ಉಡುಪಿ ನಗರದಲ್ಲಿ ಅತ್ಯಂತ ಜನನಿಬಿಡ ಹಾಗೂ ಹೆಚ್ಚಿನ ವಾಹನ ಸಂಚಾರ ಇರುವ ಕಲ್ಸಂಕದಲ್ಲಿ ಆಗುತ್ತಿರುವ ಸಮಸ್ಯೆ ಕುರಿತು ವಿಜಯವಾಣಿ ಆಗಾಗ ವಿಶೇಷ ವರದಿಗಳ ಮೂಲಕ ಆಡಳಿತದ ಗಮನಕ್ಕೆ ತಂದಿತ್ತು. ಸಂಚಾರ ದಟ್ಟಣೆ ನಿಯಂತ್ರಣಕ್ಕಾಗಿ ಹಿಂದಿನ ಎಸ್ಪಿ ಅರುಣಕುಮಾರ್ ಅವರು ಕಲ್ಸಂಕ ವೃತ್ತದಲ್ಲಿ ಎರಡು ದಿಕ್ಕುಗಳಿಗೆ ಬ್ಯಾರಿಕೇಡ್ ಅಳವಡಿಸಿದ್ದರು. ಅದರಿಂದ ಮತ್ತಷ್ಟು ವಾಹನ ದಟ್ಟಣೆ ಹೆಚ್ಚಿತ್ತು. 2024ರ ಡಿ.27ರಂದು ಉಡುಪಿ ಕಲ್ಸಂಕ ವೃತ್ತಕ್ಕೆ ಖಾಕಿ ಬೇಲಿ ಎಂಬ ವರದಿ ಮೂಲಕ ವಾಹನ ಸವಾರರಿಗೆ ಆಗುತ್ತಿರುವ ತೊಂದರೆ ವಿವರಿಸಲಾಗಿತ್ತು. ಬಳಿಕ ಶನಿವಾರ ಮತ್ತು ಭಾನುವಾರ ಮಾತ್ರ ಕಲ್ಸಂಕದಲ್ಲಿ ಪೊಲೀಸರು ಬ್ಯಾರಿಕೇಡ್ ಅಳವಡಿಸುತ್ತಿದ್ದುದರಿಂದ ವಾರದಲ್ಲಿ ಎರಡು ದಿನ ಸುಗಮ ಪ್ರಯಾಣಕ್ಕೆ ತೊಂದರೆ ಆಗುತ್ತಿತ್ತು. ಹೀಗಾಗಿ ಇಲ್ಲಿ ಸಿಗ್ನಲ್ ಲೈಟ್ ಅಳವಡಿಸುವಂತೆ ನಗರಸಭೆಗೆ ಎಸ್ಪಿ ಪತ್ರ ಬರೆದಿದ್ದರು. ಆದರೆ, ಪತ್ರ ಬರೆದು 9 ತಿಂಗಳಾದರೂ ಸಹ ಯಾವುದೇ ಕ್ರಮ ಕೈಗೊಳ್ಳದ್ದರಿಂದ 2025ರ ಅ.14ರಂದು ಇನ್ನೂ ಹುಟ್ಟದ ಸಿಗ್ನಲ್ ಕೂಸು ಎಂಬ ಶೀರ್ಷಿಕೆಯಡಿ ವಿಶೇಷ ವರದಿ ಮೂಲಕ ಗಮನ ಸೆಳೆಯಲಾಗಿತ್ತು. ನಗರಸಭೆಯ ಸಾಮಾನ್ಯ ಸಭೆಯಲ್ಲೂ ಈ ವರದಿ ಚರ್ಚೆಯಾಗಿತ್ತು. ಇದೀಗ ಕಲ್ಸಂಕಕ್ಕೆ ಲೈಟ್ ಅಳವಡಿಕೆ ಮಾಡಿದ್ದು, ಸಿಗ್ನಲ್ ಕೂಸು ಹುಟ್ಟಿದಂತಾಗಿದೆ.
