ಉಡುಪಿ

4 ತಿಂಗಳಲ್ಲಿ ಬರೋಬ್ಬರಿ 26 ಜೀವ ಬಲಿ!

ಕಳೆದ ವಾರ ತ್ರಾಸಿ- ಮರವಂತೆ ಬೀಚ್​ ಎದುರು ಅಪಘಾತ ಸಂಭವಿಸಿರುವುದು.
ಕಳೆದ ವಾರ ತ್ರಾಸಿ- ಮರವಂತೆ ಬೀಚ್​ ಎದುರು ಅಪಘಾತ ಸಂಭವಿಸಿರುವುದು.
ಸೌಮ್ಯ ಆರ್
Published on: 

ಪ್ರಮುಖ ಮುಖ್ಯಾಂಶಗಳು

  • ಕುಂದಾಪುರ, ಬೈಂದೂರಲ್ಲಿ 98 ಅಪಘಾತ
  • ಆತಂಕ ಹುಟ್ಟಿಸಿದ ಹೆದ್ದಾರಿ ಸಂಚಾರ
  • ಸಂಚಾರ ಠಾಣಾ ವ್ಯಾಪ್ತಿಯಲ್ಲಿ 14 ಸಾವು
ರಾಘವೇಂದ್ರ ಪೈ ಗಂಗೊಳ್ಳಿ ಕುಂದಾಪುರ
ಈ ವರ್ಷದ ಜನವರಿಯಿಂದ ಮೇ 3ರವರೆಗೆ ಕುಂದಾಪುರ ಹಾಗೂ ಬೈಂದೂರು ತಾಲೂಕುಗಳನ್ನು ಒಳಗೊಂಡ ಕುಂದಾಪುರ ಉಪ ವಿಭಾಗ ವ್ಯಾಪ್ತಿಯಲ್ಲಿ ಬರೋಬ್ಬರಿ 98 ಅಪಘಾತಗಳು ಸಂಭವಿಸಿವೆ. ನಾಲ್ಕೇ ತಿಂಗಳಲ್ಲಿ ರಸ್ತೆ ಅಪಘಾತದಲ್ಲಿ 72 ಮಂದಿ ಗಾಯಗೊಂಡು, 26 ಮಂದಿ ಬಲಿಯಾಗಿರುವುದು ಕಳವಳಕಾರಿ ಸಂಗತಿಯಾಗಿದೆ.
2025ರಲ್ಲಿ ಸ್ವಲ್ಪಮಟ್ಟಿಗೆ ಕಡಿಮೆಯಿದ್ದ ಅಪಘಾತ ಪ್ರಕರಣಗಳ ಸಂಖ್ಯೆ, ಈ ವರ್ಷದ ಆರಂಭದ 3-&4 ತಿಂಗಳಲ್ಲಿ ಗಣನೀಯವಾಗಿ ಹೆಚ್ಚಳ ಆಗಿರುವುದು ಆತಂಕಕ್ಕೆ ಕಾರಣವಾಗಿದ್ದು, ಈ ಬಗ್ಗೆ ಪೊಲೀಸ್​ ಇಲಾಖೆ, ಜಿಲ್ಲಾಡಳಿತ, ಸ್ಥಳಿಯಾಡಳಿತಗಳು, ಹೆದ್ದಾರಿ ಪ್ರಾಧಿಕಾರ ಗಂಭೀರವಾಗಿ ಪರಿಗಣಿಸಬೇಕಾಗಿದೆ.
ಸಂಚಾರ ಠಾಣಾ ವ್ಯಾಪ್ತಿಯಲ್ಲಿ 14 ಸಾವು
ಕುಂದಾಪುರ ನಗರ ಹಾಗೂ ಗ್ರಾಮಾಂತರ ಪ್ರದೇಶವನ್ನೊಳಗೊಂಡ ಕುಂದಾಪುರ ಸಂಚಾರ ಠಾಣಾ ವ್ಯಾಪ್ತಿಯೊಂದರಲ್ಲಿಯೇ ಬರೋಬ್ಬರಿ 42 ಅಪಘಾತಗಳು ಸಂಭವಿಸಿದ್ದು, ಈ ಪೈಕಿ 14 ಮಂದಿ ಸಾವನಪ್ಪಿದ್ದಾರೆ. ಗಂಗೊಳ್ಳಿ, ಕೊಲ್ಲೂರು, ಬೈಂದೂರು, ಶಂಕರನಾರಾಯಣ ಠಾಣಾ ವ್ಯಾಪ್ತಿಗಳಲ್ಲಿ ತಲಾ 3 ಮಂದಿ ರಸ್ತೆ ಅಪಘಾತದಲ್ಲಿ ಮೃತಪಟ್ಟಿದ್ದಾರೆ.

ಅಪಘಾತಕ್ಕೆ ಕಾರಣಗಳೇನು?

ಮಿತಿಮೀರಿದ ವೇಗ, ಅಜಾಗರೂಕ ಚಾಲನೆ, ಪಾನಮತ್ತರಾಗಿ ಚಾಲನೆ, ರಸ್ತೆ ನಿಯಮ ಪಾಲನೆ ಮಾಡದಿರುವುದು ಪ್ರಮುಖ ಕಾರಣಗಳಾಗಿವೆ. ಕೆಲವೆಡೆಗಳಲ್ಲಿ ಅವೈಜ್ಞಾನಿಕ ಕಾಮಗಾರಿ, ಆಸಮರ್ಪಕ ಕಾಮಗಾರಿ, ರಸ್ತೆ ಹೊಂಡ ಗುಂಡಿಗಳು, ರಾತ್ರಿ ವೇಳೆ ಅಸಮರ್ಪಕ ಬೀದಿದೀಪದ ಸಮಸ್ಯೆಯಿಂದಾಗಿಯೂ ಅಪಘಾತಗಳು ಸಂಭವಿಸಿವೆ.
ಲಾರಿ ಮತ್ತಿತರ ಸರಕು ಸಾಗಾಟದ ವಾಹನಗಳಲ್ಲಿ ನಿಗದಿಗಿಂತ ಹೆಚ್ಚಿನ ಲೋಡು ಮಾಡಿರುವುದರಿಂದ ತುರ್ತು ಸಂದರ್ಭಗಳಲ್ಲಿ ವಾಹನ ನಿಯಂತ್ರಣಕ್ಕೆ ಬಾರದೆ ಅಪಘಾತಗಳು ಆಗಿವೆ. ಮದುವೆ, ಗೃಹ ಪ್ರವೇಶ ಮತ್ತಿತರ ಶುಭ-ಸಮಾರಂಭಗಳು ಹೆಚ್ಚಿವೆ. ಇದರಿಂದ ವಾಹನಗಳ ಓಡಾಟ ಜಾಸ್ತಿಯಿದೆ. ಬಾಳೆಬರೆ ಘಾಟಿಯಲ್ಲಿ ಸಂಚಾರ ಸ್ಥಗಿತ ಮಾಡಿರುವುದರಿಂದ ಹೆಮ್ಮಾಡಿ ಕೊಲ್ಲೂರು- ನಾಗೋಡಿ ಘಾಟಿ ರಸ್ತೆಯ ಮೇಲೆ ಹೆಚ್ಚಿನ ಒತ್ತಡ ಬೀಳುತ್ತಿದ್ದು, ಈ ರಸ್ತೆಯಲ್ಲಿ ಅಪಘಾತಗಳ ಸಂಖ್ಯೆಯೂ ಹೆಚ್ಚಾಗಿ ಸಾವು- ನೋವು ಜಾಸ್ತಿಯಾಗಿದೆ.

ನಿಗಾ ವಹಿಸಿದರೂ ನಿಯಂತ್ರಣವಿಲ್ಲ

ಪೊಲೀಸ್​ ಇಲಾಖೆಯಿಂದ ಪ್ರತಿ ವಾರ ಎಲ್ಲ ಠಾಣೆಗಳ ವ್ಯಾಪ್ತಿಯಲ್ಲಿ ವಿಶೇಷ ಅಭಿಯಾನ ನಡೆಸುತ್ತಿದ್ದಾರೆ. ಕುಂದಾಪುರ ಸಂಚಾರ ಠಾಣಾ ವತಿಯಿಂದ ವೇಗದ ಮಿತಿ ನಿಯಂತ್ರಣಕ್ಕೆ ಸ್ಪೀಡ್​ ರೆಡಾರ್​ಗನ್​ ಮೂಲಕ ನಿಗಾ ವಹಿಸಿದ್ದಾರೆ. ತೆಕ್ಕಟ್ಟೆ ತ್ರಾಸಿ, ನಾಯ್ಕನಕಟ್ಟೆ ಬಳಿಯ ಹೆದ್ದಾರಿಗಳಲ್ಲಿ ವಾಹನಗಳ ವೇಗ, ರ್ನಿಲಕ್ಷದ ಚಾಲನೆ ಬಗ್ಗೆ ನಿಗಾ ಇಡಲು ಸ್ಪೀಡ್​ ರೀಡಿಂಗ್​ ಯಂತ್ರವನ್ನು ಅಳವಡಿಸಲಾಗಿದೆ. ಹೆದ್ದಾರಿಯ ಬ್ಲಾಕ್​ಸ್ಪಾಟ್​ಗಳಾದ ಕುಂಭಾಶಿ, ನೆಹರೂ ಮೈದಾನ, ಸಂಗಮ್​ ಹಾಗೂ ತಲ್ಲೂರಲ್ಲಿ ಎಐ ಕ್ಯಾಮೆರಾ ಅಳವಡಿಸುವ ಬಗ್ಗೆ ಚಿಂತನೆ ನಡೆಸಲಾಗುತ್ತಿದ್ದು, ಹೆದ್ದಾರಿ ಪ್ರಾಧಿಕಾರಕ್ಕೂ ಇಲಾಖೆಯಿಂದ ಸುಧಾರಣೆಗೆ ಪ್ರಸ್ತಾವನೆ ಸಲ್ಲಿಸಲಾಗಿದೆ. ಮುಖ್ಯವಾಗಿ ಓವರ್​ ಲೋಡ್​ ಮಾಡಿಕೊಂಡು ಬರುವ ಲಾರಿಗಳು ತುರ್ತು ಸಂದರ್ಭ ಬ್ರೇಕ್​ ಹಿಡಿಯದ ಸ್ಥಿತಿಯಿದೆ. ಈ ಬಗ್ಗೆಯೂ ಜಾಗೃತಿ ಅಭಿಯಾನ ಆಗಾಗ್ಗೆ ಕೈಗೊಳ್ಳಲಾಗುತ್ತಿದೆ.

ಅಕ್ರಮ ಪಾರ್ಕಿಂಗ್​, ಬ್ಲಾಕ್​ ಸ್ಪಾಟ್​

ಹೆದ್ದಾರಿ, ಪ್ರಮುಖ ರಸ್ತೆಗಳಲ್ಲಿ ಅಕ್ರಮ ಪಾರ್ಕಿಂಗ್​, ಅಪಾಯಕಾರಿ ತಿರುವುಗಳ ಕಾರಣಗಳಿಂದ ಒಂದು ಜೀವ ಹೋದರೂ, ಅದು ಸರ್ಕಾರದ ವೈಫಲ್ಯ ಸೂಚಿಸುತ್ತದೆ. ಜನರ ಜೀವ, ಸುರಕ್ಷಿತ ವಾತಾವರಣ ಕಲ್ಪಿಸುವುದು ಸರ್ಕಾರದ ಕರ್ತವ್ಯವೆಂದು ಸುಪ್ರೀಂ ಕೋರ್ಟ್​ ಹೇಳಿದೆ. ಅದರಂತೆ ಬ್ಲಾಕ್​ಸ್ಪಾಟ್​, ಅಪಾಯಕಾರಿ ತಿರುವುಗಳು, ಕೆಲ ಜಂಕ್ಷನ್​ಗಳು, ಹೆದ್ದಾರಿಯ ಬಸ್​ ಬೇಗಳ ಅಭಿವೃದ್ಧಿ ಕಾರ್ಯಗಳು ಆದ್ಯತೆ ನೆಲೆಯಲ್ಲಿ ತ್ವರಿತಗತಿಯಲ್ಲಿ ಆಗಬೇಕಾಗಿದೆ.

ರಜಾ ದಿನ, ಪ್ರವಾಸಿಗರು ಇನ್ನಿತರ ಕಾರಣಗಳಿಂದ ವಾಹನಗಳ ಓಡಾಟ ಜಾಸ್ತಿಯಿದೆ. ಎಲ್ಲ ವಾಹನ ಸವಾರರು ಆದಷ್ಟು ಜಾಗರೂಕತೆಯಿಂದ ಓಡಿಸಿದರೆ ಅಪಘಾತಗಳನ್ನು ನಿಯಂತ್ರಿಸಬಹುದು. ಬೇಸಿಗೆ ಆಗಿರುವುದರಿಂದ ಮಧ್ಯಾಹ್ನದ ವೇಳೆ ನಿದ್ದೆ ಮಂಪರಿನಿಂದಲೂ 7&8 ಕಡೆ ಅಪಘಾತಗಳು ಆಗಿವೆ. ಹೆದ್ದಾರಿ ಅಥವಾ ಮುಖ್ಯ ರಸ್ತೆಗಳಲ್ಲಿ ಪಾದಚಾರಿಗಳು ರಸ್ತೆ ದಾಟುವಾಗ ಎಚ್ಚರಿಕೆ ವಹಿಸಿದರೆ ಒಳ್ಳೆಯದು.

— ಎಚ್​.ಡಿ.ಕುಲಕರ್ಣಿ, ಕುಂದಾಪುರ ಡಿವೈಎಸ್​ಪಿ

ವಿಜಯವಾಣಿ ನಂ.1 ದಿನ ಪತ್ರಿಕೆ | Vijayavani | Kannada News
www.vijayavani.net