ಉಡುಪಿ: ಸಾಂಪ್ರದಾಯಿಕ ದೋಣಿಗಳು ಮತ್ತು ಮೀನುಗಾರಿಕಾ ಬೋಟ್​ಗಳ ಸಂಚಾರಕ್ಕೆ ಅಡಚಣೆ ಉಂಟು ಮಾಡುವ ರೀತಿಯಲ್ಲಿ ನದಿ ಮುಖಜದಲ್ಲಿ ತುಂಬಿರುವ ಮರಳಿನ ದಿಬ್ಬ ತೆರವುಗೊಳಿಸಲು ಕೇಂದ್ರ ಸರ್ಕಾರ ಸಹಮತ ವ್ಯಕ್ತಪಡಿಸಿದೆ.

ದೆಹಲಿಯ ಸಂಸತ್​ನಲ್ಲಿ ಉಡುಪಿ-ಚಿಕ್ಕಮಗಳೂರು ಸಂಸದ ಕೋಟ ಶ್ರೀನಿವಾಸ ಪೂಜಾರಿ ಅವರ ಲಿಖಿತ ಪ್ರಶ್ನೆಗೆ ಉತ್ತರಿಸಿರುವ ಕೇಂದ್ರ ಪರಿಸರ, ಅರಣ್ಯ, ಹವಾಮಾನ ಬದಲಾವಣೆ ಸಮೀಕ್ಷೆಯ ರಾಜ್ಯ ಸಚಿವ ಕೀರ್ತಿವರ್ದನ್​ ಸಿಂಗ್​ ಉತ್ತರಿಸಿದ್ದಾರೆ.

ಸಿಆರ್​ಜಡ್​ ಅಧಿಸೂಚನೆ 2019 ರ ಅಡಿಯಲ್ಲಿ ಪೂರ್ವಭಾವಿ ಅನುಮತಿ ಪಡೆಯುವ ಷರತ್ತಿಗೆ ಒಳಪಟ್ಟು ಸಿಆರ್​ಜಡ್-2 ಮತ್ತು ಸಿಆರ್​ಜಡ್-4 ಪ್ರದೇಶಗಳ ಮರಳಿನ ದಿಬ್ಬ ತೆಗೆದು ಹಾಕಲು ಅವಕಾಶ ಕಲ್ಪಿಸಲಾಗಿದೆ. ಅಲ್ಲದೆ, 2022ರ ನ.24ರ ತಿದ್ದುಪಡಿ ಅಧಿಸೂಚನೆ ಸಂಖ್ಯೆ 5495-ಇ ಸಿಆರ್​ಜಡ್​ ಅಧಿಸೂಚನೆಯಂತೆ ದ್ವೀಪ ಕರಾವಳಿ ನಿಯಂತ್ರಣ ವಲಯ ಅಧಿಸೂಚನೆ 2019ರ ಅಡಿಯಲ್ಲಿಯೂ ಯಾಂತ್ರಿಕವಲ್ಲದ ಸಾಂಪ್ರದಾಯಿಕ, ಯಾಂತ್ರಿಕವಲ್ಲದ ಕೈ ಕೆಲಸದ ವಿಧಾನಗಳ ಮೂಲಕ ಮರಳಿನ ದಿಬ್ಬ ತೆಗೆಯಲು ಸಚಿವಾಲಯ ಅನುಮತಿ ನೀಡಿದೆ.