ಕೃಷ್ಣ ಭಕ್ತರಿಗೆ ಪ್ರಸಾದ ವ್ಯವಸ್ಥೆ

ಶೀರೂರು ಪರ್ಯಾಯಕ್ಕೆ ಆಗಮಿಸುವ ಭಕ್ತರಿಗೆ ವಿತರಿಸಲು ಶೀರೂರು ಮಠದಲ್ಲಿ ಶ್ರೀಕೃಷ್ಣನ ಪ್ರಸಾದದ ಪೊಟ್ಟಣ ಸಿದ್ಧಪಡಿಸುತ್ತಿರುವ ವಿಪ್ರ ಮಹಿಳೆಯರು.

Published on:

10 Jan 2026, 3:13 pm

* ಶೀರೂರು ಮಠದ ಪರ್ಯಾಯಕ್ಕೆ ಭರದ ಸಿದ್ಧತೆ

* ವಿಪ್ರ ಮಹಿಳೆಯರಿಂದ 1.50 ಲಕ್ಷ ಪೊಟ್ಟಣ ತಯಾರಿ

ಪ್ರಶಾಂತ ಭಾಗ್ವತ ಉಡುಪಿ

ಜಗದ್ಗುರು ಮಧ್ವಾಚಾರ್ಯ ಮೂಲಮಹಾಸಂಸ್ಥಾನದ ವಾಮನತೀರ್ಥ ಪರಂಪರೆಯ ಶೀರೂರು ಮಠದ ಭಾವೀ ಪರ್ಯಾಯಕ್ಕೆ ದಿನಗಣನೆ ಆರಂಭಗೊಂಡಿದೆ. ಜ.18ರಿಂದ ವೇದವರ್ಧನ ತೀರ್ಥ ಶ್ರೀಪಾದರ ಪ್ರಥಮ ಪರ್ಯಾಯದ ಹಿನ್ನೆಲೆಯಲ್ಲಿ ಉಡುಪಿ ರಥಬೀದಿಯಲ್ಲಿರುವ ಶೀರೂರು ಮಠದಲ್ಲಿ ಸಂಭ್ರಮ-ಸಡಗರ ಕಂಡುಬರುತ್ತಿದೆ.

ಪರ್ಯಾಯಕ್ಕೆ ಹೊರೆಕಾಣಿಕೆ ಸಮರ್ಪಣೆ ಮಾಡುವವರಿಗೆ ಹಾಗೂ ಪರ್ಯಾಯೋತ್ಸವದಲ್ಲಿ ಪಾಲ್ಗೊಳ್ಳುವ ಭಕ್ತರಿಗೆ ಶ್ರೀಕೃಷ್ಣನ ಪ್ರಸಾದ ವಿತರಿಸಲು ಶ್ರೀಮಠ ಸಂಕಲ್ಪಿಸಿದೆ. ತನ್ನಿಮಿತ್ತ ಪ್ರಸಾದದ ಪೊಟ್ಟಣ ತಯಾರಿ ಕಾರ್ಯ ಭರದಿಂದ ಸಾಗಿದೆ.

200 ಮಹಿಳೆಯರು ಭಾಗಿ

ಉಡುಪಿ ತಾಲೂಕು ಬ್ರಾಹ್ಮಣ ಸಂಘದ ಮಹಿಳಾ ವಿಭಾಗದ 200ಕ್ಕೂ ಅಧಿಕ ಕಾರ್ಯಕರ್ತೆಯರು ಶೀರೂರು ಮಠದ ಪಟ್ಟದ ದೇವರ ಗರ್ಭಗುಡಿಯ ಮುಂಭಾಗದಲ್ಲಿ ಪ್ರಸಾದದ ಪೊಟ್ಟಣ ಸಿದ್ಧಪಡಿಸುತ್ತಿದ್ದಾರೆ. ಪರ್ಯಾಯೋತ್ಸವದ ದಿನ 1 ಲಕ್ಷಕೂ ಅಧಿಕ ಭಕ್ತರು ಪಾಲ್ಗೊಳ್ಳುವ ನಿರೀಕ್ಷೆ ಇದೆ. ಹೀಗಾಗಿ 1.50 ಲಕ್ಷದಷ್ಟು ಪ್ರಸಾದದ ಪೊಟ್ಟಣ ಸಿದ್ಧಪಡಿಸಲಾಗುತ್ತಿದೆ.

ಸಂಪ್ರದಾಯ, ಶಾಸ್ತ್ರಾನುಸಾರ ಪೂಜಾಸೇವೆ

ರಜತಪೀಠಪುರವೆಂಬ ಮೂಲಹೆಸರಿನ ಉಡುಪಿಯು ಇತಿಹಾಸ ಗರ್ಭದ ಪರಮ ಪುಣ್ಯಭೂಮಿಯಾಗಿದೆ. ಆಚಾರ್ಯ ಮಧ್ವರು ಅವತರಿಸಿ, ಕಡಗೋಲುಧಾರಿ ಶ್ರೀಕೃಷ್ಣನನ್ನು ಪ್ರತಿಷ್ಠಾಪಿಸಿ ದ್ವೈತ ಸಿದ್ಧಾಂತ ಪ್ರತಿಪಾದಿಸಿದ ತಪೋಭೂಮಿಯಿದು. ಶ್ರೀಮಧ್ವ-ವಾದಿರಾಜರು ನಡೆದಾಡಿದ ಕ್ಷೇತ್ರದಲ್ಲಿ ಚಂದ್ರಮೌಳೀಶ್ವರ, ಅನಂತೇಶ್ವರ ದೇವರ ದಿವ್ಯಸಹಯೋಗವೂ ಇದೆ. ಆನಂದದ ಅನುಭೂತಿ, ಪ್ರಭಾವಳಿಯ ತಾಣವಾಗಿರುವ ಉಡುಪಿಯಲ್ಲಿ ಶೀರೂರು ಮಠದ ಪರ್ಯಾಯೋತ್ಸವದ ಭಕ್ತಿಸಂಭ್ರಮ. ಭಗವಂತನ ಸೇವೆಗೆ ಮೀಸಲಾದ ಈ ಪರ್ಯಾಯವನ್ನು ಸಂಪ್ರದಾಯ, ಶಾಸ್ತ್ರಾನುಸಾರ ನೆರವೇರಿಸಲು ಅಣಿಯಾಗಿದ್ದೇವೆ ಎನ್ನುತ್ತಾರೆ ವೇದವರ್ಧನ ತೀರ್ಥ ಶ್ರೀಪಾದರು.

ಶೀರೂರು ಮಠಾಧೀಶ ವೇದವರ್ಧನ ತೀರ್ಥ ಶ್ರೀಪಾದರ ಸರ್ವಜ್ಞ ಪೀಠಾರೋಹಣದ ಪ್ರಥಮ ಪರ್ವಕಾಲವಿದು. ಧಾರ್ಮಿಕ, ಸಾಂಸ್ಕೃತಿಕ ಕಾರ್ಯಕ್ರಮಗಳ ಸಾಂಗತ್ಯವೇ ಕೃಷ್ಣಾರಾಧನೆಯ ಪರ್ಯಾಯವಾಗಿದೆ. ಆತನ ಭಕ್ತರೆಲ್ಲರೂ ಸೇರುವ ಶ್ರದ್ಧಾಭಕ್ತಿಯ ಸಮ್ಮಿಲನ. ಸತ್ಸಂಪ್ರದಾಯದ ಸಮ್ಮೇಳನ. ಆಗಮಿಸುವ ಕೃಷ್ಣಭಕ್ತರೆಲ್ಲರಿಗೂ ಪ್ರಸಾದ ವಿತರಿಸಲಾಗುವುದು.

ಶೀರೂರು ಪರ್ಯಾಯಕ್ಕೆ ಆಗಮಿಸುವ ಭಕ್ತರಿಗೆ ವಿತರಿಸಲು ಪ್ರಸಾದದ ಪೊಟ್ಟಣ ಸಿದ್ಧಪಡಿಸುತ್ತಿದ್ದೇವೆ. ಕೃಷ್ಣನ ಸೇವಾರ್ಥ ವಿಪ್ರ ಮಹಿಳೆಯರು ಈ ಕಾರ್ಯದಲ್ಲಿ ತೊಡಗಿದ್ದೇವೆ. ಕಲ್ಲುಸಕ್ಕರೆ, ಉತ್ತತ್ತಿ, ಗೋಡಂಬಿ, ಬದಾಮಿ ಹಾಗೂ ಒಣದ್ರಾಕ್ಷಿಗಳು ಪ್ರಸಾದದ ಪೊಟ್ಟಣದಲ್ಲಿ ಇರಲಿದೆ. ನಿತ್ಯವೂ ವಿವಿಧ ಸೇವಾಕಾರ್ಯಗಳಲ್ಲಿ ತೊಡಗಿದ್ದೇವೆ.

Devotees