ಬೈಂದೂರಿಗಿಲ್ಲ ತಾಲೂಕು ಆಸ್ಪತ್ರೆ ಭಾಗ್ಯ

ಬೈಂದೂರು ಸಮುದಾಯ ಆರೋಗ್ಯ ಕೇಂದ್ರ

Published on:

03 Dec 2025, 11:57 am

ವಿಜಯವಾಣಿ ಸುದ್ದಿಜಾಲ ಬೈಂದೂರು

ಬೈದೂರು ತಾಲೂಕು ಕೇಂದ್ರವಾಗಿ ೋಷಣೆಯಾಗಿ ಎಂಟು ವರ್ಷವಾದರೂ ತಾಲೂಕು ಆಸ್ಪತ್ರೆ ಭಾಗ್ಯ ಸಿಕ್ಕಿಲ್ಲ. ಈಗಿರುವ ಸಮುದಾಯ ಆರೋಗ್ಯ ಕೇಂದ್ರ ಕೂಡ ವೈದ್ಯರಿಲ್ಲದೆ ಮುಚ್ಚಬೇಕಾದ ಆತಂಕದಲ್ಲಿದೆ.

2018ರಲ್ಲಿ ಬೈಂದೂರು ತಾಲೂಕನ್ನು ಸರ್ಕಾರ ಘೋಷಿಸಿದೆ. ಬೈಂದೂರಿನಲ್ಲಿರುವ ಸಮುದಾಯ ಆರೋಗ್ಯ ಕೇಂದ್ರ ಮೇಲ್ದರ್ಜೆಗೇರಿಸಿ ತಾಲೂಕು ಆಸ್ಪತ್ರೆಯಾಗಿ ಘೋಷಿಸಬೇಕೆಂಬ ಬೇಡಿಕೆಗೆ ಸರ್ಕಾರ ಇದುವರೆಗೆ ಸಮ್ಮತ್ತಿ ನೀಡಿಲ್ಲ. ಅಲ್ಲದೆ ಸರ್ಕಾರದ ಹೊಸ ನಿಯಮದ ಪ್ರಕಾರ ಬೈಂದೂರು ಸಮುದಾಯ ಆರೋಗ್ಯ ಕೇಂದ್ರದಲ್ಲಿರುವ ವೈದ್ಯರು ಮತ್ತು ಸಿಬ್ಬಂದಿ ವರ್ಗಾವಣೆಯಾಗಲಿದ್ದು, ಸಿಬ್ಬಂದಿ ಕೊರತೆಯಿಂದ ಮುಚ್ಚುವ ಆತಂಕ ನಿರ್ಮಾಣವಾಗಿದೆ. ತಾಲೂಕು ಕೇಂದ್ರದಲ್ಲಿ ಸುಸಜ್ಜಿತ ಆಸ್ಪತ್ರೆ ಇಲ್ಲದೆ ಈ ಭಾಗದ ಜನರು ಆರೋಗ್ಯ ಸೇವೆಗೆ 40 ಕಿ.ಮೀ. ದೂರದ ಕುಂದಾಪುರ ತಾಲೂಕು ಆಸ್ಪತ್ರೆ ಅವಲಂಬಿಸಬೇಕಾಗಿದೆ.

ಏನಿದು ಸರ್ಕಾರದ ನಿಮಯ?:

ಸರ್ಕಾರದ ನಿಯಮದ ಪ್ರಕಾರ ಸಮುದಾಯ ಆಸ್ಪತ್ರೆಯಲ್ಲಿ ಸರಾಸರಿ 30 ಹೆರಿಗೆಯಾಗಬೇಕು ಎಂದು ಗುರಿ ನಿಗದಿ ವಾಡಿದೆ. ಪ್ರಸ್ತುತ ಬೈಂದೂರು ಆರೋಗ್ಯ ಕೇಂದ್ರಲ್ಲಿ ಸರಾಸರಿ 10 ರಿಂದ 15 ಹೆರಿಗೆ ಆಗುತ್ತಿದೆ. ಹೆರಿಗೆ ಮಾಡಿಸಲು ಬೇಕಾದ ಸೌಲಭ್ಯಗಳು ಇಲ್ಲಿಲ್ಲ. ಅರಿವಳಿಕೆ ತಜ್ಞರು, ಸಲಕರಣೆ ಮತ್ತಿತರ ವ್ಯವಸ್ಥೆ ಕಲ್ಪಿಸದ ಕಾರಣ ಜನರು ಸರ್ಕಾರಿ ಆಸ್ಪತ್ರೆಗೆ ಬರುವ ಧೈರ್ಯ ತೋರುತ್ತಿಲ್ಲ. ಸೌಲಭ್ಯಗಳನ್ನು ಕಲ್ಪಿಸಿ ಜನರಿಗೆ ಉತ್ತಮ ಆರೋಗ್ಯ ಸೇವೆ ನೀಡುವ ಬದಲು ವೈದ್ಯರು, ಸಿಬ್ಬಂದಿಯನ್ನು ವರ್ಗಾವಣೆ ಮಾಡಿ ಆರೋಗ್ಯ ಕೇಂದ್ರವನ್ನೇ ಮುಚ್ಚಲು ಮುಂದಾಗಿರುವುದು ಸಾರ್ವಜನಿಕರ ಅಸಮಾಧಾನಕ್ಕೆ ಕಾರಣವಾಗಿದೆ. ತಾಲೂಕು ಕೇಂದ್ರ ಬೈಂದೂರಿನಲ್ಲಿ ಸುಸಜ್ಜಿತ ಸರ್ಕಾರಿ ಆಸ್ಪತ್ರೆ ಅಗತ್ಯವಾಗಿ ಬೇಕಾಗಿದೆ.

ಎಲ್ಲ ವೈದ್ಯರು, ಸಿಬ್ಬಂದಿ ವರ್ಗಾವಣೆಗೆ ಆದೇಶ

ಬೈಂದೂರಿನಲ್ಲಿ ತಾಲೂಕು ಆಸ್ಪತ್ರೆ ಇಲ್ಲದಿದ್ದರೂ ಸಮುದಾಯ ಆರೋಗ್ಯ ಕೇಂದ್ರದಲ್ಲೇ ಈ ಭಾಗದ ಜನರಿಗೆ ಉತ್ತಮ ಆರೋಗ್ಯ ಸೇವೆ ದೊರೆಯುತ್ತಿದೆ. ಆರೋಗ್ಯ ಕೇಂದ್ರದಲ್ಲಿ ಸ್ತ್ರೀರೋಗ ತಜ್ಞರು, ಮಕ್ಕಳ ತಜ್ಞರು, ದಂತ ವೈದ್ಯರು, ಆಯುಷ್ ಹಾಗೂ ಸಾಂಕ್ರಾಮಿಕ ರೋಗ ತಜ್ಞರು ಇದ್ದಾರೆ. ಅರಿವಳಿಕೆ ಹಾಗೂ ಹಿರಿಯ ವೈದ್ಯಾಧಿಕಾರಿಗಳ ಕೊರತೆ ಇದೆ. ಎರಡು ಆಂಬುಲೆನ್ಸ್ ಇಲೆ. ಒಟ್ಟು 48 ಸಿಬ್ಬಂದಿ ಇರಬೇಕಿದ್ದು 19 ಸಿಬ್ಬಂದಿ ಇದ್ದಾರೆ. ಪ್ರತಿದಿನ 250 ರಿಂದ 300 ಹೊರರೋಗಿಗಳು ಚಿಕಿತ್ಸೆ ಪಡೆಯುತ್ತಾರೆ. ಆದರೆ ಸರ್ಕಾರ ಕೇವಲ ಹೆರಿಗೆ ಲೆಕ್ಕಾಚಾರದ ವರದಿ ಆಧರಿಸಿ ಬೈಂದೂರು ಆರೋಗ್ಯ ಕೇಂದ್ರದ ಎಲ್ಲ ತಜ್ಞ ವೈದ್ಯರು, ಸಿಬ್ಬಂದಿಗೆ ವರ್ಗಾವಣೆ ಆದೇಶ ನೀಡಿದೆ.

ಶಿಕ್ಷಣ, ಆರೋಗ್ಯ ಕ್ಷೇತ್ರಗಳಲ್ಲಿ ಸರ್ಕಾರ, ಇಲಾಖೆ ಪ್ರಾವಾಣಿಕ ಸೇವೆ ನೀಡಬೇಕಿದೆ. ಬಹುದೊಡ್ಡ ತಾಲೂಕು ಕೇಂದ್ರದಲ್ಲಿ ಆಸ್ಪತ್ರೆಯನ್ನು ಮುಚ್ಚಿಸುವ ಸರ್ಕಾರದ ನಡೆ ಕ್ಷೇತ್ರಕ್ಕೆ ವಾಡಿದ ಅನ್ಯಾಯವಾಗಿದೆ. ಹೀಗಾಗಿ ಈ ವಿಷಯವನ್ನು ಗಂಭೀರವಾಗಿ ಪರಿಗಣಿಸಿ ವೈದ್ಯರು ಹಾಗೂ ಸಿಬ್ಬಂದಿ ವರ್ಗಾವಣೆಯನ್ನು ತಾತ್ಕಾಲಿಕವಾಗಿ ಹಿಂಪಡೆಯಬೇಕಿದೆ.

ಪ್ರಸ್ತುತ ಸಮುದಾಯ ಆರೋಗ್ಯ ಕೇಂದ್ರದಲ್ಲಿ ಇರುವ ಸೌಲಭ್ಯಗಳಲ್ಲೇ ಉತ್ತಮ ಸೇವೆ ನೀಡಲಾಗುತ್ತಿದೆ. ಸಾರ್ವಜನಿಕರಿಂದ ಉತ್ತಮ ಸ್ಪಂದನೆಯಿದೆ. ಹೊಸ ನಿಯಮದ ಪ್ರಕಾರ ವೈದ್ಯರು ವರ್ಗಾವಣೆಯಾದರೆ ಭವಿಷ್ಯದಲ್ಲಿ ಬೈಂದೂರು ಕ್ಷೇತ್ರಕ್ಕೆ ಕಾಯಂ ವೈದ್ಯರಿಲ್ಲದಂತಾಗುತ್ತದೆ. ಆರೋಗ್ಯ ಕೇಂದ್ರವನ್ನು ತಾಲೂಕು ಆಸ್ಪತ್ರೆಯಾಗಿ ಮೇಲ್ದರ್ಜೆಗೇರಿಸಬೇಕು. ಸರ್ಕಾರದ ನಿಯಮ ನಾವು ಪಾಲಿಸಬೇಕಿದೆ.

ಬೈಂದೂರು ಸಮುದಾಯ ಆರೋಗ್ಯ ಕೇಂದ್ರದ ವೈದ್ಯರನ್ನು ವರ್ಗಾವಣೆ ಮಾಡುತ್ತಿರುವ ಸರ್ಕಾರದ ನಿಯಮ ಸರಿಯಲ್ಲ. ಮೊದಲು ಸವಲತ್ತು ನೀಡಬೇಕು. ಬಳಿಕ ಸಾರ್ವಜನಿಕರ ಸ್ಪಂದನೆ ನಿರೀಕ್ಷಿಸಬೇಕು. ಸವಲತ್ತು ನೀಡದೆ ಇರುವ ವ್ಯವಸ್ಥೆ ಕಸಿಯುವುದು ಸರ್ಕಾರಕ್ಕೆ ಕಪ್ಪುಚುಕ್ಕೆ. ಬೈಂದೂರು ಜನರಿಗೆ ಅನ್ಯಾಯವಾಗಲು ಬಿಡುವುದಿಲ್ಲ.

Hospital