ಋತು ಮುಗಿವ ಮುನ್ನವೇ ಲಂಗರು!

ಮೀನುಗಾರಿಕೆ ಇಲ್ಲದೆ ಮರವಂತೆಯಲ್ಲಿ ದಡ ಸೇರಿರುವ ನಾಡದೋಣಿಗಳು.

Published on:

14 Feb 2026, 2:59 pm

- ರಾಘವೇಂದ್ರ ಪೈ ಕುಂದಾಪುರ

ಎರಡು ತಿಂಗಳಿನಿಂದ ಕುಂಠಿತಗೊಂಡಿದ್ದ ಮೀನುಗಾರಿಕೆಗೆ, ಅರಬ್ಬಿ ಸಮುದ್ರದಲ್ಲಿ ಬೀಸುತ್ತಿರುವ ಭಾರಿ ಗಾಳಿ ಹಾಗೂ ಮೀನಿನ ಕೊರತೆ ಮತ್ತೆ ಹೊಡೆತ ನೀಡಿದೆ. ಹದಿನೈದು ದಿನಗಳಿಂದ ಮೀನುಗಳು ಹೇರಳವಾಗಿ ಸಿಗದ ಕಾರಣ ಹೆಚ್ಚಿನ ಬೋಟು, ದೋಣಿಗಳು ಕರಾವಳಿಯ ಬಹುತೇಕ ಎಲ್ಲ ಬಂದರುಗಳಲ್ಲಿಯೇ ಲಂಗರು ಹಾಕಿವೆ. ಕಡಲಿಗಿಳಿದರೂ ನಿರೀಕ್ಷೆಯಷ್ಟು ಮೀನು ಸಿಗದೆ ಬರಿಗೈಯಲ್ಲಿ ವಾಪಾಸಾಗುತ್ತಿದ್ದರೆ, ಕೆಲವು ದೋಣಿಗಳಂತೂ ಈ ವರ್ಷದ ಮೀನುಗಾರಿಕೆಗೆ ನಾಲ್ಕು ತಿಂಗಳು ಮೊದಲೇ ಬಹುತೇಕ ಮುಕ್ತಾಯ ಹಾಡಿವೆ.

ಮೀನಿನ ಕೊರತೆ ಹಾಗೂ ಜನರ ಅಭಾವದಿಂದ ಸಾಂಪ್ರದಾಯಿಕ ನಾಡದೋಣಿಗಳು, ಇನ್ನಿತರ ದೋಣಿಗಳ ಮೀನುಗಾರಿಕೆ ಬಹುತೇಕ ಮುಕ್ತಾಯವಾದಂತಿದೆ. ಗಂಗೊಳ್ಳಿ, ಮರವಂತೆ, ಕೊಡೇರಿ, ಶಿರೂರು ಬಂದರುಗಳಲ್ಲಿ ದೋಣಿಗಳು ದಡ ಸೇರಿದ್ದು, ಇನ್ನು ಈ ಋತುವಿನಲ್ಲಿ ಮೀನುಗಾರಿಕೆಗೆ ಇಳಿಯುವುದು ಅನುಮಾನ. ಮತ್ಸೃಸಂತತ್ತು ಹೇರಳವಾಗಿದ್ದರೆ ಫೆಬ್ರವರಿ, ಮಾರ್ಚ್, ಏಪ್ರಿಲ್‌ವರೆಗೂ ಮೀನುಗಾರರು ಕಡಲಿಗಿಳಿಯುತ್ತಾರೆ. ಆದರೆ ಈ ಋತುವಿನ ಮೀನುಗಾರಿಕೆಗೆ ಇನ್ನೂ 4 ತಿಂಗಳಿದ್ದರೂ, ಫೆಬ್ರವರಿ ಮೊದಲ ವಾರದಲ್ಲೇ ಮೀನುಗಾರಿಕೆಗೆ ಮಂಗಳ ಹಾಡಿದ್ದಾರೆ.

ಲಂಗರು ಹಾಕಿರುವುದೇ ಜಾಸ್ತಿ

ಆಳ ಸಮುದ್ರ ಮೀನುಗಾರಿಕೆ ನಡೆಸುವ ಟ್ರಾಲ್, ಗಿಲ್‌ನೆಟ್, ಪರ್ಸಿನ್ ಬೋಟಿನವರ ಕಥೆಯೂ ಇದೆ ಆಗಿದೆ. ಕಡಲಿಗೆ ಇಳಿದರೂ, ನಿರೀಕ್ಷೆಯಷ್ಟು ಮೀನು ಸಿಗುತ್ತಿಲ್ಲ. ಮೂರ‌್ನಾಲ್ಕು ದಿನಗಳ ಕಾಲ ಮೀನುಗಾರಿಕೆ ನಡೆಸಿದರೆ 1 ಬೋಟಿಗೆ ಕನಿಷ್ಠವೆಂದರೂ 3 ಲಕ್ಷ ರೂ.ಸಿಕ್ಕರೆ ನಷ್ಟವಿಲ್ಲ. ಆದರೆ ಈಗ ಮೀನಿಲ್ಲದೆ 30 ಸಾವಿರದಿಂದ 40 ಸಾವಿರ ರೂ.ಮಾತ್ರ ಸಿಗುತ್ತಿದೆ. ಇದರಿಂದ ಬಹುತೇಕ ಬೋಟಿನವರು ಆಗೊಮ್ಮೆ, ಈಗೊಮ್ಮೆ ಮಾತ್ರ ತೆರಳುತ್ತಿದ್ದಾರೆ.

ಲಕ್ಷಾಂತರ ಮಂದಿಗೆ ನಷ್ಟ

ಗಂಗೊಳ್ಳಿ, ಕೊಡೇರಿ, ಶಿರೂರು ಸಹಿತ ಎಲ್ಲ ಮೀನುಗಾರಿಕಾ ಬಂದರುಗಳಲ್ಲಿಯೂ ಸಾವಿರಾರು ಮೀನುಗಾರರು, ಕಾರ್ಮಿಕರು, ವಾಹನಗಳ ಚಾಲಕರು ಮೀನುಗಾರಿಕೆಯನ್ನೇ ನಂಬಿಕೊಂಡಿದ್ದಾರೆ. ಮೀನುಗಳ ಲೋಡ್, ಅನ್‌ಲೋಡ್, ಐಸ್ ಪ್ಲಾಂಟಿನವರು, ಹರಾಜು ಕೂಗುವವರು, ಮೀನು ಹೊರುವವರ ಸಹಿತ ಒಟ್ಟಾರೆ ಕರಾವಳಿಯ ಉಡುಪಿ, ದ.ಕ. ಹಾಗೂ ಉತ್ತರ ಕನ್ನಡ ಜಿಲ್ಲೆಗಳಲ್ಲಿ ಲಕ್ಷಾಂತರ ಮಂದಿಗೆ ಜೀವನೋಪಾಯ. ಆದರೆ ಮೀನುಗಾರಿಕೆಯಿಲ್ಲದೆ ಅವರ ಜೀವನ ನಿರ್ವಹಣೆಗೂ ಸಮಸ್ಯೆ ಎದುರಾಗಿದೆ.

ಗಗನಕ್ಕೇರಿದ ದರ

ಮೀನಿನ ಕೊರತೆಯಿಂದಾಗಿ ಆಳ ಸಮುದ್ರ ಮೀನುಗಾರಿಕೆ ನಡೆಸುವ ಟ್ರಾಲ್, ಗಿಲ್ ನೆಟ್, ಸಾಂಪ್ರದಾಯಿಕ ನಾಡದೋಣಿಗಳು, ಇನ್ನಿತರ ದೋಣಿಗಳು ಕಡಲಿಗಿಲಿಯುವುದು ಕಡಿಮೆಯಾದ ಕಾರಣ ಪೂರೈಕೆ ಕೊರತೆಯಿಂದ ಮೀನುಗಳ ದರ ಗಗನಕ್ಕೇರಿದೆ. ಕೆಜಿಗೆ ಪಾಂಪ್ಲೆಟ್ 1,800 ರೂ., ಅಂಜಲ್ 1 ಸಾವಿರ ರೂ.ಗಡಿ ದಾಟಿದೆ. ಬಂಗುಡೆ 300-250 ರೂ., ಬೂತಾಯಿ 180-200 ರೂ., ಕೊಡ್ವಾಯಿ 300-350, ಬೊಳಂಜಿರ್ 350-400 ರೂ., ಏಡಿ 300-350 ರೂ. ಮತ್ತು ಸಿಗಡಿ 350-450 ರೂ.ಗಳಿಗೆ ಮಾರಾಟವಾಗುತ್ತಿದೆ.

ನಮ್ಮಲ್ಲಿ ಉತ್ತರ ಭಾರತದ ಬಹುತೇಕ ಕಾರ್ಮಿಕರು ಡಿಸೆಂಬರ್, ಜನವರಿ, ಫೆಬ್ರವರಿ ತಿಂಗಳಲ್ಲಿ ತಮ್ಮ ಊರಿನ ಉತ್ಸವಗಳಿಗೆ ತೆರಳಿದ್ದಾರೆ. ಹೀಗಾಗಿ ಕಾರ್ಮಿಕರ ಕೊರತೆ ಎದುರಾಗಿದೆ. ಬೋಟುಗಳಲ್ಲಿ ಕೆಲಸಗಾರರ ಕೊರತೆ ಒಂದು ಪ್ರಮುಖ ಕಾರಣ. ಪರ್ಸಿನ್ ಬೋಟುಗಳಿಗೆ ಮಾತ್ರ ಗಾಳಿ ಬಂದರೆ ಕಷ್ಟ. ಹೀಗಾಗಿ ಆ ಬೋಟುಗಳು ದಡ ಸೇರಿವೆ.

ಮೀನುಗಾರಿಕೆ