ಅಂಗನವಾಡಿ ಸಹಾಯಕಿ ಪುತ್ರನಿಗೆ ಪಿಎಚ್.ಡಿ

 ಉಪನ್ಯಾಸಕರಾದ ಇವರು, ಸಹಕಾರಿ ಸಂಸ್ಥೆ ಸ್ಥಾಪಿಸಿ ಬಡವರಿಗೆ ಸಾಲ ಒದಗಿಸಿದ್ದು, ಯುವ ವೃಂದ ಸ್ಥಾಪಿಸಿ ಸಾಮಾಜಿಕ ಕೆಲಸವನ್ನೂ ಮಾಡುತ್ತಿದ್ದಾರೆ. ತಾಯಿಯ ಕಷ್ಟಗಳೇ ಇವರಿಗೆ ಪ್ರೇರಣೆ.

 ರಾಜೇಶ್ ಶಾಂತಿನಿಕೇತನ ಯುವ ವೃಂದ ಸ್ಥಾಪಿಸಿ ಉಡುಪಿ, ತುಮಕೂರು, ಶಿವಮೊಗ್ಗ ಮತ್ತು ಚಿಕ್ಕಮಗಳೂರು ಜಿಲ್ಲೆಗಳ ಸರ್ಕಾರಿ ಶಾಲಾ-ಕಾಲೇಜುಗಳಲ್ಲಿ 31 ಶಾಂತಿನಿಕೇತನ ಜ್ಞಾನ ಸ್ಫೂರ್ತಿ ರಸಪ್ರಶ್ನೆ ಆಯೋಜಿಸಿದ್ದಾರೆ. ಸಂಘ ಜಿಲ್ಲಾ, ರಾಜ್ಯ ಮತ್ತು ರಾಷ್ಟ್ರಮಟ್ಟದ ಪ್ರಶಸ್ತಿಗಳನ್ನೂ ಮುಡಿಗೇರಿಸಿಕೊಂಡಿದೆ. 

 ರಾಜೇಶ್ ಅವರು ಪ್ರಾಥಮಿಕ ಶಿಕ್ಷಣದಿಂದ ಸ್ನಾತಕೋತ್ತರ ಪದವಿವರೆಗಿನ ವಿದ್ಯಾಭ್ಯಾಸವನ್ನು ಸರ್ಕಾರಿ ಶಾಲೆ, ಕಾಲೇಜುಗಳಲ್ಲೇ ಮಾಡಿರುವುದು ವಿಶೇಷ. ತುಮಕೂರು ವಿವಿಯ ಡಾ.ಶ್ರೀನಿವಾಸ್ ಮೂರ್ತಿ ಎಂ.ಡಿ.ಮಾರ್ಗದರ್ಶನದಲ್ಲಿ ದಿ ಫೈನಾನ್ಸಿಯಲ್ ಪರ್ಫಾರ್ಮೆನ್ಸ್ ಕೋಪರೇಟಿವ್ಸ್: ಎ ಕಂಪರೇಟಿವ್ ಸ್ಟಡಿ ಅಫ್ ಕೆಎಸ್‌ಸಿಎಫ್ ಸೊಸೈಟೀಸ್ ಆ್ಯಂಡ್ ಕೆಎಸ್‌ಎಸ್‌ಎಫ್‌ಸಿ ಸೊಸೈಟೀಸ್ ಎಂಬ ವಿಷಯದಲ್ಲಿ ಪಿಎಚ್ ಡಿ.ಪಡೆದಿದ್ದಾರೆ.

 ವಿವಿಯ ಕಲಾ ಕಾಲೇಜಿನ ವ್ಯವಹಾರ ಆಡಳಿತ ಉಪನ್ಯಾಸಕರಾಗಿ, ಆಕ್ಸಿಸ್ ಮ್ಯಾಕ್ಸ್ ಲೈಫ್‌ನಲ್ಲಿ ‘ಏಸ್ ಲೈಫ್ ಅಡ್ವೈಸರ್ ಹಾಗೂ ಎಂಡಿಆರ್‌ಟಿ ಆಗಿ ಮೊದಲ ಸ್ಥಾನದಲ್ಲಿದ್ದಾರೆ. ಸಂಖ್ಯಾಶಾಸ್ತ್ರದಲ್ಲಿ ಮಾರ್ಗದರ್ಶನ ನೀಡುತ್ತಿದ್ದಾರೆ. ರಾಜೇಶ್ ಎಂ.ಕಾಂ, ಎಂ.ಎ. ಎಕನಾಮಿಕ್ಸ್, ಬಿ.ಎಡ್, ಎಂಬಿಎ, ಡಿಪ್ಲೊಮಾ ಇನ್ ಡಿಸಿಬಿಎಂ ಪದವಿ ಪಡೆದಿದ್ದಾರೆ. ನೆಟ್, ಕೆಸೆಟ್ ಪರೀಕ್ಷೆ ಉತ್ತೀರ್ಣರಾಗಿದ್ದಾರೆ.

 ಕರೊನಾ ಸಂದರ್ಭ ಶಾಂತಿನಿಕೇತನ ಸೌಹಾರ್ದ ಸಹಕಾರಿ ಸಂಘ ಹುಟ್ಟು ಹಾಕಿದ್ದು, 5 ವರ್ಷಗಳಲ್ಲಿ ಶೇ.100 ಸಾಲ ಮರುಪಾವತಿ ಮಾಡಿ, ಆಡಿಟ್‌ನಲ್ಲಿ ಎ ಗ್ರೇಡ್ ಪಡೆದು, ಕಳೆದ ವರ್ಷ ಶೇ.20 ಡಿವಿಡೆಂಡ್ ಘೋಷಿಸಿದೆ.

ಮಗ ಪಿಎಚ್‌ಡಿ ಪದವಿ ಪಡೆದಿರುವುದು ಹೆಮ್ಮೆ ಎನಿಸುತ್ತದೆ. ಬಾಲ್ಯದಲ್ಲಿದ್ದ ಆರ್ಥಿಕ, ಸಾಮಾಜಿಕ ಕಷ್ಟ ಮೆಟ್ಟಿ ನಿಂತು ಸಾಧನೆ ಮಾಡಿದ್ದಾನೆ. ಸಾಮಾಜಿಕ ಕೆಲಸಗಳಲ್ಲಿ ತೊಡಗಿಕೊಳ್ಳುವ ಅವನ ಸಾಧನೆಗೆ ಇದೊಂದು ಮುನ್ನುಡಿಯಾಗಲಿ.

— ಕಲಾವತಿ ತಾಯಿ