ಲೋಕಾರ್ಪಣೆಯಾಗದ ಕಿರು ಸೇತುವೆ

ಉಳಾಯಿಬೆಟ್ಟು ಗ್ರಾಪಂ ವ್ಯಾಪ್ತಿಯ ಉಳಾಯಿಬೆಟ್ಟು ಸಾಲೆ ಮೇಲ್ಮೆನೆ ಎಂಬಲ್ಲಿ ಲ್ಗುಣಿ ನದಿಯ ತೊರೆಗೆ 5 ಕೋಟಿ ರೂ. ವೆಚ್ಚದಲ್ಲಿ ನಿರ್ಮಿಸುತ್ತಿರುವ ಕಿರುಸೇತುವೆ ಲೋಕಾರ್ಪಣೆ ವಿಳಂಬದಿಂದ ಉಳಾಯಿಬೆಟ್ಟು-ಪೆರ್ಮಂಕಿ ಮೂಲಕ ಮಂಗಳೂರಿಗೆ ಅಥವಾ ಮಲ್ಲೂರು-ಬೆಂಜನಪದವು ಆಗಿ ಬಿ.ಸಿ.ರೋಡ್‌ನತ್ತ ಸಾಗುವ ಪ್ರಯಾಣಿಕರು ತೊಂದರೆ ಅನುಭವಿಸುವಂತಾಗಿದೆ.

2024ರಲ್ಲಿ ದ.ಕ. ಜಿಲ್ಲಾಧಿಕಾರಿ ಆದೇಶದಂತೆ ಜಿಲ್ಲೆ ಶಿಥಿಲಗೊಂಡಿದೆ ಎನ್ನಲಾದ ಪರಾರಿ-ಉಳಾಯಿಬೆಟ್ಟು, ಅಡ್ಡೂರು-ಪೊಳಲಿ ಸೇತುವೆಯಲ್ಲಿ ವಾಹನ ಸಂಚಾರ ಸ್ಥಗಿತಗೊಳಿಸಲಾಗಿತ್ತು. ಪೊಳಲಿ ಸೇತುವೆಯಲ್ಲಿ ಒಂದಷ್ಟು ಸಮಯ ಪ್ಯಾಚ್‌ವರ್ಕ್ ಕಾಮಗಾರಿ ನಡೆದ ಬಳಿಕ ಸೇತುವೆ ಮುಕ್ತಗೊಂಡಿದ್ದರೆ, ಉಳಾಯಿಬೆಟ್ಟು-ಪರಾರಿ ಕಿರು ಸೇತುವೆಯಲ್ಲಿ ಯಾವುದೇ ಕಾಮಗಾರಿ ನಡೆಯದೆ ವಾಹನ ಸಂಚಾರಕ್ಕೆ ಮುಕ್ತಗೊಳಿಸಲಾಗಿತ್ತು. ಇದಾದ ಕೆಲವು ಸಮಯದ ಮೇಲೆ ಇಲ್ಲಿ ಲೋಕೋಪಯೋಗಿ ಇಲಾಖೆ, ಭಂಡಾರ್ಕರ್ ಕನ್‌ಸ್ಟ್ರಕ್ಷನ್ ಕಂಪನಿ ಮೂಲಕ ಹೊಸ ಕಿರುಸೇತುವೆ ನಿರ್ಮಾಣಕ್ಕೆ ಚಾಲನೆ ನೀಡಿತ್ತು.

ಪ್ರಸಕ್ತ ಮಳೆಗಾಲಕ್ಕೆ ಮುಂಚೆ ಸೇತುವೆ ನಿರ್ಮಾಣವಾಗಬೇಕಿತ್ತು. ಸೇತುವೆ ನಿರ್ಮಾಣದ ಸಂದರ್ಭ ವಾಹನ ಸಂಚಾರಕ್ಕೆ ಅನುಕೂಲವಾಗುವಂತೆ ಸ್ಥಳೀಯ ಗದ್ದೆ ಪ್ರದೇಶದಲ್ಲಿ ತಾತ್ಕಾಲಿಕ ಮಣ್ಣಿನ ರಸ್ತೆ ನಿರ್ಮಿಸಲಾಗಿತ್ತು. ಇದರಲ್ಲಿ ಸರ್ಕಾರಿ ಬಸ್ ಸಹಿತ ಇತರ ವಾಹನಗಳು ಸಂಚರಿಸುತ್ತಿದ್ದವು. ಇತ್ತೀಚೆಗೆ ಸುರಿದ ಮಳೆಗೆ ಮಣ್ಣಿನ ರಸ್ತೆ ಸಂಪೂರ್ಣ ಕೆಸರುಮಯವಾಗಿ ಹೊಸ ಸೇತುವೆಯ ಎರಡೂ ಕಡೆಯಲ್ಲಿ ಕೆಸರು ಮಣ್ಣು ತುಂಬಿ ಹೋಗಿತ್ತು.

ಪರಿಣಾಮ ಎರಡೂ ಕಡೆಯಲ್ಲಿ ವಾಹನ ಸಂಚಾರ ಭಾಗಶಃ ಸ್ಥಗಿತಗೊಂಡಿತ್ತು. ದ್ವಿಚಕ್ರ ವಾಹನಿಗರು ಹರಸಾಹಸಪಟ್ಟು ಹೊಸ ಕಿರು ಸೇತುವೆ ಮೇಲೆ ಸಂಚರಿಸುತ್ತಿದ್ದರು. ಪೆರ್ಮಂಕಿ-ಉಳಾಯಿಬೆಟ್ಟು-ಮಂಗಳೂರು ಭಾಗದ ಸಾರ್ವಜನಿಕರು ತೊಂದರೆ ಅನುಭವಿಸುತ್ತಿದ್ದಾರೆ. ಆದರೂ ಲೋಕೋಪಯೋಗಿ ಇಲಾಖೆ ಮಾತ್ರ ಇದಕ್ಕೆಲ್ಲ ತಲೆಕೆಡಿಸಿಕೊಳ್ಳದೆ, ಸೇತುವೆ ಲೋಕಾರ್ಪಣೆಗೆ ದಿನಾಂಕ ನಿಗದಿಪಡಿಸುವ ಗೋಜಿನಲ್ಲಿದೆ ಎಂದು ಸ್ಥಳೀಯರು ದೂರಿದ್ದಾರೆ.

ಅಚ್ಚರಿಯೆಂದರೆ ಜೂ.25, 26ರಂದು ಧಾರಾಕಾರ ಮಳೆ ಸುರಿಯುತ್ತಲೇ ಕೆಲವು ವಾಹನಗಳು ಕೆಸರಲ್ಲಿ ಹೂತು ಹೋಗಿವೆ. ತಕ್ಷಣ ಎಚ್ಚೆತ್ತುಕೊಂಡ ಪಿಡಬ್ಲುೃಡಿ, ಹೊಸ ಕಿರು ಸೇತುವೆ ಎರಡು ಪಾರ್ಶ್ವದಲ್ಲಿ ಜಲ್ಲಿಕಲ್ಲು ತುಂಬಿಸಿ ವಾಹನ ಸಂಚಾರಕ್ಕೆ ತಾತ್ಕಾಲಿಕ ವ್ಯವಸ್ಥೆಗೆ ಸೂಚಿಸಿದೆ ಎನ್ನಲಾಗಿದೆ. ಶೇ.10ರಷ್ಟು ಕಾಮಗಾರಿ ಬಾಕಿ ಉಳಿದಿರುವ ಕಿರು ಸೇತುವೆ ಎರಡೂ ಕಡೆಯಲ್ಲಿ ಕಾಂಕ್ರೀಟೀಕರಣದ ಬದಲಿಗೆ ಜಲ್ಲಿಕಲ್ಲು ತುಂಬಿಸಲಾಗಿದೆ. ಜೂ.16ರಿಂದ ಸರ್ಕಾರಿ ಬಸ್ ಸಹಿತ ಇತರ ವಾಹನ ಸಂಚಾರಕ್ಕೆ ಅವಕಾಶ ಮಾಡಿ ಕೊಡಲಾಗಿದೆ. ಆದರೆ ಈ ವ್ಯವಸ್ಥೆ ಅಪಾಯಕಾರಿಯಾಗಿದೆ.

ಹಳೇ ಸೇತುವೆ ನೆಲಸಮಗೊಳಿಸಿದ ಬಳಿಕ ಉಳಾಯಿಬೆಟ್ಟಿನಲ್ಲಿ ಗದ್ದೆಗಳ ಮೂಲಕ ನಿರ್ಮಿಸಲಾದ ತಾತ್ಕಾಲಿಕ ಮಣ್ಣಿನ ರಸ್ತೆ ನಿನ್ನೆ-ಮೊನ್ನೆ ಸುರಿದ ಮಳೆಗೆ ಹೇಳಹೆಸರಿಲ್ಲದಂತಾಗಿದೆ. ಕೆಸರು ತುಂಬಿದ ಈ ರಸ್ತೆಯಲ್ಲಿ ಮುಂದೆ ಸಾಗಲು ಪ್ರಯತ್ನಿಸಿದ ಪೊಲೀಸ್ ಕಾರು ಸಹಿತ ಹಲವು ರಿಕ್ಷಾ-ಟೆಂಪೋಗಳು ಕೆಸರಲ್ಲಿ ಹೂತು ಹೋಗಿವೆ.

ಜುಲೈ ಪ್ರಥಮ ವಾರದಲ್ಲಿ ಕಿರು ಸೇತುವೆ ಲೋಕಾರ್ಪಣೆಗೊಳ್ಳಲಿದೆ ಎಂದು ಹೇಳಲಾಗುತ್ತಿದೆ. 2025ರಲ್ಲಿ ಸೇತುವೆ ಕಾಮಗಾರಿ ಆರಂಭಗೊಂಡಿತ್ತು. ಅಲ್ಲಿಂದ ಇಲ್ಲಿಯವರೆಗೆ ಸೇತುವೆ ಕಾಮಗಾರಿ ಗಡುವು ಮೀರಿ ಮುಂದುವರಿದಿದೆ. ಮಳೆಗಾಲಕ್ಕೆ ಮುಂಚೆ ಸೇತುವೆ ಲೋಕಾರ್ಪಣೆಗೊಂಡಿಲ್ಲ ಎಂದು ಸ್ಥಳೀಯರು ದೂರಿದ್ದಾರೆ.

ಮಳೆ ಆರಂಭಕ್ಕೆ ಮುಂಚೆ ಕಿರು ಸೇತುವೆ ಕಾಮಗಾರಿ ಪೂರ್ಣಗೊಳ್ಳುವುದು ಅಸಾಧ್ಯ ಎಂದು ತಿಳಿದು ಬರುತ್ತಲೇ ಗುತ್ತಿಗೆ ಸಂಸ್ಥೆ ಬಹುತೇಕ ಪೂರ್ಣಗೊಂಡಿರುವ ಕಿರು ಸೇತುವೆಯ ಎರಡೂ ಪಾರ್ಶ್ವದಲ್ಲಿ ಸಿಮೆಂಟ್ ಸ್ಲ್ಯಾಬ್ ಅಥವಾ ಜಲ್ಲಿಕಲ್ಲು-ಜಲ್ಲಿಪುಡಿ ಅಳವಡಿಸಿ ತಾತ್ಕಾಲಿಕ ರಸ್ತೆ ವ್ಯವಸ್ಥೆ ಮಾಡಬಹುದಿತ್ತು. ಸದ್ಯ ಗದ್ದೆಯ ತಾತ್ಕಾಲಿಕ ರಸ್ತೆ ಹಾಗೂ ಸೇತುವೆ ರಸ್ತೆ ಅಲಭ್ಯಗೊಂಡು ಈ ಭಾಗದ ಸಾರ್ವಜನಿಕರು ತೀವ್ರ ತೊಂದರೆ ಎದುರಿಸುವಂತಾಗಿದೆ.

— ಹರಿಕೇಶ್ ಶೆಟ್ಟಿ, ಉಳಾಯಿಬೆಟ್ಟು ಗ್ರಾಪಂ ನಿಕಟಪೂರ್ವಅಧ್ಯಕ್ಷ