ಇನ್ನೂ ಸಿಕ್ಕಿಲ್ಲ ಪರ್ಯಾಯ ನಿವೇಶನ

ಕಲ್ಮಕಾರು ಗ್ರಾಮದ ಗುಳಿಕಾನ ಗುಡ್ಡದಲ್ಲಿ ಹಲವು ಮನೆಗಳಿದ್ದು 2018ರಲ್ಲಿ ಸುರಿದ ಭಾರಿ ಮಳೆಗೆ ಗುಡ್ಡ ಒಂದು ಮೀಟರ್‌ಗೂ ಅಧಿಕ ಅಗಲವಾಗಿ ಬಿರುಕು ಬಿಟ್ಟಿದ್ದು ಸುಮಾರು ಅರ್ಧ ಕಿ.ಮೀ.ದೂರದವರೆಗೆ ಹೀಗೆ ಭೂಮಿ ಬಾಯಿ ಬಿಟ್ಟಂತಿತ್ತು. ಹೀಗಾಗಿ ಈ ಜಾಗ ವಾಸಯೋಗ್ಯವಲ್ಲ ಎಂದು ಭೂ ವಿಜ್ಞಾನಿಗಳು ಅಭಿಪ್ರಾಯಪಟ್ಟು ಸರ್ಕಾರಕ್ಕೆ ವರದಿ ನೀಡಿದ್ದರು. ಆದರೆ ಇಲ್ಲಿ ವಾಸವಿದ್ದ ಜನರಿಗೆ ಪರ್ಯಾಯ ವ್ಯವಸ್ಥೆ ಇಲ್ಲದೆ ಅವರು ಸಂಕಷ್ಟಕ್ಕೀಡಾಗಿದ್ದಾರೆ. ಈ ವರ್ಷವಾದರೂ ಇಲ್ಲಿನ ಜನರಿಗೆ ಪರ್ಯಾಯ ವ್ಯವಸ್ಥೆ ಆಗಬಹುದೇ ಎಂದು ಜನ ಕಾಯುತ್ತಿದ್ದಾರೆ.

2018ರಲ್ಲಿ ಆಗಿನ ಕೆಲ ಅಧಿಕಾರಿಗಳು, ಜನಪ್ರತಿನಿಧಿಗಳ ಪ್ರಯತ್ನದಿಂದ ಪ್ರಕೃತಿ ವಿಕೋಪದಡಿ ಇಲ್ಲಿನ ನಿವಾಸಿಗಳಿಗೆ ಬೇರೆ ಕಡೆ ಸರ್ಕಾರಿ ಭೂಮಿ ಹುಡುಕಿ ಮನೆ ನಿವೇಶನಕ್ಕೆ ಸ್ಥಳ ನೀಡುವುದಾಗಿ ತಿಳಿಸಲಾಯಿತು. ಅದರಂತೆ ಮೊದಲು ಕಲ್ಮಕಾರಿನ ಪದ್ನಡ್ಕ ಎಂಬಲ್ಲಿ ಸರ್ಕಾರಿ ಜಾಗವಿದ್ದು ಅಲ್ಲಿ ಕೊಡುವುದಾಗಿ ನಿರ್ಧರಿಸಲಾಯಿತು. ಆದರೆ ಆ ಸ್ಥಳ ಅರಣ್ಯ ಪ್ರದೇಶವಾಗಿದ್ದು ಅದು ಅರಣ್ಯ ಇಲಾಖೆ ಸೇರಿರುವುದಾಗಿ ಅರಣ್ಯ ಇಲಾಖೆ ಆಕ್ಷೇಪ ಎತ್ತಿದ ಕಾರಣ ಆ ಸ್ಥಳದ ವಿಚಾರ ಕೈ ಬಿಡಲಾಯಿತು.

ಬಳಿಕ ಹೊಸದಾಗಿ ಪನ್ನೆಯ ಮಡಿವಾಳ ಪಡ್ಪು ಎಂಬಲ್ಲಿ ಸರ್ಕಾರಿ ಸ್ಥಳವಿದ್ದು ಅಲ್ಲಿ ಕೊಡುವುದಾಗಿ ನಿರ್ಧರಿಸಲಾಗಿ ಪ್ರಕ್ರಿಯೆ ಆರಂಭಿಸಲಾಯಿತು. ಅಲ್ಲಿಯೂ ಅರಣ್ಯ ಇಲಾಖೆ ಅದು ಭಾಗಶ ಅರಣ್ಯ ಬರುವುದಾಗಿ ಆಕ್ಷೇಪ ವ್ಯಕ್ತಪಡಿಸಿದ ಕಾರಣ ಗುಳಿಕಾನದವರಿಗೆ ನಿವೇಶನ ಕೊಡುವ ವಿಚಾರ ಹಳ್ಳ ಹಿಡಿಯಲಾರಂಬಿಸಿತು. ಆರಂಭದ ಕೆಲವು ಮಳೆಗಾಲದಲ್ಲಿ ತೀವ್ರ ಮಳೆಯಾದಾಗ ಗುಳಿಕಾನದವರಿಗೆ ಕಲ್ಮಕಾರು ಅಂಗನವಾಡಿಯಲ್ಲಿ ಪುನರ್ವಸತಿ ಒದಗಿಸಲಾಯಿತು. ಆದರೆ ಇತ್ತೀಚಿನ ಕೆಲ ವರ್ಷಗಳಿಂದ ಅದೂ ನಿಂತು ಹೋಗಿದೆ.

ಜಂಟಿ ಸರ್ವೇ: ಈ ಜಟಿಲ ಸಮಸ್ಯೆ ಸರಿಪಡಿಸಲು ಎರಡು ವರ್ಷಗಳ ಹಿಂದೆ ಮತ್ತೆ ಪನ್ನೆಯಲ್ಲಿ ಸರ್ಕಾರಿ ಸ್ಥಳ ನೀಡಲು ಯೋಜನೆ ಸಿದ್ಧವಾಯಿತು. ಬಳಿಕ ಈ ಜಾಗವನ್ನು ಕಂದಾಯ ಮತ್ತು ಅರಣ್ಯ ಇಲಾಖೆ ಸೇರಿ ಜಂಟಿ ಸರ್ವೇ ಮಾಡಿತು. ಬಳಿಕ ಅರಣ್ಯ, ಕಂದಾಯ ಭೂಮಿ ವಿಭಾಗ ಮಾಡಿ ಭೂಮಿ ಕೊಡುವ ವಿಚಾರದಲ್ಲಿಗೆ ಬಂದು ನಿಂತಿದೆ. ಇಲ್ಲಿ ಸುಮಾರು 50 ಸೆಂಟ್ಸ್ ಜಾಗವಿದ್ದು ಇದರ ಫೈಲ್ ಪ್ರಸ್ತುತ ಪುತ್ತೂರಿನ ಸಹಾಯಕ ಆಯುಕ್ತರ ಕಚೇರಿಯಲ್ಲಿದ್ದು ಸಣ್ಣ ತಿದ್ದುಪಡಿ ಆಗಿ ಬರಬೇಕಾಗಿದೆ. ಇದಾದರೆ ಬಳಿಕ ಭೂಮಿ ಗ್ರಾ.ಪಂ. ಒಡೆತನಕ್ಕೆ ಬಂದು ಬಳಿಕ ಮನೆ ನಿವೇಶನದಡಿಯಲ್ಲಿ ಗುಳಿಕಾನದವರಿಗೆ ಅಲ್ಪ ಜಾಗ ಸಿಗಲಿದೆ.

ಗುಳಿಕಾನದವರಿಗೆ ನಿವೇಶನ ನೀಡಿ ಮನೆ ಕಟ್ಟಿಕೊಳ್ಳಲು ತಲಾ 5 ಲಕ್ಷ ರೂ. ಹಣ ಸರ್ಕಾರದಿಂದ ಪ್ರಕೃತಿ ವಿಕೋಪದಡಿ ಅಂದು ಮುಂಜೂರಾಗಿತ್ತು. ಅಲ್ಲದೆ ಗುಳಿಕಾನದಲ್ಲಿ ತೊಂದರೆಗೊಳಗಾದ ಉಮೇಶ್, ಲೋಕಯ್ಯ, ಪೂವಮ್ಮ, ಬಾಲಪ್ಪ, ಅಂಗಾರ, ಪುಟ್ಟಣ್ಣ, ದೆಯ್ಯು, ಯಮುನಾ, ಬಾಬು, ಚನ್ನು ಇವರೆಲ್ಲರ ಅಕೌಂಟ್‌ಗೆ ಆರಂಭಿಕ ಮೊತ್ತ ಒಂದು ಲಕ್ಷ ರೂ. ಜಮೆಯೂ ಆಯಿತು. ಆದರೆ ಇದರಲ್ಲಿ ಉಮೇಶ್ ಎಂಬುವರು ಮನೆ ನಿವೇಶನಕ್ಕೆ ಕಾಯದೆ ತಮಗೆ ಕಲ್ಮಕಾರಿನಲ್ಲಿದ್ದ ಸ್ವಂತ ಜಮೀನಿನಲ್ಲಿ ಮನೆ ಕಟ್ಟಲಾರಂಬಿಸಿದರು. ಬಳಿಕ ಅವರಿಗೆ ಹಂತ-ಹಂತವಾಗಿ ಐದು ಲಕ್ಷ ರೂ. ಹಣ ಬಂದು ಅದನ್ನು ಬಳಸಿ ಮನೆ ಕಟ್ಟಿಕೊಂಡರು. ಆದರೆ 1 ಲಕ್ಷ ರೂ. ಅಕೌಂಟ್‌ಗೆ ಬಿದ್ದ ಉಳಿದವರು ಜಮೀನು ಇಲ್ಲದೆ, ಮನೆ ಕಟ್ಟಿಕೊಳ್ಳಲು ಆರಂಭಿಸದ ಕಾರಣ ಹಣ ಅಕೌಂಟ್‌ನಿಂದ ತೆಗೆಯಲಾಗಿಲ್ಲ. ಇಂದಿಗೂ ಹಣ ಅಕೌಂಟ್‌ನಲ್ಲೇ ಇರುವುದಾಗಿ ತಿಳಿದು ಬಂದಿದೆ.