ಚಾರ್ಮಾಡಿ ಹೆದ್ದಾರಿ ಕಾಮಗಾರಿ ಬಿರುಸು

1957ರಲ್ಲಿ ನಿರ್ಮಾಣವಾದ ಬೆಳ್ತಂಗಡಿ ಸೇತುವೆ ತೆರವು ಕಾರ್ಯ ಪ್ರಗತಿಯಲ್ಲಿದ್ದು ಮುಂದಿನ ಒಂದೆರಡು ದಿನಗಳಲ್ಲಿ ಪೂರ್ಣಗೊಳ್ಳಲಿದೆ. ಈಗಾಗಲೇ ಇಲ್ಲಿ ಹೊಸ ಸೇತುವೆ ನಿರ್ಮಾಣವಾಗಿದ್ದು ವಾಹನಗಳು ಸಂಚರಿಸುತ್ತಿವೆ. ಹಳೇ ಸೇತುವೆ ಇರುವ ಪ್ರದೇಶದಲ್ಲಿ ಇನ್ನೊಂದು ಹೊಸ ಸೇತುವೆ ನಿರ್ಮಾಣವಾಗಬೇಕಿದ್ದು, ಅದಕ್ಕಾಗಿ ಸೇತುವೆ ತೆರವುಗೊಳಿಸಲಾಗುತ್ತಿದೆ. ಸರ್ವೀಸ್ ರಸ್ತೆ ನಿರ್ಮಾಣವಾಗ ಬೇಕಿದ್ದು, ಈಗಾಗಲೇ ಮುಖ್ಯ ಸೇತುವೆ ಹಾಗೂ ಒಂದು ಬದಿಯ ಸರ್ವೀಸ್ ರಸ್ತೆಯ ಸೇತುವೆ ಕಾಮಗಾರಿ ಪೂರ್ಣಗೊಂಡಿದ್ದು, ಇನ್ನೊಂದು ಬದಿಗೆ ಸೇತುವೆ ನಿರ್ಮಾಣಗೊಳ್ಳಲಿದೆ. ಟೆಂಡರ್ ಅವಧಿ ಪ್ರಕಾರ ಹೆದ್ದಾರಿ ಕಾಮಗಾರಿ 2026 ಡಿಸೆಂಬರ್ ಅಂತ್ಯಕ್ಕೆ ಮುಗಿಯಬೇಕಿದೆ. ಆದರೆ ಜೂನ್ ತಿಂಗಳಿನಿಂದ ಮಳೆಗಾಲ ಆರಂಭವಾಗುವ ಕಾರಣದಿಂದ ಇನ್ನೊಂದು ಹೊಸ ಸೇತುವೆ ನಿರ್ಮಾಣಗೊಳ್ಳುವುದು ಬಹುತೇಕ ಅನುಮಾನ.

ಹೆದ್ದಾರಿ ಕಾಮಗಾರಿ ಅಂಗವಾಗಿ ಮುಂಡಾಜೆಯಲ್ಲಿ ಮೃತ್ಯುಂಜಯ ನದಿಗೆ ಹೊಸ ಸೇತುವೆ ನಿರ್ಮಾಣವಾಗುತ್ತಿದ್ದು ಕಾಮಗಾರಿ ಬಹುತೇಕ ಕೊನೇ ಹಂತದಲ್ಲಿದೆ. ಬ್ರಿಟಿಷರ ಕಾಲದಲ್ಲಿ ಇಲ್ಲಿ ಕಬ್ಬಿಣದ ತೊಲೆಗಳಿಂದ ನಿರ್ಮಿಸಲಾಗಿದ್ದ ಹಳೇ ಸೇತುವೆ ತೆರವುಗೊಳಿಸಿ ಹೊಸ ಸೇತುವೆ ಕಟ್ಟಲಾಗುತ್ತಿದೆ. ಇಲ್ಲೂ ಕೂಡ ಎತ್ತರದ ಪ್ರದೇಶದಲ್ಲಿ ಸೇತುವೆ ನಿರ್ಮಾಣಗೊಳ್ಳುತ್ತಿದೆ.

30 ವಷರ್ಗಳ ಹಿಂದೆ ಮುಂಡಾಜೆಯಲ್ಲಿ ಮೃತ್ಯುಂಜಯ ನದಿಗೆ ಸೇತುವೆ ನಿರ್ಮಾಣವಾಗಿದ್ದು, ಪ್ರಸ್ತುತ ಅದರಲ್ಲಿ ವಾಹನಗಳು ಸಂಚರಿಸುತ್ತಿವೆ. ಈ ಸೇತುವೆ ಸಾಮಾನ್ಯ ಸ್ಥಿತಿಯಲ್ಲಿದ್ದು ಸಂಚಾರಕ್ಕೆ ಯೋಗ್ಯವಾಗಿದೆ. ಸೇತುವೆಯಲ್ಲಿ ಸಂಚಾರ ಆರಂಭವಾದ ಬಳಿಕ ಬ್ರಿಟಿಷರ ಕಾಲದಲ್ಲಿ ನಿರ್ಮಾಣವಾದ ಸೇತುವೆ ನಿರುಪಯುಕ್ತವಾಗಿತ್ತು. 2024ರಲ್ಲಿ ಸೇತುವೆ ತೆರವುಗೊಳಿಸಿ, ಈಗಿನ ಹೊಸ ಸೇತುವೆ ಕಾಮಗಾರಿ ಆರಂಭಿಸಲಾಗಿತ್ತು. ಪ್ರಸ್ತುತ ವಾಹನಗಳು ಸಂಚರಿಸುತ್ತಿರುವ ಸೇತುವೆ ಹಾಗೇ ಇರಲಿದ್ದು, ಇದು ಸ್ಥಳೀಯರಿಗೆ ಸಂಚರಿಸಲು ಅನುಕೂಲವಾಗಲಿದೆ. ಇದರ ಪಕ್ಕದಲ್ಲೇ ನೂತನ ಸೇತುವೆ ನಿರ್ಮಾಣಗೊಂಡಿದೆ. 2019ರ ಪ್ರವಾಹ ಸಂದರ್ಭ ಈಗ ವಾಹನ ಸಂಚಾರ ನಡೆಯುತ್ತಿರುವ ಸೇತುವೆ ಮಟ್ಟದವರೆಗೂ ನದಿಯಲ್ಲಿ ನೀರು ಹರಿದು ಬಂದಿತ್ತು. ನೀರಿನಲ್ಲಿ ತೇಲಿ ಬಂದ ಅಪಾರ ಪ್ರಮಾಣದ ಮರಮಟ್ಟುಗಳ ಹೊಡೆತಕ್ಕೆ ಅಲ್ಲಲ್ಲಿ ಸಣ್ಣ ಮಟ್ಟದ ಹಾನಿಯೂ ಉಂಟಾಗಿದೆ.

ನೇತ್ರಾವತಿ ನದಿಗೆ ನಿಡಿಗಲ್‌ನಲ್ಲಿ 2020ರಲ್ಲಿ ಹೊಸ ಸೇತುವೆ ನಿರ್ಮಿಸಿದ್ದು, ಅದಕ್ಕೆ ಸದ್ಯ ಯಾವ ಧಕ್ಕೆಯೂ ಇಲ್ಲ. ಇದು ಹೊಸ ಸೇತುವೆಯಾಗಿದ್ದು, ಸುಗಮ ವಾಹನ ಓಡಾಟಕ್ಕೆ ಅನುಕೂಲ ಕಲ್ಪಿಸಿದೆ. ಹಿಂದೆ ಇಲ್ಲಿದ್ದ ಸೇತುವೆ ಬ್ರಿಟಿಷರ ಕಾಲದ್ದು. ಅದರ ಮೂಲಕ ಏಕಕಾಲದಲ್ಲಿ ಎರಡು ಭಾರಿ ವಾಹನಗಳು ಓಡಾಡಲು ಆಗುತ್ತಿರಲಿಲ್ಲ. ಆದ್ದರಿಂದ ಟ್ರಾಫಿಕ್ ಜಾಮ್ ಉಂಟಾಗುತ್ತಿತ್ತು. ವಿಶಿಷ್ಟ ಮಾದರಿಯ ಕಮಾನುಗಳುಳ್ಳ ಹಳೇ ಸೇತುವೆ ಆಕರ್ಷಕವಾಗಿದೆ. ಆದರೆ ನಿರ್ವಹಣೆ ಇಲ್ಲದೆ ಈಗ ಅದು ತ್ಯಾಜ್ಯದ ಕೊಂಪೆಯಾಗಿದೆ.