ಪುಸ್ತಕ ಪ್ರೀತಿಯ ನಿವೃತ್ತ ದಂಪತಿಯ ಮನೆಯೇ ಗ್ರಂಥಾಲಯ

ಉಜಿರೆ ಮಹಿಳಾ, ಮಕ್ಕಳ ಕಲ್ಯಾಣ ಇಲಾಖೆ ತರಬೇತಿ ಸಂಸ್ಥೆಯ ನಿವೃತ್ತ ಪ್ರಾಂಶುಪಾಲ ಅಶೋಕ್ ಕುಮಾರ್ ಮೂಲೆಮಜಲು ಮತ್ತು ಕೆಎಸ್‌ಎಸ್ ಕಾಲೇಜಿನ ನಿವೃತ್ತ ಗ್ರಂಥಪಾಲಕಿ ಸುನೀತಾ ಕೆ. ದಂಪತಿಯ ಪುಸ್ತಕ ವ್ಯಾಮೋಹವು ಸುಬ್ರಹ್ಮಣ್ಯದ ಪರ್ವತಮುಖಿಯಲ್ಲಿನ ತಮ್ಮ ನಿವಾಸವನ್ನೇ ಗ್ರಂಥಾಲಯವನ್ನಾಗಿಸಿದೆ. ಮನೆಯಲ್ಲಿ ಸುಮಾರು 12 ಸಾವಿರ ಪುಸ್ತಕಗಳ ಗ್ರಂಥಾಲಯ ನಿರ್ಮಿಸಿ ದಂಪತಿ ಪುಸ್ತಕಗಳ ಮೇಲಿನ ಪ್ರೀತಿಯನ್ನು ಮೂರ್ತರೂಪಕ್ಕಿಳಿಸಿದ್ದಾರೆ.

ಹಿರಿಯ ಪ್ರಾಥಮಿಕ ಶಾಲೆಯಲ್ಲಿ ಓದುತ್ತಿದ್ದಾಗಲೇ ಅಶೋಕ್ ಮೂಲೆಮಜಲು ಅವರಿಗೆ ಪುಸ್ತಕಗಳ ಮೇಲೆ ವಿಶೇಷ ಆಸಕ್ತಿ ಬೆಳೆಯಿತು. ಕಥೆ, ಕಾದಂಬರಿ, ಸಾಮಾನ್ಯ ಜ್ಞಾನ, ಸಾಹಿತ್ಯ, ಇತಿಹಾಸ, ಧರ್ಮ, ರಾಜಕೀಯ, ವಿಜ್ಞಾನ, ಕ್ರೀಡೆ ಸೇರಿದಂತೆ ಹಲವು ಕ್ಷೇತ್ರಗಳಿಗೆ ವಿಸ್ತರಿಸಿತು. ಓದಿದ ಪುಸ್ತಕಗಳನ್ನು ಸಂರಕ್ಷಿಸುವ ಹವ್ಯಾಸದಿಂದ ಗ್ರಂಥಾಲಯ ನಿರ್ಮಾಣವಾಯಿತು.

12 ಸಾವಿರ ಪುಸ್ತಕಗಳ ಭಂಡಾರ: ಮನೆಯ ಕಪಾಟುಗಳಲ್ಲಿ 12 ಸಾವಿರಕ್ಕೂ ಅಧಿಕ ಪುಸ್ತಕಗಳು ಇವೆ. ಕನ್ನಡ, ಆಂಗ್ಲ ಸೇರಿದಂತೆ ವಿವಿಧ ಭಾಷೆಗಳ ಕೃತಿಗಳನ್ನು ಇಲ್ಲಿ ಜೋಪಾನವಾಗಿ ಇಡಲಾಗಿದೆ. ಸಾಹಿತ್ಯದಿಂದ ಹಿಡಿದು ಸಂಶೋಧನಾ ಕೃತಿಗಳವರೆಗೆ ನಾನಾ ವಿಷಯಗಳ ಪುಸ್ತಕಗಳು, ಏಳು ಧರ್ಮಗಳ ಸಂಗ್ರಹ ಇಲ್ಲಿದೆ. ಮೊದಲ ಮಹಡಿಯ ವಿಶಾಲವಾದ ಒಂದು ಕೊಠಡಿ ಮತ್ತು ಹಜಾರವನ್ನು ಗ್ರಂಥಾಲಯವನ್ನಾಗಿ ಮಾಡಲಾಗಿದೆ.

ಪತ್ರಿಕಾ ಲೇಖನಗಳ ಸಂಗ್ರಹ: ಪುಸ್ತಕಗಳಷ್ಟೇ ಅಲ್ಲದೆ ಪತ್ರಿಕೆಗಳಲ್ಲಿ ಪ್ರಕಟವಾಗುವ ಮಹತ್ವದ ಲೇಖನಗಳು, ರಾಜಕೀಯ ವಿಶ್ಲೇಷಣೆಗಳು, ಕ್ರೀಡಾ ಬರಹಗಳು, ವಿಶೇಷ ವರದಿಗಳನ್ನು ಹಲವು ವರ್ಷಗಳಿಂದ ಸಂಗ್ರಹಿಸಿ ಇಡಲಾಗಿದೆ. ದಿನಕ್ಕೆ ಏಳರಿಂದ ಹದಿಮೂರು ಪತ್ರಿಕೆಗಳನ್ನು ಓದುವ ಅಭ್ಯಾಸದ ಜತೆಗೆ ಅನೇಕ ಪುಸ್ತಕಗಳನ್ನು ಓದುವುದು ಇವರ ಹವ್ಯಾಸ.

ನಾಣ್ಯ ಸಂಗ್ರಹ: ನಾಣ್ಯ ಹಾಗೂ ನೋಟುಗಳ ಸಂಗ್ರಹವೂ ಇದೆ. 1 ಪೈಸೆಯಿಂದ ಹಿಡಿದು ವಿವಿಧ ಕಾಲಘಟ್ಟಗಳ ನಾಣ್ಯ, ಒಂದು ರೂಪಾಯಿಯ 43 ಬಗೆಯ ನಾಣ್ಯ, ಬ್ರಿಟಿಷ್ ಆಡಳಿತದ ಕಾಲದ ಹಾಗೂ ವಿಕ್ಟೋರಿಯಾ ಮಹಾರಾಣಿಯ ಕಾಲದ ಬೆಳ್ಳಿ ನಾಣ್ಯಗಳು ಇಲ್ಲಿವೆ.

ಅಶೋಕ್ ಕುಮಾರ್ ಅವರಲ್ಲಿ 600 ಪೆನ್‌ಗಳ ಸಂಗ್ರಹವಿದೆ. ಇಂಗ್ಲೆಂಡ್ ಹಾಗೂ ಫ್ರಾನ್ಸ್‌ನಿಂದ ತಂದ ಅಪರೂಪದ ಪೆನ್‌ಗಳು ಇದರಲ್ಲಿ ಸೇರಿವೆ. ಅಲ್ಲದೆ 567 ಕ್ಯಾಸೆಟ್‌ಗಳು ಮತ್ತು ಸುಮಾರು 600 ಸಿ.ಡಿ.ಗಳನ್ನು ಸಂರಕ್ಷಿಸಿದ್ದಾರೆ. ಹಳೆಯ ಅಪರೂಪದ ಸಂಗೀತ ವಾದ್ಯಗಳ ಸಂಗ್ರಹವೂ ಇಲ್ಲಿದೆ. ಅಶೋಕ್ ಕುಮಾರ್ ಮತ್ತು ಸುನಿತಾ ಅಶೋಕ್ ಅವರಿಗೆ ಪುತ್ರಿ ಸಹನಾ ಹಾಗೂ ಪುತ್ರ ಶ್ರೇಯಸ್ ಸದಾ ಸಹಕಾರ ನೀಡುತ್ತಾ ಬಂದಿದ್ದಾರೆ.

ಪುಸ್ತಕಗಳು ನನ್ನ ಬದುಕಿನ ಅವಿಭಾಜ್ಯ ಅಂಗ. ಓದುವುದು ಎಂದರೆ ಕೇವಲ ಮಾಹಿತಿ ಸಂಗ್ರಹಿಸುವುದಲ್ಲ ಬದಲಾಗಿ ಚಿಂತನೆಗಳನ್ನು ವಿಸ್ತರಿಸಿಕೊಳ್ಳುವುದು. ಒಂದು ಒಳ್ಳೆಯ ಪುಸ್ತಕ ನಮ್ಮ ಬದುಕಿನ ದೃಷ್ಟಿಕೋನವನ್ನೇ ಬದಲಾಯಿಸುವ ಶಕ್ತಿ ಹೊಂದಿರುತ್ತದೆ. ಆದ್ದರಿಂದ ಓದು ಎಂಬ ಹವ್ಯಾಸವನ್ನು ಯಾವತ್ತೂ ಕೈಬಿಡಬಾರದು.

— ಅಶೋಕ್ ಕುಮಾರ್ ಮೂಲೆಮಜಲು ಪುಸ್ತಕ ಪ್ರೇಮಿ