ದೇವರ ನಿರ್ಮಾಲ್ಯ ಹೂ ಉಡುಪಿ ಸುಗಂಧ

ಉಡುಪಿ: ಜಿಲ್ಲೆಯ ವಿವಿಧ ಪ್ರಸಿದ್ಧ ಧಾರ್ಮಿಕ ಕ್ಷೇತ್ರಗಳಲ್ಲಿ ದಿನನಿತ್ಯ ದೇವರಿಗೆ ಅರ್ಪಿಸಿ, ನಂತರ ತ್ಯಾಜ್ಯವಾಗಿ ಹರಿದುಹೋಗುತ್ತಿದ್ದ ನಿಮಾರ್ಲ್ಯ ಹೂವುಗಳಿಗೆ ವೈಜ್ಞಾನಿಕ ಮರುಬಳಕೆ ಸ್ಪರ್ಶ ನೀಡುವ ಮೂಲಕ ಪರಿಮಳಯುಕ್ತ 'ಉಡುಪಿ ಸುಗಂಧ' ಅಗರಬತ್ತಿ ಹಾಗೂ ಧೂಪದ ಸ್ಟಿಕ್​ಗಳನ್ನು ತಯಾರಿಸುವ ನೂತನ ಪರಿಸರಸ್ನೇಹಿ ಯೋಜನೆಗೆ ಜಿಲ್ಲಾಡಳಿತ ಮುಂದಾಗಿದೆ.

ಧಾರ್ಮಿಕ ದತ್ತಿ ಇಲಾಖೆಯ ವ್ಯಾಪ್ತಿಗೆ ಒಳಪಡುವ ಕೊಲ್ಲೂರು ಶ್ರೀ ಮೂಕಾಂಬಿಕಾ ದೇವಾಲಯ, ಆನೆಗುಡ್ಡೆ ಶ್ರೀ ವಿನಾಯಕ ದೇವಾಲಯ, ಕಮಲಶಿಲೆ ಶ್ರೀ ಬ್ರಾಹ್ಮಿ ದುರ್ಗಾಪರಮೇಶ್ವರಿ ದೇವಾಲಯ ಸೇರಿದಂತೆ ಒಟ್ಟು 78 ಪ್ರಮುಖ ಧಾರ್ಮಿಕ ಕ್ಷೇತ್ರಗಳನ್ನು ಈ ಯೋಜನೆಗಾಗಿ ಗುರುತಿಸಲಾಗಿದೆ.

ಈ ಕ್ಷೇತ್ರಗಳಲ್ಲಿ ದಿನನಿತ್ಯ ದೇವರಿಗೆ ಅರ್ಪಿಸಲಾಗುವ ಸೇವಂತಿಕೆ, ಕಾಕಡ, ಗುಲಾಬಿ ಸೇರಿದಂತೆ ವಿವಿಧ ಹೂವುಗಳನ್ನು (ಹಿಂಗಾರ ಹೊರತುಪಡಿಸಿ) ಪ್ರತ್ಯೇಕ ಪ್ಲಾಸ್ಟಿಕ್​ ಬಾಕ್ಸ್​ಗಳಲ್ಲಿ ಸಂಗ್ರಹಿಸಲಾಗುತ್ತದೆ. ಹೀಗೆ ಸಂಗ್ರಹವಾದ ಹೂವುಗಳನ್ನು ಪ್ರತಿದಿನ ನಿಯಮಿತವಾಗಿ ಸ್ವೀಕರಿಸಿ, ಅಗರಬತ್ತಿ ನಿರ್ಮಾಣ ಟಕಕ್ಕೆ ಸಾಗಿಸಲಾಗುತ್ತದೆ.

ಬೈಂದೂರು ತಾಲೂಕಿನ ಕಿರಿಮಂಜೇಶ್ವರ ಗ್ರಾಮ ಅರೆಹೊಳೆ ಕ್ರಾಸ್​ನಲ್ಲಿ ಬಾಡಿಗೆ ಕಟ್ಟಡದಲ್ಲಿ ಮುಖ್ಯ ಉತ್ಪಾದನಾ ಘಟಕವನ್ನು ಸ್ಥಾಪಿಸಲಾಗಿದೆ. ಉದ್ಯಮಿಗಳ ಸಹಕಾರದಿಂದ ಪ್ರಮುಖ ಯಂತ್ರೋಪಕರಣಗಳನ್ನು ಒದಗಿಸಲಾಗಿದೆ.

ಪಚ್ಚೆ ಕದೀರು, ನೈಸರ್ಗಿಕ ಗುಲಾಬಿ ಹಾಗೂ ಕರಾವಳಿಯ ಪ್ರಸಿದ್ಧ ಸೇವಂತಿಕೆ ಹೂವಿನ ಆಧಾರಿತ 3 ವಿಭಿನ್ನ ಹಾಗೂ ಮನಮೋಹಕ ಸುವಾಸನೆಯ ಅಗರಬತ್ತಿಗಳನ್ನು ಯಾವುದೇ ಕೃತಕ ಅಪಾಯಕಾರಿ ರಾಸಾಯನಿಕಗಳನ್ನು ಬಳಸದೆ, ಸಂಪೂರ್ಣ ನೈಸರ್ಗಿಕ ಮೂಲಿಕೆಗಳು ಹಾಗೂ ಒಣಗಿಸಿದ ಹೂವಿನ ಪೌಡರ್​ ಬಳಸಿ ಸಿದ್ಧಪಡಿಸಲಾಗುತ್ತದೆ. ಈ ಅಗರಬತ್ತಿಗಳನ್ನು ಹಚ್ಚಿದಾಗ ಕಣ್ಣು ಉರಿ ಅಥವಾ ಉಸಿರಾಟದ ತೊಂದರೆ ಉಂಟಾಗುವುದಿಲ್ಲ.

ಕಿರಿಮಂಜೇಶ್ವರದ ಸಂಜೀವಿನಿ ಒಕ್ಕೂಟದ ಸ್ವಸಹಾಯ ಗುಂಪಿನ 27 ಗ್ರಾಮೀಣ ಮಹಿಳೆಯರಿಗೆ ಅಗರಬತ್ತಿ ತಯಾರಿಕೆ, ಟಕ ಕಾರ್ಯನಿರ್ವಹಣೆ ಹಾಗೂ ಮಾರುಕಟ್ಟೆ ನಿರ್ವಹಣೆ ಬಗ್ಗೆ ಬ್ರಹ್ಮಾವರ ರುಡ್​ಸೆಟ್​ ಸಂಸ್ಥೆಯ ವತಿಯಿಂದ 12 ದಿನಗಳ ಕಾಲ ಪೂರ್ಣಪ್ರಮಾಣದ ಪ್ರಾಯೋಗಿಕ ತರಬೇತಿ ನೀಡಲಾಗಿದೆ. 7 ರಿಂದ 8 ಮಹಿಳೆಯರು ಮುಖ್ಯ ಘಟಕದಲ್ಲಿದ್ದುಕೊಂಡು ಹೂವುಗಳನ್ನು ಡ್ರೈಯರ್​ನಲ್ಲಿ ಒಣಗಿಸುವುದು, ಪೌಡರ್​ ಮಾಡುವುದು ಹಾಗೂ ಕಚ್ಚಾ ವಸ್ತು ಸಂಸ್ಕರಣಾ ಕಾರ್ಯ ನಿರ್ವಹಿಸಲಿದ್ದಾರೆ. ಉಳಿದ ಮಹಿಳೆಯರು ಅಗತ್ಯ ಕಚ್ಚಾ ವಸ್ತುಗಳನ್ನು ಪಡೆದು ತಮ್ಮ ಮನೆಗಳಲ್ಲೇ ಅಗರಬತ್ತಿಗಳನ್ನು ತಯಾರಿಸಿ ಘಟಕಕ್ಕೆ ತಂದುಕೊಡುವ ಗೃಹ-ಆಧಾರಿತ ಉದ್ಯೋಗ ಮಾದರಿಯನ್ನು ರೂಪಿಸಲಾಗಿದೆ. ತಯಾರಾದ ಉತ್ಪನ್ನಗಳನ್ನು 'ಉಡುಪಿ ಸುಗಂಧ' ಬ್ರ್ಯಾಂಡ್​ ಹೆಸರಿನಲ್ಲಿ ಪ್ರಸಿದ್ಧ ಧಾರ್ಮಿಕ ಉತ್ಸವಗಳು, ಜಾತ್ರೆಗಳು, ದೇವಸ್ಥಾನಗಳ ಮುಂಭಾಗದ ವಿಶೇಷ ಸ್ಟಾಲ್​ಗಳ ಮೂಲಕ ನೇರವಾಗಿ ಗ್ರಾಹಕರಿಗೆ ಮಾರಾಟ ಮಾಡಲು ಯೋಜನೆ ರೂಪಿಸಲಾಗಿದೆ.

"