ಸಿಎನ್ಜಿ ದರ ಏರಿಕೆ, ಆಟೋ ಚಾಲಕರ ಪ್ರತಿಭಟನೆ

ಉಡುಪಿಯ ಉದ್ಯಾವರದಲ್ಲಿರುವ ಸಿಎನ್ಜಿ ಪಂಪ್ನಲ್ಲಿ ದರ ಏರಿಕೆ ಮಾಡಿರುವುದನ್ನು ಖಂಡಿಸಿ ಚಾಲಕ-ಮಾಲೀಕರು ಆಟೋವನ್ನು ರಸ್ತೆ ಬದಿಯಲ್ಲಿ ನಿಲ್ಲಿಸಿ ಪಂಪ್ ಬಳಿ ಪ್ರತಿಭಟಿಸಿದರು.

Published on:

14 Mar 2026, 5:21 pm

* ಉದ್ಯಾವರ ಪಂಪ್ ಎದುರು ವಾಹನ ಜಮಾ

* ಪೊಲೀಸರೊಂದಿಗೆ ಮಾತಿನ ಚಕಮಕಿ

ಉಡುಪಿ: ಸಿಎನ್ಜಿ ಗ್ಯಾಸ್ ಬಂಕ್ಗಳಲ್ಲಿ ಏಕಾಏಕಿ ಗ್ಯಾಸ್ ದರ ಏರಿಕೆ ಮಾಡಿರುವುದನ್ನು ವಿರೋಧಿಸಿ ಆಟೋ ಚಾಲಕರು ಉದ್ಯಾವರದಲ್ಲಿ ಶನಿವಾರ (ಮಾ.14) ಪ್ರತಿಭಟಿಸಿದ್ದಾರೆ. ಉದ್ಯಾವರದಲ್ಲಿರುವ ಏಜೀಸ್ ಅಟೋಗ್ಯಾಸ್ ಪಂಪ್ನಲ್ಲಿ ದಿಢೀರ್ ರೇಟ್ ಹೆಚ್ಚು ಮಾಡಿರುವುದನ್ನು ಖಂಡಿಸಿ ಪಂಪ್ ಎದುರಿನಲ್ಲಿ ಪ್ರತಿಭಟಿಸಿದರು.

ಕಟಪಾಡಿ ಅಟೋ ಚಾಲಕ ಮತ್ತು ಮಾಲಕರ ಸಂಘ, ಉಡುಪಿ ಆಶ್ರಯ ದಾತ ಅಟೋ ಯೂನಿಯನ್ ಹಾಗೂ ಮಲ್ಪೆ ಅಟೋ ಚಾಲಕ ಮತ್ತು ಮಾಲಕರ ಸಂಘದ ನೇತೃತ್ವದಲ್ಲಿ ನೂರಾರು ಚಾಲಕರು ತಮ್ಮ ಆಟೋವನ್ನು ಪಂಪ್ ಮುಂಭಾಗದ ರಸ್ತೆಯ ಬದಿಯಲ್ಲಿ ನಿಲ್ಲಿಸಿ ಬೆಲೆ ಏರಿಕೆ ವಿರುದ್ಧ ಆಕ್ರೋಶ ವ್ಯಕ್ತಪಡಿಸಿದರು.

ಲೀಟರ್ಗೆ 18 ರೂ. ಹೆಚ್ಚಳ

ಕಟಪಾಡಿ ಅಟೋ ಯೂನಿಯನ್ ಅಧ್ಯಕ್ಷ ಪ್ರೇಮಕುಮಾರ್ ಮಾತನಾನಾಡಿ, ಉದ್ಯಾವರ ಖಾಸಗಿ ಗ್ಯಾಸ್ ಬಂಕ್ನಲ್ಲಿ ಕೆಲವು ದಿನಗಳ ಹಿಂದೆ ಲೀಟರ್ಗೆ 60ರೂ. ಇತ್ತು. ಅದನ್ನು ಇತ್ತೀಚೆಗೆ 72.30ರೂ.ಗೆ ಏರಿಕೆ ಮಾಡಿದ್ದರು. ಇದೀಗ ಏಕಾಏಕಿ ಮತ್ತೆ 18 ರೂ. ಏರಿಸಿದ್ದು ಲೀಟರ್ಗೆ 90ರೂ. ಮಾಡಿದ್ದಾರೆ. ಆಟೋದವರಿಂದ ಹಣ ಲೂಟಿ ಮಾಡುತ್ತಿದ್ದಾರೆ ಎಂದು ಆರೋಪಿಸಿದರು.

ಪೊಲೀಸರೊಂದಿಗೆ ಮಾತಿನ ಚಕಮಕಿ

ಆಟೋ ಚಾಲಕರು ಪ್ರತಿಭಟನೆಗೆ ಅನುಮತಿ ಪಡೆಯದ ಹಿನ್ನೆಲೆಯಲ್ಲಿ ಪೊಲೀಸರು ಪಂಪ್ ಎದುರು ಪ್ರತಿಭಟನೆಗೆ ಅವಕಾಶ ನಿರಾಕರಿಸಿದರು. ಈ ಸಂದರ್ಭದಲ್ಲಿ ಪೊಲೀಸರು ಮತ್ತು ಚಾಲಕರ ನಡುವೆ ಕೆಲಕಾಲ ಮಾತಿನ ಚಕಮಕಿ ನಡೆಯಿತು. ಬಳಿಕ ಚಾಲಕರು ಮತ್ತು ಮಾಲೀಕರು ಜಿಲ್ಲಾಧಿಕಾರಿ ಹಾಗೂ ಜಿಲ್ಲಾ ಪೊಲೀಸ್ ವರಿಷ್ಠರಿಗೆ ಮನವಿ ಸಲ್ಲಿಸಿದರು.

ಕಟಪಾಡಿ ಅಟೋ ಯೂನಿಯನ್ನ ಪ್ರಧಾನ ಕಾರ್ಯದರ್ಶಿ ಹನೀಫ್ ಮಣಿಪುರ, ಮಲ್ಪೆ ಅಟೋ ಚಾಲಕ ಮತ್ತು ಮಾಲಕರ ಸಂಘದ ಅಧ್ಯಕ್ಷ ಶಂಭು ಕರ್ಕೇರ, ಆಶ್ರಯದಾತ ಆಟೋ ಯೂನಿಯನ್ ಜಿಲ್ಲಾ ಪ್ರಧಾನ ಕಾರ್ಯದರ್ಶಿ ಶಿವಾನಂದ ಮೂಡುಬೆಟ್ಟು ಸೇರಿದಂತೆ ಸಂಘಟನೆಯ ಪ್ರಮುಖರು ಉಪಸ್ಥಿತರಿದ್ದರು.

ಮಧ್ಯಪ್ರಾಚ್ಯ ರಾಷ್ಟ್ರದಲ್ಲಿ ಯುದ್ಧ ಆಗುತ್ತಿದೆ ಎಂಬ ನೆಪವೊಡ್ಡಿ ಅನಗತ್ಯವಾಗಿ ಉದ್ಯಾವರದ ಪಂಪ್ನಲ್ಲಿ ಸಿಎನ್ಜಿ ಗ್ಯಾಸ್ ದರ ಏರಿಕೆ ಮಾಡಿದ್ದಾರೆ. ಓಲ್ಡ್ ಸ್ಟಾಕ್ ಖಾಲಿಯಾಗಿದೆ. ಇದು ಹೊಸ ಸ್ಟಾಕ್. ಈಗ ದರ ಏರಿಕೆ ಆಗಿದೆ ಎಂದು ಪಂಪ್ನ ಮಾಲೀಕರು ತಿಳಿಸುತ್ತಾರೆ. ಕೂಡಲೇ ಜಿಲ್ಲಾಡಳಿತ ಮಧ್ಯಪ್ರವೇಶಿಸಿ ಆಟೋ ಚಾಲಕರಿಗೆ ಆಗುತ್ತಿರುವ ಅನ್ಯಾಯ ಸರಿಪಡಿಸಬೇಕು. ಹೆಚ್ಚಿನ ಹಣ ಪಡೆಯುತ್ತಿರುವ ಪಂಪ್ನವರ ವಿರುದ್ಧ ಕಾನೂನು ಕ್ರಮ ಕೈಗೊಳ್ಳಬೇಕು.

Protest