ಮಾನವೀಯ ಮೌಲ್ಯ ಮೆರೆದ ಕ್ಯಾನ್ಸರ್ ವೈದ್ಯ

ಪಾಲಕರನ್ನು ಕಳೆದುಕೊಂಡ ಬಳಿಕ ಅನಾಥರಂತೆ ಬಾಳುತ್ತಿರುವ ತಿರ್ಲೆ ಮರಂದೆ ಮನೆ ನಿವಾಸಿಗರಾದ ನಾಗಮ್ಮ ಗೌಡ, ಚೆನ್ನಮ್ಮ ಗೌಡ, ರೇವತಿ ಗೌಡ, ಲಲಿತಾ ಗೌಡ ಎಂಬ ನಾಲ್ವರು ಸಹೋದರಿಯರು 5 ಎಕರೆ ಪ್ರದೇಶದ ಕೃಷಿ ಭೂಮಿ ಮತ್ತದರಲ್ಲಿನ ಚಿಕ್ಕದಾದ ಮನೆಯಲ್ಲಿ ವಾಸ್ತವ್ಯ ಹೊಂದಿದ್ದು, ಸ್ಥಳೀಯರು ಗಣತಿ ಮಾಡುವಾಗ 63 ದನಕರುಗಳು ಲೆಕ್ಕಕ್ಕೆ ಸಿಕ್ಕಿವೆ. ಕಾಡಿನಲ್ಲಿನ ಪ್ರಾಣಿಗಳು ಕಾಡಿನೊಳಗೆ ಹೇಗೆ ಜೀವನ ನಡೆಸುತ್ತಿದೆಯೋ ಅಂತೆಯೇ ಇವರ ಜಾನುವಾರುಗಳು ಜೀವನ ನಡೆಸುತ್ತಿರುತ್ತವೆ. ಇಷ್ಟೊಂದು ಸಂಖ್ಯೆಯ ದನಕರುಗಳಿಂದ ಎಷ್ಟು ಹಾಲು ಸಿಗುತ್ತದೆ? ಎಂದು ಪ್ರಶ್ನಿಸಿದರೆ ಮನೆ ಹಿರಿಯರಾದ ನಾಗಮ್ಮ ನೀಡಿದ್ದ ಉತ್ತರ ಅವರ ಕಳಕಳಿ ಸೂಚಿಸುತ್ತಿತ್ತು.

ಮಳೆಗಾಲದಲ್ಲಿ ಮೇವು ತಂದು ಹಾಕುತ್ತಿದ್ದೆವು. ಈಗ ಬೇಸಿಗೆ. ನಮಗೆ ಮೇವು ಸಿಗುತ್ತಿಲ್ಲ. ನೀರನ್ನಷ್ಟೇ ಇಡುತ್ತಿದ್ದೇವೆ. ಅವೇ ಮೇಯಲು ಹೋಗಿ ಹೊಟ್ಟೆ ತುಂಬಿಸುತ್ತವೆ. ಮೇವು ನೀಡದೇ ಹಾಲು ಕರೆಯುವುದು ಸರಿಯಾ? ಹಾಗಾಗಿ ಹಾಲು ತೆಗೆಯುತ್ತಿಲ್ಲ ಎಂದು ಉತ್ತರಿಸಿದ್ದರು.