ಉಡುಪಿ: ಸಾಹಿತ್ಯ, ನಿರ್ದೇಶನ, ಪ್ರಸ್ತುತಿ, ಧ್ವನಿ-ಬೆಳಕು, ಸಂಗೀತ-ರಂಗಸಜ್ಜಿಕೆ ಹೀಗೆ ಎಲ್ಲ ವಿಭಾಗದಲ್ಲೂ 'ಊರ್ಮಿಳಾ' ಏಕವ್ಯಕ್ತಿ ನಾಟಕವು ರಾಷ್ಟ್ರೀಯ ಮಟ್ಟದ ಛಾಪು, ಅಭಿವ್ಯಕ್ತಿ ಹೊಂದಿದೆ. ಅಯನಾ ವಿ. ರಮಣ್​ ಅವರ ಅಭಿನಯವಂತೂ ಪರಾಕಾಷ್ಠೆಯಲ್ಲಿತ್ತು ಎಂದು ಮಾಜಿ ಸಚಿವ ಪ್ರಮೋದ್​ ಮಧ್ವರಾಜ್​ ಅನಿಸಿಕೆ ವ್ಯಕ್ತಪಡಿಸಿದರು.

ಉಡುಪಿಯ ಗೀತಾ ಮಂದಿರದಲ್ಲಿರುವ ಶ್ರೀ ಪುತ್ತಿಗೆ ನೃಸಿಂಹ ಆಡಿಟೋರಿಯಂನಲ್ಲಿ ಭಾನುವಾರ (ಆ.30) ಸಂಜೆ ಆಯೋಜಿಸಿದ್ದ ಡಾ.ಎಚ್​.ಎಸ್​. ವೆಂಕಟೇಶಮೂರ್ತಿ ವಿರಚಿತ, ಡಾ.ಶ್ರೀಪಾದ ಭಟ್​ ನಿರ್ದೇಶನದ 'ಊರ್ಮಿಳಾ' ಏಕವ್ಯಕ್ತಿ ನಾಟಕ ಪ್ರದರ್ಶನದ ಬಳಿಕ ನಡೆದ ಸಭಾ ಕಾರ್ಯಕ್ರಮದಲ್ಲಿ ಮಾತನಾಡಿದರು.

ಒಂದು ಗಂಟೆ ಅವಧಿಯ ಈ ನಾಟಕವು ಎಲ್ಲ ದೃಷ್ಟಿಯಿಂದಲೂ ಅತ್ಯುನ್ನತ ಮಟ್ಟದ್ದಾಗಿದೆ. ಎಲ್ಲ ಪಾತ್ರವನ್ನೂ ಒಬ್ಬರೇ ಅಭಿನಯಿಸುವುದು ಸುಲಭವಲ್ಲ. ದೂರದರ್ಶನ ಕಲಾವಿದೆ ಅಯನಾ ಅವರಿಗೆ ಅಂತಾರಾಷ್ಟ್ರೀಯ ಮಟ್ಟದಲ್ಲಿ ಬೆಳೆಯುವ ಎಲ್ಲ ಸಾಧ್ಯತೆ ಹಾಗೂ ಆ ನಿಟ್ಟಿನಲ್ಲಿ ಪೂರಕ ಪ್ರತಿಭೆಯೂ ಇದೆ ಎಂದರು.

ಸಂಗೀತ ವಿದುಷಿ ಡಾ. ಉಷಾ ಹೆಬ್ಬಾರ್​, ನಾಟಕದ ಸಂಗೀತ ನಿರ್ವಹಣೆ ಮಾಡಿದ ಡಾ. ಮೂಕಾಂಬಿಕಾ ಜಿ.ಎಸ್​., ಬೆಳಕು ನಿರ್ವಹಿಸಿದ ಸುಜಿತ್​ ಕಾರ್ಕಳ, ಪುತ್ತಿಗೆ ಮಠದ ಸಾಂಸ್ಕೃತಿಕ ಕಾರ್ಯಕ್ರಮಗಳ ಸಂಚಾಲಕ ರಮೇಶ್​ ಭಟ್​ ಉಪಸ್ಥಿತರಿದ್ದರು. ಗೀತಾ ಮಂದಿರದ ಪ್ರಭಾರಿ ಕೆ.ವಿ. ರಮಣ್​ ಆಚಾರ್ಯ ಕಾರ್ಯಕ್ರಮ ನಿರ್ವಹಿಸಿದರು.