ಕೃಷಿ ಚಟುವಟಿಕೆಗೀಗ ಹುರುಪು

ಮುಂಗಾರು ನಿಧಾನಕ್ಕೆ ಆರಂಭಗೊಂಡಿದ್ದು, ಮತ್ತೊಂದೆಡೆ ಕುಂದಾಪುರ ಭಾಗದ ರೈತರು ಮುಂಗಾರು ಹಂಗಾಮಿನ ಕೃಷಿ ಕಾರ್ಯ ಶುರು ವಾಡಿದ್ದಾರೆ. ಕಳೆದ ಒಂದೆರಡು ದಿನಗಳಿಂದ ಬೀಜ ಬಿತ್ತನೆ ಕಾರ್ಯ ಆರಂಭಿಸಿದ್ದಾರೆ. ಅವಿಭಜಿತ ಕುಂದಾಪುರ ತಾಲೂಕಿನಲ್ಲಿ ಈ ಬಾರಿ ಒಟ್ಟಾರೆ 12,868 ಹೆಕ್ಟೇರ್ ಪ್ರದೇಶದಲ್ಲಿ ಭತ್ತ ನಾಟಿ ಗುರಿ ಹೊಂದಲಾಗಿದೆ.

ಕಳೆದ ವರ್ಷ ಕುಂದಾಪುರ ಹಾಗೂ ಬೈಂದೂರು ತಾಲೂಕಿನಲ್ಲಿ ಒಟ್ಟು ಸೇರಿಸಿ 13,100 ಹೆಕ್ಟೇರ್ ಪ್ರದೇಶದಲ್ಲಿ ನಾಟಿ ವಾಡಲಾಗಿತ್ತು. ಆದರೆ ಈ ಬಾರಿ ಕುಂದಾಪುರ ಹೋಬಳಿಯಲ್ಲಿದ್ದ ಹೆಬ್ರಿ ತಾಲೂಕಿನ ಬೆಳ್ವೆ, ಮಡಾಮಕ್ಕಿ, ಶೇಡಿಮನೆ ಹಾಗೂ ಅಲ್ಬಾಡಿ ಗ್ರಾಮಗಳನ್ನು ಕಾರ್ಕಳಕ್ಕೆ ಸೇರಿಸಿದ್ದರಿಂದ ಅವಿಭಜಿತ ಕುಂದಾಪುರ ತಾಲೂಕಿನಲ್ಲಿ 232 ಹೆಕ್ಟೇರ್ ಪ್ರದೇಶ ಕಡಿಮೆಯಾದಂತಾಗಿದೆ. ಬೈಂದೂರು ಹೋಬಳಿಯಲ್ಲಿ 4,192 ಹೆಕ್ಟೇರ್ ಪ್ರದೇಶ, ವಂಡ್ಸೆ ಹೋಬಳಿಯಲ್ಲಿ 4,076 ಹೆಕ್ಟೇರ್ ಪ್ರದೇಶ ಹಾಗೂ ಕುಂದಾಪುರ ಹೋಬಳಿಯಲ್ಲಿ 4,600 ಸೇರಿದಂತೆ ಒಟ್ಟಾರೆ 12,868 ಹೆಕ್ಟೇರ್ ಪ್ರದೇಶದಲ್ಲಿ ನಾಟಿ ಕಾರ್ಯದ ಗುರಿಯನ್ನು ಕೃಷಿ ಇಲಾಖೆ ಹಾಕಿಕೊಂಡಿದೆ.

ಕುಂದಾಪುರ ಹಾಗೂ ಬೈಂದೂರು ತಾಲೂಕುಗಳ ರೈತ ಸೇವಾ ಕೇಂದ್ರಗಳಿಗೆ ಒಟ್ಟು 695 ಕ್ವಿಂಟಾಲ್ ಬಿತ್ತನೆ ಬೀಜ ಪೂರೈಕೆಯಾಗಿದ್ದು, ಈ ಪೈಕಿ ಈಗಾಗಲೇ 585 ಕ್ವಿಂಟಾಲ್ ಎಂಒ4 ಬಿತ್ತನೆ ಬೀಜವನ್ನು ರೈತರಿಗೆ ವಿತರಿಸಲಾಗಿದೆ. ಇನ್ನು 110 ಕ್ವಿಂಟಾಲ್ ದಾಸ್ತಾನು ಇದ್ದು, ಇನ್ನು ಜಿಲ್ಲೆಗೆ ಬೀಜ ಪೂರೈಸುವ ಶಿವಮೊಗ್ಗದಲ್ಲಿ 4 ಸಾವಿರಕ್ಕೂ ಮಿಕ್ಕಿ ಬೀಜ ದಾಸ್ತಾನಿದೆ. ಅಗತ್ಯವಿದ್ದರೆ ಅಥವಾ ಬೇಡಿಕೆಯಿದ್ದರೆ ತರಿಸಿ, ವಿತರಿಸಲಾಗುವುದು ಎಂದು ಕೃಷಿ ಇಲಾಖೆ ಅಧಿಕಾರಿಗಳು ತಿಳಿಸಿದ್ದಾರೆ.

ಇತ್ತೀಚಿನ ವರ್ಷಗಳಲ್ಲಿ ಯಂತ್ರ ನಾಟಿ ಎಲ್ಲ ಕಡೆಗಳಲ್ಲಿ ಹೆಚ್ಚಾಗುತ್ತಿದೆ. ರೈತರು ಕೂಡ ಯಾಂತ್ರಿಕೃತ ಕೃಷಿಗೆ ಹೆಚ್ಚಿನ ಆಸಕ್ತಿ ವಹಿಸುತ್ತಿದ್ದಾರೆ. ಉಭಯ ತಾಲೂಕುಗಳಲ್ಲಿ ಒಟ್ಟಾರೆ 63 ಹೆಕ್ಟೇರ್ ಅಂದರೆ 163 ಎಕರೆ ಪ್ರದೇಶದಲ್ಲಿ ಯಂತ್ರ ನಾಟಿ ಗುರಿಯನ್ನು ಕೃಷಿ ಇಲಾಖೆ ಹಾಕಿಕೊಂಡಿದೆ. ಈ ಪೈಕಿ ಬೈಂದೂರು ಹೋಬಳಿಯಲ್ಲಿ 23 ಹೆಕ್ಟೇರ್, ವಂಡ್ಸೆ ಹೋಬಳಿಯಲ್ಲಿ 21 ಹೆಕ್ಟೇರ್ ಹಾಗೂ ಕುಂದಾಪುರ ಹೋಬಳಿಯಲ್ಲಿ 21 ಹೆಕ್ಟೇರ್ ಪ್ರದೇಶದಲ್ಲಿ ಯಂತ್ರ ನಾಟಿ ನಡೆಯಲಿದೆ. ಇನ್ನು ವಿವಿಧೆಡೆ ಕೃಷಿ ಇಲಾಖೆಯಿಂದ ಯಾಂತ್ರಿಕೃತ ಕೃಷಿ ಬಗ್ಗೆ ಪ್ರಾತ್ಯಕ್ಷಿಕೆ ಕಾರ್ಯಕ್ರಮವನ್ನು ಇಲಾಖೆ ಹಮ್ಮಿಕೊಂಡಿದೆ.

ಎನ್.ಆರ್.ಎಲ್.ಎಂ., ಕೃಷಿ ಯಂತ್ರಧಾರೆ, ಶ್ರೀ ಕ್ಷೇತ್ರ ಧರ್ಮಸ್ಥಳ ಗ್ರಾವಾಭಿವೃದ್ಧಿ ಯೋಜನೆ ಸಹಿತ ವಿವಿಧ ಸಂ-ಸಂಸ್ಥೆಗಳು, ಸಂಜೀವಿನಿ ಸಂ ಸಹಿತ ಅವಿಭಜಿತ ಕುಂದಾಪುರ ತಾಲೂಕಿನಲ್ಲಿ ಈ ಬಾರಿ 800ರಿಂದ 1 ಸಾವಿರ ಎಕರೆಯವರೆಗಿನ ಹಡಿಲು ಬಿದ್ದ ಭೂಮಿಗಳಲ್ಲಿ ಮತ್ತೆ ಬಿತ್ತನೆ ಕಾರ್ಯ ನಡೆಯಲಿದೆ ಎನ್ನಲಾಗಿದೆ.

ಈಗಾಗಾಲೇ ಎಲ್ಲ ರೈತ ಸೇವಾ ಕೇಂದ್ರಗಳ ಮೂಲಕ ರೈತರಿಗೆ ಬಿತ್ತನೆ ಬೀಜ ವಿತರಿಸಲಾಗಿದೆ. ಬೇಕಾದಷ್ಟು ದಾಸ್ತಾನಿದೆ. ಕೊರತೆಯಿದ್ದರೆ ತರಿಸಿಕೊಡಲಾಗುವುದು. ಈ ಬಾರಿ ಯಾಂತ್ರಿಕೃತ ಕೃಷಿ ಪ್ರಾತ್ಯಕ್ಷಿಕೆ ನೀಡುವ ಕಾರ್ಯಕ್ರಮ ಹಾಕಿಕೊಳ್ಳಲಾಗಿದೆ. ಮಳೆ ಈಗಷ್ಟೇ ಆರಂಭಗೊಂಡಿದೆ. ಬಿತ್ತನೆ ಕಾರ್ಯವೂ ಶುರುವಾಗಿದೆ.

— ಸತೀಶ್, ಪ್ರಭಾರ ಸಹಾಯಕ ನಿರ್ದೇಶಕ, ಕುಂದಾಪುರ ಕೃಷಿ ಇಲಾಖೆ