ಉಡುಪಿ: ಆಭರಣಗಳಲ್ಲಿ ಇರುವ ಡಿಸೈನ್​ಗಳಂತೆ ಮಹಿಳೆಯರ ಜೀವನವೂ ಸಹ ಒಂದೊಂದು ರೀತಿಯಲ್ಲಿ ಡಿಸೈನ್​ ಆಗಿದೆ. ನವದುರ್ಗೆಯರ ಪ್ರಕಾರದಲ್ಲೇ ಹೆಣ್ಣಿನ ಜೀವನ ಸಾಗುತ್ತದೆ. ಆಭರಣವೆಂದರೆ ಮಹಿಳೆಯರಿಗೆ ಅಚ್ಚುಮೆಚ್ಚು. ಅದರಿಂದ ದೇಹದಲ್ಲಿ ಚೈತನ್ಯ, ಹೆಣ್ಣಿನ ಅನೇಕ ಭಾವನೆಗಳಿಗೆ ಆಸರೆಯಾಗುತ್ತದೆ. ಆಭರಣವೆಂದರೆ ಕೇವಲ ಅಲಂಕಾರವಲ್ಲ. ಅದು ಸಂಸ್ಕಾರ ಹಾಗೂ ಸಂಸ್ಕೃತಿಯ ಪ್ರತೀಕ ಎಂದು ನಟಿ, ಕಲಾವಿದೆ ಅಂಕಿತಾ ಅಮರ್​ ಅಭಿಮತ ವ್ಯಕ್ತಪಡಿಸಿದರು.

ಉಡುಪಿಯ 'ಆಭರಣ' ಸಂಸ್ಥೆ ವತಿಯಿಂದ ವಿಶ್ವ ಮಹಿಳಾ ದಿನಾಚಣೆ ನಿಮಿತ್ತ ಉಡುಪಿಯ ಹೋಟೆಲ್​ ಮಣಿಪಾಲ್​ ಇನ್​ ಸಭಾಂಗಣದಲ್ಲಿ ಶನಿವಾರ (ಮಾ.7) ರಾತ್ರಿ ಆಯೋಜಿಸಿದ್ದ 'ಆಭರಣ ಸುಂದರಿ' ಫ್ಯಾಶನ್​ ಶೋ ಕಾರ್ಯಕ್ರಮ ಉದ್ಘಾಟಿಸಿ, 'ಗೋವಿಂದ ಜಯ ಜಯ ಗೋಪಾಲ ಜಯ ಜಯ' ಸಂಗೀತದ ಹಿನ್ನೆಲೆಯಲ್ಲಿ ರ್ಯಾಂಪ್​ ವಾಕ್​ ಮಾಡಿ ಫ್ಯಾಷನ್​​ ಶೋಗೆ ಚಾಲನೆ ನೀಡಿ ಮಾತನಾಡಿದರು. 'ನಮ್ಮಿಂದ ನೀವು, ನಿಮ್ಮಿಂದ ನಾವು' ಎನ್ನುವುದೇ ಮಹಿಳಾ ದಿನಾಚರಣೆಯ ಘೋಷಣೆಯಾಗಲಿ ಎಂದರು.

ಆಭರಣ ಸಂಸ್ಥೆಯ ಸಂಧ್ಯಾ ಕಾಮತ್​ ಮಾತನಾಡಿ, ಇಲ್ಲಿ ಸೇರಿರುವವರೆಲ್ಲರೂ ನಮ್ಮ ಒಡನಾಡಿಗಳಷ್ಟೇ ಅಲ್ಲ. ಒಡಹುಟ್ಟಿದವರು. ಅಕ್ಕರೆಯ ಒಡವೆಗಳಂತೆ ಪ್ರೀತಿಪಾತ್ರರು. ಒಡವೆ, ಉಡುಗೆ, ತೊಡುಗೆಯಿಂದ ಬದುಕು ಸಂತಸ. ಅವುಗಳ ಸಮನ್ವಯದ ನಡಿಗೆ, 'ಮೌನವೇ ಆಭರಣ, ಮುಗುಳ್ನಗೆಯೇ ಶಶಿಕಿರಣ' ಎಂಬ ಹಾಡಿನ ತದ್ರೂಪವೇ ಇಂದಿನ 'ಆಭರಣ ಸುಂದರಿ' ಫ್ಯಾಷನ್​​ ಶೋ ಆಗಿದೆ ಎಂದರು. 

ವೇದಿಕೆಯಲ್ಲಿ ಆಭರಣ ಸಂಸ್ಥೆಯ ಸುಭಾಷ್​ ಕಾಮತ್​, ಮಹೇಶ್​ ಕಾಮತ್​, ವೀಣಾ ಕಾಮತ್​, ಶ್ಲೋಕಾ ಕಾಮತ್​, ಮಹಾಲಸಾ, ಮೀನಾ ಅಡ್ಯಂತಾಯ, ಅಶ್ವಿತಾ ಶೆಟ್ಟಿ ಉಪಸ್ಥಿತರಿದ್ದರು. 

 ಶಾಸಕ ಯಶ್​ಪಾಲ್​ ಸುವರ್ಣ, ಎಸ್ಪಿ ಹರಿರಾಂ ಶಂಕರ್​, ಜಿಪಂ ಸಿಇಒ ಪ್ರತೀಕ್​ ಬಾಯಲ್​, ಉದ್ಯಮಿಗಳಾದ ಪುರುಷೋತ್ತಮ್​ ಶೆಟ್ಟಿ, ಪ್ರಸಾದ್​ ರಾಜ್​ ಕಾಂಚನ್​,  ದೇವಿಪ್ರಸಾದ್​ ಶೆಟ್ಟಿ, ಅಶೋಕ್​ ಗಾಯತ್ರಿ ಪೈ, ಡಾ.ಕಿರಣ್​ ಆಚಾರ್ಯ, ಶಾಲಿನಿ ಜಿ. ಶಂಕರ್​, ಡಾ.ರೋಷನ್​ ಶೆಟ್ಟಿ ಅವರನ್ನು ಗೌರವಿಸಲಾಯಿತು. 

ಖ್ಯಾತ ನಿರೂಪಕಿ ಶಮೀರಾ ಬೆಳುವಾಯಿ ಕಾರ್ಯಕ್ರಮ ನಿರ್ವಹಿಸಿದರು. 

ಖ್ಯಾತ ಗಾಯಕಿ ಕಾವ್ಯಾ ಅಜಿತ್​ ಹಾಗೂ ಪ್ರೀಶಿಯಸ್​ ಪೀಟರ್​ ಅವರ ವಾದ್ಯಗಳ ಸಂಗೀತದ ತಾಳಕ್ಕೆ ಹಲವಾರು ಬೆಡಗಿಯರು ಹೆಜ್ಜೆ ಹಾಕಿದರು. ಸಾಂಪ್ರದಾಯಿಕ ತೊಡುಗೆ, ಆಭರಣ ಧರಿಸಿ ಕಂಗೊಳಿಸಿದರು. ವಿವಿಧ ವಿನ್ಯಾಸದ ಬಟ್ಟೆ-ಬರೆ ಸೀರೆ ತೊಟ್ಟಿದ್ದ ಚೆಲುವೆಯರೊಂದಿಗೆ ಆಭರಣ ಸಂಸ್ಥೆಯ ಸಂಧ್ಯಾ ಕಾಮತ್​ ಕೂಡ ಹೆಜ್ಜೆ ಹಾಕಿದರು. ಬೆಂಗಳೂರಿನ ಮಾಡೆಲ್ಸ್​ಗಳು ಚಿನ್ನ-ವಜ್ರಾಭರಣ ಧರಿಸಿ ನಸು ನಗುತ್ತ, ಸೊಂಟ ಬಳುಕಿಸುತ್ತ ಹೆಜ್ಜೆ ಹಾಕಿದರು. ಆಯ್ದ 17 ಗ್ರಾಹಕ ಮಹಿಳೆಯರು ಉಡುಪಿ ಸೀರೆ, ಶಂಕರಪುರ ಮಲ್ಲಿಗೆ ತೊಟ್ಟು ಬೆಳ್ಳಿ ಆಭರಣ ಧರಿಸಿ ರ್ಯಾಂಪ್​ ವಾಕ್​ ಮಾಡಿ ಗಮನ ಸೆಳೆದರು.