ನದಿಯಲ್ಲಿ ಬಂಡೆ ಆಂಜನೇಯ!

ಆಜ್ರಿ ಗ್ರಾಪಂ ವ್ಯಾಪ್ತಿಯ ಬಾಂಡ್ಯದ ಚಕ್ರಾ ನದಿ ತಟದಲ್ಲಿರುವ ಶ್ರೀ ಲಕ್ಷ್ಮೀ ವೆಂಕಟರಮಣ ದೇವಸ್ಥಾನ ಜೀರ್ಣೋದ್ಧಾರ ಸಲುವಾಗಿ ಇತ್ತೀಚೆಗೆ ಆರೂಢ ಚಿಂತನಾ ಪ್ರಶ್ನೆ ಇಡಲಾಗಿತ್ತು. ಈ ವೇಳೆ ಅಲ್ಲಿಯೇ ಸಮೀಪದಲ್ಲಿ ಹರಿಯುವ ಚಕ್ರಾ ನದಿಯಲ್ಲಿ ಆಂಜನೇಯನ ಕೆತ್ತನೆಯಿರುವ ಬಂಡೆ ಪತ್ತೆಯಾಗಿದ್ದು, ಅದರ ಹಿಂದೆ ಹತ್ತಾರು ಕಥೆಗಳಿರುವುದು ಬೆಳಕಿಗೆ ಬಂದಿದೆ.

ಶ್ರೀ ಲಕ್ಷ್ಮೀ ವೆಂಕಟರಮಣ ದೇವಸ್ಥಾನ ಗೌಡ ಸಾರಸ್ವತ ಬ್ರಾಹ್ಮಣ ಸಮಾಜದ್ದು. ನೂರಾರು ವರ್ಷಗಳ ಕಾಲ ಪೂಜೆ ನಡೆಯುತ್ತಿತ್ತು. ಕೆಲವು ವರ್ಷಗಳ ಬಳಿಕ ದೇವಸ್ಥಾನ ಅಜೀರ್ಣಾವಸ್ಥೆ ತಲುಪಿತ್ತು. ಈಗ ಮತ್ತೆ ದೇವಸ್ಥಾನದ ಜೀರ್ಣೋದ್ಧಾರಕ್ಕೆ ಊರವರು ಮುಂದಾಗಿದ್ದು, ಬಾಂಡ್ಯ ಸುಭಾಶ್ಚಂದ್ರ ಶೆಟ್ಟಿ ನೇತೃತ್ವದಲ್ಲಿ ಹಾಲಾಡಿಯ ಜೋತಿಷಿ ಕಟ್ಟುವಟ್ಟು ವಾಸುದೇವ ಜೋಯಿಸರಿಂದ ಆರೂಢ ಪ್ರಶ್ನೆ ನಡೆಸುವುದಾಗಿ ತೀರ್ಮಾನಿಸಲಾಯಿತು. ಆರೂಢ ಪ್ರಶ್ನೆ ವೇಳೆ ಶ್ರೀ ವೆಂಕಟರಮಣ ದೇವಸ್ಥಾನದ ಜತೆಗೆ ಇದೇ ದೇಗುಲದ ಪಕ್ಕದಲ್ಲೇ ಸನ್ಯಾಸಿಯೊಬ್ಬರ ಸಮಾಧಿಯಿದೆ. ಸಮಾಧಿ ಎದುರೇ ಚಕ್ರಾ ನದಿಯಲ್ಲಿ ಆಂಜನೇಯನ ಕೆತ್ತನೆ ಇರುವ ಬಂಡೆ ಇರುವ ಬಗ್ಗೆ ಗೋಚರವಾಗಿದೆ. ಊರವರೆಲ್ಲ ಹುಡುಕಾಟ ನಡೆಸಿದಾಗ ಬಂಡೆ ಪತ್ತೆಯಾಗಿದೆ. ಸನ್ಯಾಸಿಯೇ ಪೂಜೆ ಮಾಡುತ್ತಿದ್ದರು ಎಂಬ ವಿಚಾರ ಬೆಳಕಿಗೆ ಬಂದಿದೆ.

ಆಂಜನೇಯ ಬಂಡೆ ಸಿಕ್ಕ ಸುತ್ತಮುತ್ತ ಪ್ರದೇಶಗಳಲ್ಲಿ ಆಂಜನೇಯ ದೇವಸ್ಥಾನವೇ ಇಲ್ಲ. ಬಾಂಡ್ಯ ಗ್ರಾಮದಲ್ಲಿ ಮನೆಗಿಂತ ಹೆಚ್ಚು ದೇವರು, ದೈವಗಳ ಬೀಡು ಇದೆ. ಇತಿಹಾಸ ನೋಡಿದರೆ ಈ ಪ್ರದೇಶ ಜೈನರ ಆಳ್ವಿಕೆಯಲ್ಲಿತ್ತು. ಹಾಗಾಗಿ ಇಲ್ಲಿ ವಿಭಿನ್ನ ಧರ್ಮ, ಸಂಸ್ಕೃತಿ ಮತ್ತು ಅಧ್ಯಾತ್ಮ ಒಟ್ಟಾಗಿ ಬೆರೆತು ವಿಶಿಷ್ಟ ಪರಂಪರೆ ನಿರ್ಮಿಸಿದೆ.

ದೇವಸ್ಥಾನ ಈಗ ಅಜೀರ್ಣಾವಸ್ಥೆಯಲ್ಲಿದ್ದರೂ ಪ್ರಕೃತಿ ಸಹಜ ಸೊಬಗಿನ ದಟ್ಟ ಕಾನನದ ನಡುವೆ ವಿಶೇಷ ಅನುಭೂತಿ ನೀಡುವ ಧಾರ್ಮಿಕ, ಶ್ರದ್ಧಾ ಕೇಂದ್ರದಂತಿದೆ. ಪ್ರತಿ ದಿನ ಈ ದೇವಸ್ಥಾನದ ಬಾಗಿಲು ತೆರೆದ ಕೂಡಲೇ ಎರಡು ಹಸುಗಳು ದೇವರ ಮುಂದೆ ಬರುತ್ತವೆ ಎನ್ನುತ್ತಾರೆ ಸ್ಥಳೀಯರಾದ ಮಂಜುನಾಥ ಕೆಳಬಾಂಡ್ಯ.