ಉಡುಪಿ ತಾಲೂಕಿನಲ್ಲಿರುವ ಈ ಊರಿನ ಹೆಸರು 'ಪ್ರಗತಿ' ನಗರ. ಇಲ್ಲಿಗೆ ಬಂದವರು ಇದೆಂತಹ 'ಪ್ರಗತಿ' ನಗರ ಎಂದು ಮನಸ್ಸಿನಲ್ಲಿ ಬೈದುಕೊಳ್ಳದೆ ಸಂಚರಿಸಲಾರರು. ಇಲ್ಲಿನ ರಸ್ತೆಯೋ ದೇವರಿಗೇ ಪ್ರೀತಿ. ಇಕ್ಕೆಲಗಳಲ್ಲಿ ತ್ಯಾಜ್ಯ&ಕಸದ ರಾಶಿಯೇ ಇದ್ದು, ಸುಂದರ ಪರಿಸರದ ಅಂದವನ್ನೇ ಕೆಡಿಸಿದೆ.

ಅಲೆವೂರು ಗ್ರಾಪಂ ವ್ಯಾಪ್ತಿಯಲ್ಲಿರುವ ಪ್ರಗತಿ ನಗರವು ವಿವಿಧ ಕೆಲಸ ಕಾರ್ಯಗಳಿಗಾಗಿ ಹೆಚ್ಚು ಜನಸಂಚಾರವಿರುವ ಪ್ರಮುಖ ಊರು. ಆದರೆ, ಇಲ್ಲಿನ ಅವ್ಯವಸ್ಥೆ ಕಂಡಾಗ ಪ್ರಗತಿ ಕಾಣದ, ಸುಧಾರಿಸದ ನಗರದಂತೆ ಗೋಚರಿಸುತ್ತಿದೆ.

ಮಣಿಪಾಲದಿಂದ ಕೈಗಾರಿಕಾ ಪ್ರದೇಶ ರಸ್ತೆಯ ಎಡ ತಿರುವಿನಲ್ಲಿ ಮುಂದೆ ಒಂದು ಕಿಮೀ ಸಾಗಿದರೆ ಮತ್ತೆ ಎಡ ತಿರುವಿನಲ್ಲಿ ಪ್ರಗತಿ ನಗರ ಸಂಪರ್ಕಿಸುವ ರಸ್ತೆಯಿದೆ. ಆರಂಭದಲ್ಲಿ ಈ ಮಾರ್ಗ ರಾಜೀವ ನಗರ ಸಂಪರ್ಕಿಸುವ 80 ಬಡಗಬೆಟ್ಟು ಗ್ರಾಪಂ ವ್ಯಾಪ್ತಿಯ ರಸ್ತೆಯಾಗಿದ್ದು ಸಂಪೂರ್ಣ ಹದಗೆಟ್ಟಿದೆ. ಮುಂದೆ ಅಲೆವೂರು ಗ್ರಾಪಂನ ಪ್ರಗತಿ ನಗರದವರೆಗೂ ರಸ್ತೆ ಹೊಂಡಮಯವಾಗಿದೆ.

ಮಳೆಯ ಕಾರಣದಿಂದಲೋ ಅಥವಾ ರಸ್ತೆ ಮಾಡುವಾಗಲೇ ಸರಿಯಾದ ಕಾಮಗಾರಿ ಕೈಗೊಳ್ಳದ್ದರಿಂದಲೋ ಇಲ್ಲಿನ ರಸ್ತೆಯಲ್ಲಿ ವಾಹನ ಚಲಾಯಿಸಲು ತೊಡಕಾಗುತ್ತಿದೆ. ನೆಲದ ಮಟ್ಟದಿಂದ ಎರಡೂ ಕಡೆಗಳಲ್ಲಿ ರಸ್ತೆ ಎತ್ತರದಲ್ಲಿದ್ದು, ಮುಖಾಮುಖಿಯಾಗಿ 4 ಚಕ್ರದ ವಾಹನಗಳು ಬಂದಾಗ ಚಾಲಕರು ಪರದಾಡುತ್ತಾರೆ. ಕಾರು, ಅಟೋ ಚಾಲಕರು ಹಾಗೂ ಬೈಕ್​ ಸವಾರರಿಗೆ ಎದುರಿನಿಂದ ಬಸ್​ ಅಥವಾ ಲಾರಿ ಬಂದರೆ ಎದೆ ಢವಢವ ಎನ್ನುತ್ತದೆ. ಚಲಿಸುತ್ತಿರುವ ವೇಗದಲ್ಲೇ ರಸ್ತೆಯಿಂದ ಟೈರ್​ ಕೆಳಗೆ ಇಳಿಸಲು ಆಗದಷ್ಟು ರಸ್ತೆ ಎತ್ತರವಾಗಿದೆ. ಅನೇಕ ಬೈಕ್​ ಸವಾರರು ಬಿದ್ದು ಗಾಯಗೊಂಡಿದ್ದಾರೆ.

ಪ್ರಗತಿ ನಗರದಿಂದ ಮುಂದೆ ಅಲೆವೂರಿನಲ್ಲಿ ಉಡುಪಿ ನಗರದ ಕಸ ಸಂಗ್ರಹಿಸುವ ನಗರಸಭೆಯ ಡಂಪಿಂಗ್​ ಯಾರ್ಡ್​ ಇದೆ. 'ದೀಪದ ಬುಡ ಕತ್ತಲು' ಎನ್ನುವಂತೆ ಪ್ರಗತಿ ನಗರದ ಸಮೀಪದಲ್ಲಿಯೇ ಕಸ ಸಂಗ್ರಹಣಾಗಾರ ಇದ್ದರೂ ಸಹ ಊರಿನ ರಸ್ತೆಯ ಎರಡೂ ಕಡೆಗಳಲ್ಲಿ ಕಸದ ರಾಶಿಯೇ ಹರಡಿಕೊಂಡಿದ್ದು, ಪರಿಸರದ ಸ್ವಾಸ್ಥ್ಯ ಹಾಳಾಗಿದೆ.  

"