ಸುಸಜ್ಜಿತ ಸೌಲಭ್ಯವಿದ್ದರೂ ವೈದ್ಯರಿಲ್ಲ

ತಾಲೂಕಿನ ಚೆನ್ನೈತ್ತೋಡಿ ಗ್ರಾಮ ಪಂಚಾಯಿತಿ ವ್ಯಾಪ್ತಿಯ ವಾಮದಪದವು ಪ್ರಮುಖ ಪೇಟೆಯಾಗಿದ್ದು ಪರಿಸರದ ಗ್ರಾಮಸ್ಥರು ತಮ್ಮ ಕೆಲಸ ಕಾರ್ಯಗಳಿಗೆ ಈ ಪೇಟೆಯನ್ನೇ ಅವಲಂಬಿಸಿದ್ದಾರೆ. ಇಲ್ಲಿನ ಸಮುದಾಯ ಆರೋಗ್ಯ ಕೇಂದ್ರ ಸುಸಜ್ಜಿತ ಕಟ್ಟಡವನ್ನು ಹೊಂದಿದ್ದರೂ ಪೂರ್ಣ ಪ್ರಮಾಣದ ಸಿಬ್ಬಂದಿ ಇಲ್ಲದೆ ಜನರು ಆರೋಗ್ಯ ಸೇವೆಯಿಂದ ವಂಚಿತರಾಗಿದ್ದಾರೆ.

ಚೆನ್ನೈತ್ತೋಡಿ ಗ್ರಾಮ ಪಂಚಾಯಿತಿ ವ್ಯಾಪ್ತಿಯ ಚೆನ್ನೈತ್ತೋಡಿ, ಕುಡಂಬೆಟ್ಟು, ಅಜ್ಜಿಬೆಟ್ಟು, ಪಿಲಿಮೊಗರು ಗ್ರಾಮಗಳ ಜತೆಗೆ ಪಕ್ಕದ ಇರ್ವತ್ತೂರು, ಮೂಡುಪಡುಕೋಡಿ, ಕುಕ್ಕಿಪಾಡಿ, ಎಲಿಯನಡುಗೋಡು, ಆರಂಬೋಡಿ ಗ್ರಾಮಗಳ ಜನರೂ ಈ ಸಮುದಾಯ ಆರೋಗ್ಯ ಕೇಂದ್ರವನ್ನೇ ಅವಲಂಬಿಸಿದ್ದಾರೆ. ದಿನಕ್ಕೆ 150ರಿಂದ 200 ರೋಗಿಗಳು ಚಿಕಿತ್ಸೆಗೆ ಬರುತ್ತಾರೆ. ಕಾಯಂ ವೈದ್ಯರು ಹಾಗೂ ಸ್ಟಾಫ್ ನರ್ಸ್ ಕೊರತೆಯಿಂದಾಗಿ ರೋಗಿಗಳಿಗೆ ಸಕಾಲದಲ್ಲಿ ಅಗತ್ಯ ಚಿಕಿತ್ಸೆ ನೀಡಲು ಸಮಸ್ಯೆಯಾಗಿದೆ.

ಬಂಟ್ವಾಳ ತಾಲೂಕು ಆಸ್ಪತ್ರೆ ಹೊರತುಪಡಿಸಿ ಸಮುದಾಯ ಆಸ್ಪತ್ರೆ ಇರುವುದು ವಾಮದಪದವಿನಲ್ಲಿ ಮಾತ್ರ. ಇವುಗಳ ನಡುವೆ ಬಹಳ ಅಂತರವಿರುವ ಕಾರಣ ವಾಮದಪದವು ಆರೋಗ್ಯ ಕೇಂದ್ರದವನ್ನು ಅಲ್ಲಿನವರು ಮಾತ್ರವಲ್ಲದೆ ಅಕ್ಕಪಕ್ಕದ ಊರುಗಳ ಜನರೂ ಅವಲಂಬಿಸಿದ್ದಾರೆ.

ಆಸ್ಪತ್ರೆಯಲ್ಲಿ ಈ ಹಿಂದೆ ವೈದ್ಯಾಧಿಕಾರಿಯಾಗಿದ್ದ ಡಾ.ದುರ್ಗಾಪ್ರಸಾದ್ ಆಸ್ಪತ್ರೆಯನ್ನು ಪರಿಸರ ಸ್ನೇಹಿಯಾಗಿ ಸುಂದರವಾಗಿಸುವಲ್ಲಿ ಶ್ರಮಿಸಿದ್ದರು. ಯಡಿಯೂರಪ್ಪ ಮುಖ್ಯಮಂತ್ರಿಯಾಗಿದ್ದಾಗ ಇಲ್ಲಿಗೆ ಭೇಟಿ ನೀಡಿ ವೀಕ್ಷಿಸಿ ರಾಜ್ಯಕ್ಕೆ ಮಾದರಿಯಾಗಿದೆ ಎಂದು ಶ್ಲಾಘಿಸಿದ್ದರು. ಇಂದಿಗೂ ಆಸ್ಪತ್ರೆಯ ಒಳಭಾಗ ಸುಸಜ್ಜಿತವಾಗಿದ್ದು, ಹೈಟೆಕ್ ಆಸ್ಪತ್ರೆಯಂತೆ ಕಾಣುತ್ತದೆ. ಆದರೆ ಅಗತ್ಯ ಸಿಬ್ಬಂದಿ ಇಲ್ಲದೆ ಸೌಲಭ್ಯ ದೊರಕದಂತಾಗಿದೆ.

ಮಳೆಗಾಲದಲ್ಲಿ ಡೆಂೆ ಜ್ವರ ಸಹಿತ ಇತರ ಸಾಂಕ್ರಾಮಿಕ ರೋಗಗಳು ಹರಡುವುದರಿಂದ ಆರೋಗ್ಯ ಸೇವೆ ಅಗತ್ಯ. ಗ್ರಾಮೀಣ ಪ್ರದೇಶವಾದುದರಿಂದ ಜನರು ಸರ್ಕಾರಿ ಆಸ್ಪತ್ರೆಯನ್ನೇ ಅವಲಂಬಿಸುತ್ತಾರೆ. ಆರೋಗ್ಯ ಕೇಂದ್ರಕ್ಕೆ ಪೂರ್ಣ ಪ್ರಮಾಣದ ವೈದ್ಯರು, ಸಿಬ್ಬಂದಿಯನ್ನು ನೇಮಕಗೊಳಿಸಿ ಬಡಜನರಿಗೆ ಆರೋಗ್ಯ ಸೇವೆ ಸಮರ್ಪಕವಾಗಿ ಸಿಗುವಂತೆ ಸಂಬಂಧಪಟ್ಟ ಇಲಾಖೆ ಕ್ರಮ ಕೈಗೊಳ್ಳಬೇಕು ಎಂದು ಗ್ರಾಮಸ್ಥರು ಆಗ್ರಹಿಸಿದ್ದಾರೆ.

ದಿನದ 24 ಗಂಟೆಯೂ ತೆರೆದಿರುವ 30 ಹಾಸಿಗೆಯ ಆಸ್ಪತ್ರೆಯಲ್ಲಿ ಅನೇಕ ಹುದ್ದೆಗಳು ಖಾಲಿಯಿವೆ. ನಾಲ್ಕು ವೈದ್ಯ ಹುದ್ದೆಗಳ ಪೈಕಿ ಒಬ್ಬರೇ ವೈದ್ಯರಿದ್ದು ಮೂರು ಹುದ್ದೆ ಖಾಲಿ ಇದೆ. ದಂತ ಚಿಕಿತ್ಸಕರು ಇದ್ದಾರೆ. ಉಳಿದಂತೆ ಸ್ತ್ರೀ ರೋಗ ತಜ್ಞರು, ಅರಿವಳಿಕೆ ತಜ್ಞರು, ಮಕ್ಕಳ ತಜ್ಞರು ಇಲ್ಲ. ಆರು ಶುಶ್ರೂಷಕ ಸಿಬ್ಬಂದಿ ಹುದ್ದೆಗಳ ಪೈಕಿ ಮೂರು ಖಾಲಿ ಇವೆ. ಇರುವ ಮೂವರು ಶಿಫ್ಟ್‌ನಲ್ಲಿ ಫಾರ್ಮಾಸಿಸ್ಟ್ ಕಾರ್ಯನಿರ್ವಹಿಸಬೇಕಾಗಿದೆ. ಒಬ್ಬರು ಆರೋಗ್ಯ ಸಹಾಯಕಿ ಹುದ್ದೆ ಖಾಲಿ ಇದೆ. ಫಾರ್ಮಾಸಿಸ್ಟ್, ಎಕ್ಸ್ ರೇ ತಜ್ಞರು ವರ್ಗಾವಣೆಗೊಂಡಿದ್ದಾರೆ. ಇಲ್ಲಿ ಪ್ರಯೋಗ ಶಾಲಾ ತಜ್ಞರಿದ್ದಾರೆ. ಸಾಧಾರಣ ರಕ್ತ ಪರೀಕ್ಷೆಗಳನ್ನು ನಡೆಸಲಾಗುತ್ತದೆ. 12 ಗ್ರೂಪ್ ಡಿ ನೌಕರರಲ್ಲಿ 8 ಮಂದಿಯಷ್ಟೇ ಹೊರಗುತ್ತಿಗೆ ಆಧಾರದಲ್ಲಿ ಕಾರ್ಯನಿರ್ವಹಿಸುತ್ತಿದ್ದಾರೆ.

ಇಷ್ಟೆಲ್ಲ ಕೊರತೆಗಳ ನಡುವೆಯೂ ಪ್ರತಿದಿನ 150ರಿಂದ 200 ರೋಗಿಗಳು ಇಲ್ಲಿ ಚಿಕಿತ್ಯೆ ಪಡೆಯುತ್ತಾರೆ. ಡಾ.ಉಮೇಶ್ ಅಡ್ಯಂತಾಯ ವೈದ್ಯಾಧಿಕಾರಿಯಾಗಿ ಕಾರ್ಯನಿರ್ವಹಿಸುತ್ತಿದ್ದಾರೆ. ಹೆರಿಗೆ, ಅಪಘಾತದಂತಹ ತುರ್ತು ಸಂದರ್ಭದಲ್ಲಿ ಬಂಟ್ವಾಳ ತಾಲೂಕು ಆಸ್ಪತ್ರೆಗೆ ಕಳುಹಿಸಲಾಗುತ್ತದೆ. ತಮ್ಮ ಇತಿಮಿತಿಯೊಳಗೆ ಇಲ್ಲಿನ ವೈದ್ಯರು, ಸಿಬ್ಬಂದಿ ರೋಗಿಗಳ ಬಗ್ಗೆ ವಹಿಸುವ ಕಾಳಜಿ ಮೆಚ್ಚುಗೆಗೆ ಪಾತ್ರವಾಗಿದೆ.