ಉಡುಪಿ

ರಾಮಸಮುದ್ರಕ್ಕೆ ಆಧುನಿಕ ಸ್ಪರ್ಶ!

ಕಾರ್ಕಳದ ಐತಿಹಾಸಿಕ ಜಲಮೂಲವಾದ ರಾಮಸಮುದ್ರ ಕೆರೆ.
ಕಾರ್ಕಳದ ಐತಿಹಾಸಿಕ ಜಲಮೂಲವಾದ ರಾಮಸಮುದ್ರ ಕೆರೆ.
ಸೌಮ್ಯ ಆರ್
Published on: 

ಪ್ರಮುಖ ಮುಖ್ಯಾಂಶಗಳು

  • ಕೆರೆಯ ಸೌಂದರ್ಯವನ್ನು ಸವಿಯಲು ಆಕರ್ಷಕ ದೀಪ
  • ಪರಿಸರ ಸ್ನೇಹಿ ಅಭಿವೃದ್ಧಿ
  • ಐತಿಹಾಸಿಕ ಜಲಮೂಲಕ್ಕೆ ಮರುಜೀವ
ಹರಿಪ್ರಸಾದ್​ ನಂದಳಿಕೆ ಕಾರ್ಕಳ
ಪ್ರಕೃತಿಪ್ರಿಯರ ಪ್ರಮುಖ ಆಕರ್ಷಣೆಯ ತಾಣ ಹಾಗೂ ಐತಿಹಾಸಿಕ ಜಲಮೂಲವಾದ "ರಾಮಸಮುದ್ರ ಕೆರೆ' ಈಗ ತನ್ನ ಹಳೆಯ ವೈಭವವನ್ನು ಮರಳಿ ಪಡೆಯಲು ಸಜ್ಜಾಗಿದೆ. ಕೇಂದ್ರ ಸರ್ಕಾರದ ಅಮೃತ್​ 2.0 ಯೋಜನೆಯ "ಜಲಮೂಲ ಪುನಶ್ವೇತನ ಅಭಿಯಾನದ ಅಡಿಯಲ್ಲಿ ಈ ಕೆರೆಯನ್ನು ಸಮಗ್ರವಾಗಿ ಅಭಿವೃದ್ಧಿಪಡಿಸಲು 2.74 ಕೋಟಿ ರೂ. ವೆಚ್ಚದ ಯೋಜನಾ ವರದಿ ಸಿದ್ಧಗೊಂಡಿದ್ದು, ಅನುಷ್ಠಾನದ ಹಂತಕ್ಕೆ ತಲುಪಿದೆ.
14ನೇ ಶತಮಾನದಲ್ಲಿ ಕಾರ್ಕಳವನ್ನು ಆಳುತ್ತಿದ್ದ ಭೈರವ ಅರಸರ ಕಾಲದಲ್ಲಿ ನಿಮಾರ್ಣಗೊಂಡ ಕೆರೆ ಇದಾಗಿದ್ದು, ಕೆರೆಯ ಮೂಲ ಸ್ವರೂಪವನ್ನು ಸಂರಕ್ಷಿಸಿ, ನಾಗರಿಕರಿಗೆ ಸುಸಜ್ಜಿತ ಸೌಲಭ್ಯ ಒದಗಿಸುವುದಕ್ಕಾಗಿ 2.74 ಕೋಟಿ ರೂ. ವೆಚ್ಚದ ಯೋಜನೆ ಸಿದ್ಧವಾಗಿದೆ. ಇದರಲ್ಲಿ 2.03 ಕೋ.ರೂ. ನೇರವಾಗಿ ಕಾಮಗಾರಿಗಳಿಗೆ ಬಳಕೆಯಾಗಲಿದೆ. 17.10 ಲಕ್ಷ ರೂ. ಮುಂದಿನ 5 ವರ್ಷಗಳ ಕಾಲ ಕೆರೆಯ ಸುಸ್ಥಿತಿ ಮತ್ತು ನಿರ್ವಹಣೆಗಾಗಿ ಮೀಸಲಿಡಲಾಗಿದೆ.

ಐತಿಹಾಸಿಕ ಜಲಮೂಲಕ್ಕೆ ಮರುಜೀವ

ಕಾರ್ಕಳದ ಇತಿಹಾಸದೊಂದಿಗೆ ಅವಿನಾಭಾವ ಸಂಬಂಧ ಹೊಂದಿರುವ ರಾಮಸಮುದ್ರ ಕೆರೆ ಕಾಲಕ್ರಮೇಣ ಹೂಳು ತುಂಬಿ, ಪಾರ್ಶ್ವಗಳಲ್ಲಿ ಗಿಡಗಂಟಿಗಳು ಬೆಳೆದು ತನ್ನ ಸೌಂದರ್ಯ ಕಳೆದುಕೊಳ್ಳುತ್ತಿತ್ತು. ಈಗ ಅಮೃತ್​ ಯೋಜನೆಯಡಿ ಈ ಜಲಮೂಲವನ್ನು ಸಂರಕ್ಷಿಸಿ, ಪ್ರವಾಸಿಗರನ್ನು ಆಕರ್ಷಿಸುವ ನಿಟ್ಟಿನಲ್ಲಿ ಆಧುನಿಕ ಸ್ಪರ್ಶ ನೀಡಲಾಗುತ್ತಿದೆ. ಕೆರೆಯ ನೀರಿನ ಸಂಗ್ರಹ ಸಾಮರ್ಥ್ಯವನ್ನು ಹೆಚ್ಚಿಸಲು ವೈಜ್ಞಾನಿಕವಾಗಿ ಹೂಳು ತೆಗೆದು ಸ್ವಚ್ಛಗೊಳಿಸಲಾಗುವುದು. ಕೆರೆಯ ಪಾರ್ಶ್ವಗಳನ್ನು ಭದ್ರಪಡಿಸಲು ಹಾಗೂ ಸವೆತ ತಡೆಯಲು ಬಲಿಷ್ಠ ತಡೆಗೋಡೆಗಳನ್ನು ನಿರ್ಮಿಸಲಾಗುವುದು. ಸಾರ್ವಜನಿಕರ ವಾಕಿಂಗ್​ ಮತ್ತು ಪ್ರವಾಸಿಗರ ವೀಕ್ಷಣೆಗಾಗಿ ಕೆರೆಯ ಸುತ್ತಲೂ ಸುಸಜ್ಜಿತ ಪಾದಚಾರಿ ರಸ್ತೆ ನಿಮಾರ್ಣವಾಗಲಿದೆ. ರಾತ್ರಿಯ ವೇಳೆಯೂ ಕೆರೆಯ ಸೌಂದರ್ಯವನ್ನು ಸವಿಯಲು ಆಕರ್ಷಕ ದೀಪಗಳನ್ನು ಅಳವಡಿಸಲಾಗುವುದು.

ಪರಿಸರ ಸ್ನೇಹಿ ಅಭಿವೃದ್ಧಿ

ಕೇವಲ ಸಿವಿಲ್​ ಕಾಮಗಾರಿಗಳಷ್ಟೇ ಅಲ್ಲದೆ, ಜಲಮೂಲದ ನೈಸರ್ಗಿಕ ಸಮತೋಲನ ಕಾಯ್ದುಕೊಳ್ಳಲು ಒತ್ತು ನೀಡಲಾಗಿದೆ. ಕೆರೆಯ ಸುತ್ತಲೂ ಹಸಿರೀಕರಣಕ್ಕೆ ಆದ್ಯತೆ ನೀಡಲಾಗುತ್ತಿದ್ದು, ಇದು ಸ್ಥಳಿಯ ಅಂತರ್ಜಲಮಟ್ಟ ಹೆಚ್ಚಳಕ್ಕೂ ಪೂರಕವಾಗಲಿದೆ.
ಯೋಜನೆಯಲ್ಲಿ ಏನಿದೆ? 
ಕೆರೆಯ ದಂಡೆಯುದ್ದಕ್ಕೂ 225 ಮೀಟರ್​ ಉದ್ದದ ಸುಂದರ ನಡಿಗೆ ಪಥ. ಕೆರೆಯ ಮಣ್ಣಿನ ಸವೆತ ತಡೆಯಲು 92.24 ಲಕ್ಷ ರೂ. ವೆಚ್ಚದಲ್ಲಿ ಗೇಬಿಯನ್​ ತಡೆಗೋಡೆ, 1194 ಚ.ಮೀ. ವ್ಯಾಪ್ತಿಯಲ್ಲಿ ಪೇವ್​ ಪ್ಲಾಜಾ ನಿರ್ಮಿಸಿ ಅಲಂಕಾರಿಕ ದೀಪಗಳು, ಆಸನ ಅಳವಡಿಕೆ. ಜಲ ಪ್ರವಾಸೋದ್ಯಮಕ್ಕೆ ಒತ್ತು ನೀಡಲು 12.03 ಲಕ್ಷ ರೂ. ವೆಚ್ಚದಲ್ಲಿ ಸುಸಜ್ಜಿತ ಬೋಟ್​ ಜೆಟ್ಟಿ, ಕೆರೆಯ ದಂಡೆಯ ಮೇಲೆ 60 ಲಕ್ಷ ರೂ. ವೆಚ್ಚದಲ್ಲಿ ಪಾರ್ಕ್​ ನಿಮಾರ್ಣ ಮಾಡುವ ಯೋಜನೆಗಳಿವೆ. 

ಒಡಲು ಸೇರದಿರಲಿ ತ್ಯಾಜ್ಯ

ಕಾರ್ಕಳದ ಅಮೂಲ್ಯ ಸಂಪತ್ತಾಗಿರುವ ಐತಿಹಾಸಿಕ ರಾಮಸಮುದ್ರ ಕೆರೆ ಕಲುಷಿತವಾಗದಂತೆ ಎಚ್ಚರವಹಿಸುವುದು ಇಂದಿನ ಅಗತ್ಯ. ಕೆಲವರು ಪ್ಲಾಸ್ಟಿಕ್​, ಮದ್ಯದ ಬಾಟಲಿಗಳನ್ನು ಕೆರೆಗೆ ಎಸೆಯುವುದನ್ನು ಕಟ್ಟುನಿಟ್ಟಾಗಿ ರ್ನಿಬಂಧಿಸಬೇಕು. ಕೆರೆಗೆ ಕಲುಷಿತ ನೀರು ಸೇರುತ್ತಿದೆ ಎಂಬ ದೂರು ಈ ಹಿಂದೆ ಕೇಳಿ ಬಂದಿತ್ತು. ಈ ಬಗ್ಗೆ ಅಧಿಕಾರಿಗಳು ಆಗಾಗ್ಗೆ ಪರಿಶೀಲನೆ ನಡೆಸಬೇಕು. ಶುದ್ಧ ಮಳೆನೀರು ಮಾತ್ರ ಕೆರೆಗೆ ಹರಿಯುವಂತಾಗಬೇಕು ಎನ್ನುವುದು ಜನರ ಆಗ್ರಹ.

ಕೇಂದ್ರ ಸರ್ಕಾರದ ಅಮೃತ್​ 2.0 ಯೋಜನೆಯಡಿ ರಾಮಸಮುದ್ರ ಕೆರೆಯನ್ನು ಸಮಗ್ರ ಅಭಿವೃದ್ಧಿಪಡಿಸಲಾಗುತ್ತಿದ್ದು, ಇದರ ಭಾಗವಾಗಿ ಸುಂದರ ಉದ್ಯಾನವನವನ್ನು ರೂಪಿಸಲಾಗುವುದು. ಜಲಮೂಲ ಸಂರಕ್ಷಣೆ ಮುಖ್ಯ ಆಶಯ ಹೊಂದಿದ್ದು, ಜತೆಗೆ ಪ್ರವಾಸಿಗರಿಗೆ ಹಾಗೂ ಸ್ಥಳಿಯರಿಗೆ ನೆಚ್ಚಿನ ತಾಣವನ್ನಾಗಿಸುವ ನಿಟ್ಟಿನಲ್ಲಿ ಸಮಗ್ರವಾಗಿ 3 ಕೋ.ರೂ. ವೆಚ್ಚದಲ್ಲಿ ಅಭಿವೃದ್ಧಿಪಡಿಸಲಾಗುತ್ತಿದೆ.

— ವಿ.ಸುನೀಲ್​ ಕುಮಾರ್​, ಕಾರ್ಕಳ ಶಾಸಕ

ರಾಮಸಮುದ್ರ ಕೆರೆ ಕಾರ್ಕಳದ ಆಸ್ತಿ. ಅಮೃತ್​ 2.0 ಯೋಜನೆಯಡಿ ಲಭ್ಯವಾಗಿರುವ ಅನುದಾನದಿಂದ ಈ ಕೆರೆಯನ್ನು ಆಧುನಿಕ ಮಾದರಿಯಲ್ಲಿ ಅಭಿವೃದ್ಧಿಪಡಿಸುವುದರಿಂದ ಪ್ರವಾಸೋದ್ಯಮಕ್ಕೆ ಹೆಚ್ಚಿನ ವೇಗ ಸಿಗಲಿದೆ. ಈ ಬೃಹತ್​ ಯೋಜನೆಯಿಂದಾಗಿ ಕಾರ್ಕಳದ ಜನತೆಗೆ ದಶಕಗಳ ಕಾಲ ನೀರಿನ ಆಸರೆಯಾಗಿದ್ದ ರಾಮಸಮುದ್ರ ಇನ್ನು ಮುಂದೆ ಪ್ರವಾಸಿಗರ ಹಾಟ್​ಸ್ಪಾಟ್​ ಆಗಿ ಬದಲಾಗುವುದರಲ್ಲಿ ಸಂಶಯವಿಲ್ಲ.

— ರಾಜೇಶ್​ ಸ್ಥಳೀಯ ನಿವಾಸಿ
ವಿಜಯವಾಣಿ ನಂ.1 ದಿನ ಪತ್ರಿಕೆ | Vijayavani | Kannada News
www.vijayavani.net