ವಯನಾಡಿನಂತೆ ಬಾಯ್ದೆರೆದ ಗುಡ್ಡ !

ಕೇರಳದ ವಯನಾಡಿನಲ್ಲಿ ಸಂಭವಿಸಿದ ಭೂಕುಸಿತದ ದುರಂತದ ಬೆನ್ನಲ್ಲೇ, ದಕ್ಷಿಣ ಕನ್ನಡ ಜಿಲ್ಲೆಯ ಕೆತ್ತಿಕಲ್ ಪ್ರದೇಶದ ನಿವಾಸಿಗಳು ಇದೇ ರೀತಿಯ ಆತಂಕ ವ್ಯಕ್ತಪಡಿಸಿದ್ದಾರೆ. ರಾಷ್ಟ್ರೀಯ ಹೆದ್ದಾರಿ 169ರ ಚತುಷ್ಪಥ ವಿಸ್ತರಣೆ ಕಾಮಗಾರಿ ನಡೆಸುತ್ತಿರುವ ದುಲೀಪ್ ಬಿಲ್ಡ್‌ಕಾನ್ ಸಂಸ್ಥೆಯ ಅವೈಜ್ಞಾನಿಕ ಯೋಜನೆ ವಿನ್ಯಾಸದಿಂದಾಗಿ ಇಲ್ಲಿ ಭಾರಿ ದುರಂತ ಸಂಭವಿಸುವ ಸಾಧ್ಯತೆ ಇದೆ ಎಂದು ಸ್ಥಳೀಯರು ಎಚ್ಚರಿಸಿದ್ದಾರೆ.

ಕಳೆದ ವರ್ಷ ತಿರುವೈಲು ಸರ್ಕಾರಿ ಶಾಲೆ ಅನತಿ ದೂರದಲ್ಲಿ ಕೆತ್ತಿಕಲ್ ಗುಡ್ಡ ಕುಸಿದಿತ್ತು. ಬಳಿಕ ಆ ಪ್ರದೇಶದ ಸುರಕ್ಷತೆಗಾಗಿ ಸಿಮೆಂಟ್ ಸಿಂಪಡಿಸಿ ನೀರಿನ ಒರತೆ ನಿಯಂತ್ರಿಸಲು ಉಕ್ಕಿನ ಕೊಳವೆ, ಬಲೆ ಹಾಸಲಾಗಿತ್ತು. ಗುಡ್ಡದ ಸುರಕ್ಷತೆಗೆ ಅತ್ಯಾಧುನಿಕ ತಂತ್ರಜ್ಞಾನ ಬಳಕೆ ಮಾಡಲಾಗಿದೆ. ಇನ್ನು ಯಾವುದೇ ಅನಾಹುತ ಸಂಭವಿಸದು ಎಂದು ಎನ್‌ಎಚ್ ಭರವಸೆ ನೀಡಿತ್ತು. ಇದಾದ ಕೆಲವೇ ದಿನಗಳಲ್ಲಿ ಸುರಿದ ಧಾರಾಕಾರ ಮಳೆಗೆ ಹೆದ್ದಾರಿಗೆ ಗುಡ್ಡದ ಮಣ್ಣು, ಬಂಡೆ ಉರುಳಿ ಬಿದ್ದು ಚತುಷ್ಪಥದಲ್ಲಿ ದ್ವಿಪಥ ನುಚ್ಚುನೂರಾಗಿತ್ತು.

ಕೆಲವು ದಿನಗಳ ಹಿಂದೆ ಗುಡ್ಡೆಗೆ ತಡೆಗೋಡೆ ನಿರ್ಮಿಸಲು ಡಿಬಿಎಲ್ ಸಂಸ್ಥೆ ಇಲ್ಲಿನ ಇಳಿಜಾರದ ಗುಡ್ಡದ ಮೇಲೆ ಮಣ್ಣು ತೆರವು ಕಾರ್ಯಾಚರಣೆ ನಡೆಸುತ್ತಿದ್ದ ವೇಳೆ ಬಂಡೆಕಲ್ಲು ಹಿಟಾಚಿ ಮೇಲೆ ಬಿದ್ದು, ಅಲ್ಲೇ ಹೂತು ಹೋಗಿತ್ತು. ನಂತರದಲ್ಲಿ ಕೆಸರು ಮಣ್ಣು ಅಗೆದು ತಡೆಗೋಡೆ ಕಾಮಗಾರಿ ಮುಂದುವರಿಸಲಾಗಿದೆ. ಮೇಲ್ಭಾಗದಲ್ಲಿ ಗುಡ್ಡದ ಸಡಿಲ ಮಣ್ಣು ಈಗಲೂ ಕುಸಿಯುತ್ತಲೇ ಇದೆ. ಇಲ್ಲಿ ಗುಡ್ಡ ಕುಸಿತಕ್ಕೆ ಎನ್‌ಎಚ್ ಅನುಕೂಲ ಮಾಡಿಕೊಡುತ್ತಿದೆ ಎಂದು ಸ್ಥಳೀಯರು ಭೀತಿ ವ್ಯಕ್ತಪಡಿಸಿದ್ದಾರೆ.

ಪ್ರಸಕ್ತ ಕಾಮಗಾರಿ ಮುಂದುವರಿದಿರುವ ಇಳಿಜಾರಾದ ಕೆತ್ತಿಕಲ್ ಗುಡ್ಡದ ಮೇಲ್ಗಡೆ ಬೃಹತ್ ಬಂಡೆ, ಮರ, ಅನತಿ ದೂರದಲ್ಲಿ ಕೆಲವು ಮನೆಗಳಿವೆ. ಇಲ್ಲಿ ನಡೆಯುತ್ತಿರುವ ಕಾಮಗಾರಿ ಜನಸಾಮಾನ್ಯರಲ್ಲಿ ಭಯ ಹುಟ್ಟಿಸುವಂತಿದೆ. ಧಾರಾಕಾರ ಮಳೆಯಾದರೆ ಭೂಕುಸಿತವಾಗಿ ಹೆದ್ದಾರಿ ಸಂಪೂರ್ಣ ಬಂದ್ ಆಗಲಿದೆ.

ಕೆತ್ತಿಕಲ್ ಗುಡ್ಡದಲ್ಲಿ ಯಾವುದೇ ಅಭಿವೃದ್ಧಿ ಕಾಮಗಾರಿ ನಡೆಸದೆ ಈ ಭಾಗದ ವಾಮಂಜೂರಿನಿಂದ ಪರಾರಿವರೆಗೆ ಮೇಲ್ಸೇತುವೆ(ಫ್ಲೈಓವರ್) ರಸ್ತೆ ನಿರ್ಮಿಸುವಂತೆ ಸ್ಥಳೀಯರು ಆಗ್ರಹಿಸಿದ್ದಾರೆ. ಮೇಲ್ಸೇತುವೆ ನಿರ್ಮಿಸಲು ಎನ್‌ಎಚ್ ಪ್ರಾಧಿಕಾರಿ ಮನಸ್ಸು ಮಾಡುತ್ತಿದ್ದರೆ, ಕೆತ್ತಿಕಲ್ ಗುಡ್ದದ ಸುರಕ್ಷತೆಗಾಗಿ ಸರ್ಕಾರ ಈವರೆಗೆ ವ್ಯಯಿಸಿರುವ ಖರ್ಚಿನಲ್ಲಿ ಕೋಟ್ಯಂತರ ರೂ. ಉಳಿತಾಯವಾಗುತ್ತಿತ್ತು ಎನ್ನುತ್ತಾರೆ ಸಾರ್ವಜನಿಕರು.

ಸಾಕಷ್ಟು ಭಾಗ ಕುಸಿದು ಮೇಲ್ಭಾಗದ ವಸತಿ ಪ್ರದೇಶದತ್ತ ಮುಖ ಮಾಡಿರುವ ಕೆತ್ತಿಕಲ್‌ನ ಮತ್ತೊಂದು ಗುಡ್ಡ ಪ್ರದೇಶದಲ್ಲಿ ಕೋಟ್ಯಂತರ ರೂ. ವ್ಯಯಿಸಿ ಗ್ಯಾಬಿಯನ್ ವಾಲ್ ನಿರ್ಮಿಸಲಾಗುತ್ತಿದೆ. ಇಷ್ಟಿದ್ದರೂ ಈ ಭಾಗದಲ್ಲಿ ಸಣ್ಣಪುಟ್ಟ ಭೂಕುಸಿತ ಸಂಭವಿಸುತ್ತಿದೆ. ಕಳೆದ ವರ್ಷದಂತೆ ಮಳೆಯಾದರೆ ಈ ‘ವಾಲ್’ನ ವೈಜ್ಞಾನಿಕ ಸಾಮರ್ಥ್ಯ ಬೆಳಕಿಗೆ ಬರಲಿದೆ. ಇದಕ್ಕೆಲ್ಲ ಸೂಕ್ತ ಪರಿಹಾರ ಫ್ಲೈಓವರ್ ಎಂದು ಸ್ಥಳೀಯರ ಅಭಿಪ್ರಾಯವಾಗಿದೆ.

ಕೆತ್ತಿಕಲ್ ಪ್ರದೇಶದಲ್ಲಿ ಮೇಲ್ಸೇತುವೆ ನಿರ್ಮಿಸಬೇಕಿತ್ತು. ಸ್ಥಳೀಯವಾದ ಭೌಗೋಳಿಕ ಸ್ಥಿತಿ ಸ್ಥಳೀಯರಿಗೆ ಮಾತ್ರ ಗೊತ್ತಿರುತ್ತದೆ. ಬೆಂಗಳೂರು, ದೆಹಲಿಯಲ್ಲಿ ಕುಳಿತವರಿಗೆ ಅದು ಹೇಗೆ ಗೊತ್ತಾಗುತ್ತದೆ. ಕೆತ್ತಿಕಲ್ ಗುಡ್ಡ ಕುಸಿದರೆ ಹೆದ್ದಾರಿಯಲ್ಲದೆ ಕೆಳಭಾಗದ ವಸತಿ ಪ್ರದೇಶಕ್ಕೆ ಅಪಾಯ ತಪ್ಪಿದ್ದಲ್ಲ. ಭವಿಷ್ಯದ ಖರ್ಚು ತಪ್ಪಿಸುವ ದೆಸೆಯಲ್ಲಿ ಸರ್ಕಾರಕ್ಕೆ ಚಿಂತಿಸಲು ಅವಕಾಶವಿದೆ.

— ಹೊನ್ನಯ್ಯ ಅಮೀನ್, ಸಿಪಿಎಂ ಗುರುಪುರ ವಲಯ ಸಮಿತಿ ಸದಸ್ಯ