ಮಳೆಗಾಲದಲ್ಲಿ ಮರಣ ಬಲೆ!

ಮಳೆಗಾಲ ಆರಂಭಗೊಂಡಿದ್ದು, ತಾಲೂಕಿನಾದ್ಯಂತ ಹರಡಿಕೊಂಡಿರುವ ಹತ್ತಾರು ಹಳೆಯ ಕಲ್ಲು ಕ್ವಾರಿಗಳು ಈಗ ಅಪಾಯಕಾರಿ ‘ಮರಣದ ಬಲೆ’ಗಳಾಗಿ ಮಾರ್ಪಟ್ಟಿವೆ. ಅದರಲ್ಲೂ ವಿಶೇಷವಾಗಿ ಅಯ್ಯಪ್ಪ ನಗರದ ಜನನಿಬಿಡ ಪ್ರದೇಶದ ರಸ್ತೆ ಬದಿಯಲ್ಲಿರುವ ಬೃಹತ್ ಕಲ್ಲು ಕ್ವಾರಿಗಳು ಸಾರ್ವಜನಿಕರು ಸೇರಿದಂತೆ ಆಟವಾಡುವ ಮಕ್ಕಳ ಪಾಲಿಗೆ ಆತಂಕ ಸೃಷ್ಟಿಸಿದೆ.

ಅಯ್ಯಪ್ಪ ನಗರದ ಮುಖ್ಯ ರಸ್ತೆಗೆ ಅಂಟಿಕೊಂಡಂತಿರುವ ಈ ಬೃಹತ್ ಕಲ್ಲು ಕ್ವಾರಿ ವರ್ಷದ ಬಹುಕಾಲ ಬರಿದಾಗಿರುತ್ತದೆ. ಆದರೆ ಮಳೆಗಾಲ ಆರಂಭವಾಗುತ್ತಿದ್ದಂತೆ, ಈ ಬೃಹತ್ ಗುಂಡಿಯಲ್ಲಿ ಮಳೆ ನೀರು ತುಂಬಿ ಸರೋವರದಂತಾಗುತ್ತದೆ. ಅದರ ಆಳದ ಅರಿವಿಲ್ಲದ ದಾರಿಹೋಕರು ಅಥವಾ ಆಟವಾಡುವ ಮಕ್ಕಳು ಆಕಸ್ಮಿಕವಾಗಿ ಕಾಲು ಜಾರಿ ಬಿದ್ದರೆ ಸಾವು ಖಚಿತ ಎಂಬಷ್ಟು ಅಪಾಯಕಾರಿಯಾಗಿದೆ.

ಈ ಕ್ವಾರಿಯ ಸುತ್ತ ಯಾವುದೇ ರೀತಿಯ ಸುರಕ್ಷತಾ ಬೇಲಿಗಳಿಲ್ಲ ಅಥವಾ ಮುನ್ನೆಚ್ಚರಿಕೆ ಫಲಕಗಳಿಲ್ಲ. ರಸ್ತೆ ಪಕ್ಕದಲ್ಲೇ ಇರುವುದರಿಂದ ರಾತ್ರಿ ವೇಳೆ ಸಂಚರಿಸುವ ವಾಹನ ಸವಾರರು, ಅದರಲ್ಲೂ ಅಪರಿಚಿತರಿಗೆ ಈ ಬೃಹತ್ ಗುಂಡಿಯ ಅರಿವಿರುವುದಿಲ್ಲ. ಮಳೆಗಾಲದಲ್ಲಿ ರಸ್ತೆ ಮತ್ತು ಗುಂಡಿ ಒಂದೇ ಸಮನಾಗಿ ಕಾಣುವುದರಿಂದ ಇಲ್ಲಿ ದೊಡ್ಡ ಮಟ್ಟದ ಅನಾಹುತಗಳು ಸಂಭವಿಸುವ ಸಾಧ್ಯತೆಯನ್ನು ತಳ್ಳಿ ಹಾಕುವಂತಿಲ್ಲ. ರಜೆ ಸಂದರ್ಭದಲ್ಲಿ ನೀರಿನಲ್ಲಿ ಆಟವಾಡಲು ತೆರಳುವ ಮಕ್ಕಳು ಹಾಗೂ ಬಟ್ಟೆ ತೊಳೆಯಲು ಮಹಿಳೆಯರು ಕ್ವಾರಿಯ ಬಳಿಗೆ ಹೋಗುವ ಸಾಧ್ಯತೆಯಿದ್ದು ಅಪಾಯಕಾರಿಯಾಗಿದೆ. ಹೀಗಾಗಿ ಕಲ್ಲು ಕ್ವಾರಿಯ ಸುತ್ತ ತಡೆಬೇಲಿ ಹಾಕುವ ಬಗ್ಗೆ ಸ್ಥಳೀಯಾಡಳಿತಗಳು ಕ್ರಮ ವಹಿಸಬೇಕಾಗಿದೆ.

ನೂರಾರು ಕಲ್ಲು ಕ್ವಾರಿ ಜನವಸತಿ ಪ್ರದೇಶದ ಕೆಲವೇ ಮೀಟರ್ ಅಂತರದಲ್ಲಿದ್ದು, ಅದೇ ಪರಿಸರದಲ್ಲಿ ಗ್ರಾಮಸ್ಥರು ಓಡಾಡುವುದು ಮಾಮೂಲಾಗಿದೆ. ಕಳೆದ ಕೆಲ ವರ್ಷಗಳಲ್ಲಿ ಕಲ್ಲು ಕ್ವಾರಿಯ ಹೊಂಡಕ್ಕೆ ಬಿದ್ದು ಮೃತಪಟ್ಟಿರುವ ಘಟನೆಗಳು ತಾಲೂಕಿನಲ್ಲಿ ಕೆಲವೊಂದು ನಡೆದಿವೆ. ಹೀಗಾಗಿ ಅನಾಹುತ ನಡೆಯುವ ಮುನ್ನ ಜಿಲ್ಲಾಡಳಿತ ಹಾಗೂ ತಾಲೂಕು ಆಡಳಿತ ಸೂಕ್ತ ಕ್ರಮ ವಹಿಸುವುದು ಅಗತ್ಯ ಎಂದು ಸಾರ್ವಜನಿಕರು ಆಗ್ರಹಿಸಿದ್ದಾರೆ.

2012ರಲ್ಲಿ ತಾಲೂಕಿನ ಕಲ್ಯಾ ಗ್ರಾಮದ ನೆಲ್ಲಿಗುಡ್ಡೆ ಎಂಬಲ್ಲಿನ ಕಲ್ಲು ಕ್ವಾರಿಯಲ್ಲಿ ನೀರು ತುಂಬಿದ್ದ ಹೊಂಡದಲ್ಲಿ ಮೂವರು ಮಹಿಳಾ ಕಾರ್ಮಿಕರು ಈಜಲು ಹೋಗಿ ಅಥವಾ ಬಟ್ಟೆ ತೊಳೆಯುವಾಗ ಕಾಲು ಜಾರಿ ಬಿದ್ದು ಮೃತಪಟ್ಟಿದ್ದರು. 2025ರಲ್ಲಿ ನಂದಳಿಕೆ ಗ್ರಾಮದ ತಡೆಬೇಲಿಯಿಲ್ಲದ ಕಲ್ಲು ಕ್ವಾರಿ ಹೊಂಡದಲ್ಲಿ 16 ವರ್ಷದ ವಿದ್ಯಾರ್ಥಿಯೊಬ್ಬ ನೀರಿಗೆ ಹಾರಿ ಆತ್ಮಹತ್ಯೆ ಮಾಡಿಕೊಂಡಿದ್ದ. ಭದ್ರತಾ ಕ್ರಮಗಳ ಕೊರತೆ, ಸರಿಯಾದ ಬೇಲಿ ಹಾಕದಿರುವುದು, ಅಪಾಯಕಾರಿ ಹೊಂಡಗಳ ಬಗ್ಗೆ ಎಚ್ಚರಿಕೆ ಫಲಕ ಅಳವಡಿಸದಿರುವುದರಿಂದ ಅನಾಹುತಗಳು ನಡೆಯುತ್ತಿವೆ.

ಕಾರ್ಕಳ ತಾಲೂಕಿನ ಬಹುತೇಕ ಗ್ರಾಮೀಣ ಭಾಗದಲ್ಲಿ ಕಲ್ಲು ಕ್ವಾರಿ ಹೊಂಡದಲ್ಲಿ ನೀರು ನಿಂತು ಕೆರೆಯಂತಾಗುತ್ತದೆ. ಮಳೆಗಾಲದಲ್ಲಿ ಇದು ತುಂಬಾ ಅಪಾಯಕಾರಿ. ಹೀಗಾಗಿ ಕಲ್ಲು ಕ್ವಾರಿಗಳಿಗೆ ತಡೆಬೇಲಿ ನಿರ್ಮಾಣ ಅಗತ್ಯ.

— ಮಂಜುನಾಥ್, ಗ್ರಾಮಸ್ಥರು, ಕಾರ್ಕಳ