​ ಅನಿಸಿಕೆ ವ್ಯಕ್ತಪಡಿಸಿದರು.

ಉಡುಪಿಯ ಜಿಪಂನ ಅಟಲ್​ ಬಿಹಾರಿ ವಾಜಪೇಯಿ ಸಭಾಂಗಣದಲ್ಲಿ ಜಿಪಂ, ಯುವಜನ ಸೇವಾ ಮತ್ತು ಕ್ರೀಡಾ ಇಲಾಖೆ, ಕರ್ನಾಟಕ ರಾಜ್ಯ ಪಂಚಾಯತ್​ ಅಭಿವೃದ್ಧಿ ಅಧಿಕಾರಿಗಳ ಕ್ಷೇಮಾಭಿವೃದ್ಧಿ ಸಂಘ (ರಿ.) ಉಡುಪಿ, ಕಾರ್ಯದರ್ಶಿಗಳು ಹಾಗೂ ದ್ವಿತೀಯ ದರ್ಜೆ ಲೆಕ್ಕ ಸಹಾಯಕರು ಮತ್ತು ಗ್ರಾಪಂ ನೌಕರರ ಕ್ಷೇಮಾಭಿವೃದ್ಧಿ ಸಂಘ ಉಡುಪಿ ಇವರ ಸಹಭಾಗಿತ್ವದಲ್ಲಿ ನಡೆದ ಗ್ರಾಮೀಣಾಭಿವೃದ್ಧಿ ಮತ್ತು ಪಂಚಾಯತ್​ ರಾಜ್​ ಇಲಾಖೆಯ ಅಧಿಕಾರಿಗಳು ಮತ್ತು ನೌಕರರ ಕ್ರೀಡಾಕೂಟ ಹಾಗೂ ಸಾಂಸ್ಕೃತಿಕ ಉತ್ಸವದ ಸಮಾರೋಪದಲ್ಲಿ ಮಾತನಾಡಿದರು.

ಪುರುಷ ಹಾಗೂ ಮಹಿಳೆಯರಿಗೆ ಪ್ರತ್ಯೇಕ ವಿಭಾಗದಲ್ಲಿ ಕ್ರಿಕೆಟ್​, ಥ್ರೋಬಾಲ್​, ಶೆಟಲ್​ ಬ್ಯಾಡ್ಮಿಂಟನ್​, ಹಗ್ಗ ಜಗ್ಗಾಟ, ವೇಗದ ನಡಿಗೆ, ಗೋಣಿಚೀಲ, ಗುಂಡುಎಸೆತ, ಮ್ಯೂಸಿಕಲ್​ ಚೇರ್​, 100 ಹಾಗೂ 200 ಮೀಟರ್​ ಓಟ ಸೇರಿದಂತೆ ವಿವಿಧ ಸ್ಪರ್ಧೆ ನಡೆಯಿತು. ಸಾಂಸತಿಕ ಸ್ಪರ್ಧಾ  ವಿಭಾಗದಲ್ಲಿ ಜಾನಪದ ನೃತ್ಯ, ಫಿಲ್ಮಿಡ್ಯಾನ್ಸ್​, ಕಿರುಪ್ರಹಸನ ಹಾಗೂ ವಿವಿಧ ಮನರಂಜನಾ ಕಾರ್ಯಕ್ರಮ ಜರುಗಿತು.

ಜಿಪಂ ಸಿಇಒ ಪ್ರತೀಕ್​ ಬಾಯಲ್​, ಜಿಲ್ಲಾ ಕ್ರೀಡಾ ಮತ್ತು ಯುವಜನಸೇವಾ ಇಲಾಖೆಯ ಸಹಾಯಕ ನಿರ್ದೇಶಕ ರೋಶನ್​ ಶೆಟ್ಟಿ, ಜಿಲ್ಲಾ ಯೋಜನಾಧಿಕಾರಿ ಡಾ.ಉದಯ್​ ಶೆಟ್ಟಿ, ಸರ್ಕಾರಿ ನೌಕರರ ಸಂಘದ ಜಿಲ್ಲಾಧ್ಯಕ್ಷ ಅಂಪಾರು ದಿನಕರ್​ ಶೆಟ್ಟಿ, ತಾಲೂಕಿನ ಎಲ್ಲ ಇಒಗಳನ್ನು ಸನ್ಮಾನಿಸಲಾಯಿತು.

ಜಿಪಂ ಲೆಕ್ಕಾಧಿಕಾರಿ ಸುಂದರ್​ ನಾಯ್ಕ, ತಾಲೂಕು ಇಒಗಳಾದ ಎಚ್​.ವಿ. ಇಬ್ರಾಹಿಂಪುರ, ಪ್ರಶಾಂತ್​ ರಾವ್​, ವಿಜಯಾ, ಜೇಮ್ಸ್​ ಡಿಸಿಲ್ವಾ, ಮಹೇಶ್​ ಕೆ.ಜಿ., ರಾಮದಾಸ್​ ಉಪಸ್ಥಿತರಿದ್ದರು.

ಪಿಡಿಒ ಗುರುಮೂರ್ತಿ ಸ್ವಾಗತಿಸಿದರು. ಆರ್​ಡಿಪಿಆರ್​ ಕುಟುಂಬದ ಜಿಲ್ಲಾಧ್ಯಕ್ಷ, ಪಿಡಿಒ ಮಂಜುನಾಥ್​ ಶೆಟ್ಟಿ ಪ್ರಾಸ್ತಾವಿಕವಾಗಿ ಮಾತನಾಡಿದರು. ಪಿಡಿಒ ಮಹೇಶ್​ ಕೆ., ಸತೀಶ್​ ವಡ್ಡರ್ಸೆ ಹಾಗೂ ಫರ್ಜಾನ ನಿರೂಪಿಸಿದರು. ಅಂಕಿತಾ, ಸುನೀಲ್​, ಅನಿಲ್​ ಶೆಟ್ಟಿ, ದಯಾನಂದ ಬೆನ್ನೂರ್​, ಸಿದ್ದೇಶ್​ ಸಹಕರಿಸಿದರು.