ಮನೆಯೇ ಗ್ರಂಥಾಲಯ 'ಅಜೇಯ' ಶತಕ..!

ಮಾದರಿಯಾದ ಕಸಾಪ ಉಡುಪಿ ಘಟಕ

ನೂರಾರು ಮನಗಳಿಗೆ ಕನ್ನಡದ ಕನ್ನಡಕ

ಪ್ರಶಾಂತ ಭಾಗ್ವತ, ಉಡುಪಿ

ಜನರಲ್ಲಿ ಓದುವ ಹವ್ಯಾಸ ಕಡಿಮೆಯಾಗುತ್ತಿರುವ ಹಿನ್ನೆಲೆಯಲ್ಲಿ ರಾಜ್ಯ ಪುಸ್ತಕ ಪ್ರಾಧಿಕಾರ 'ಮನೆಗೊಂದು ಗ್ರಂಥಾಲಯ' ತೆರೆಯುವುದಾಗಿ ತಿಳಿಸಿದೆ. ಆದರೆ, 7 ತಿಂಗಳ ಹಿಂದೆಯೇ ಉಡುಪಿ ತಾಲೂಕು ಕನ್ನಡ ಸಾಹಿತ್ಯ ಪರಿಷತ್​ ಘಟಕವು ಮನೆಯೇ ಗ್ರಂಥಾಲಯ ಅಭಿಯಾನ ಆರಂಭಿಸಿದೆ.

ಘಟಕದ ಎಲ್ಲ ಪದಾಧಿಕಾರಿಗಳ ಸಹಕಾರದಲ್ಲಿ ಅಧ್ಯಕ್ಷ ರವಿರಾಜ್​ ಎಚ್​.ಪಿ., ಕೆಲವು ಸಂಕುಚಿತ ಮತಿಗಳ ಟೀಕೆಯ ನಡುವೆಯೂ ಸುವ್ಯವಸ್ಥಿತವಾಗಿ 'ಮನೆಯೇ ಗ್ರಂಥಾಲಯ' ಅಭಿಯಾನ ಮುಂದುವರಿಸಿದ್ದಾರೆ. ಉಡುಪಿಯಲ್ಲಿ ಆರಂಭಗೊಂಡ ಅಭಿಯಾನವೀಗ ರಾಜ್ಯಕ್ಕೇ ಮಾದರಿಯಾಗಿದೆ. ಈವರೆಗೆ ಉಡುಪಿ ತಾಲೂಕಿನ 118 ಮನೆಗಳಲ್ಲಿ ಗ್ರಂಥಾಲಯ ತೆರೆಯಲಾಗಿದೆ.

ಅಭಿಯಾನ ಉದ್ಘಾಟನೆ

ಮೇ 21, 2024ರಂದು ಉಡುಪಿ ಬೈಲೂರಿನ ರಂಗನಟ ವಿವೇಕಾನಂದ ಎನ್​. ಅವರ ಮನೆಯಲ್ಲಿ ನಾಡೋಜ ಕೆ.ಪಿ. ರಾವ್​ ಅವರು 'ಮನೆಯೇ ಗ್ರಂಥಾಲಯ ಅಭಿಯಾನಕ್ಕೆ ಚಾಲನೆ ನೀಡಿದ್ದರು. 100 ದಿನದಲ್ಲಿ 100 ಮನೆಗಳಲ್ಲಿ ಗ್ರಂಥಾಲಯ ತೆರೆಯುವ ಅಭಿಯಾನ ಪೂರ್ಣಗೊಂಡಿದೆ. ಇದೀಗ ವಾರಕ್ಕೊಂದು ಮನೆಯಲ್ಲಿ ಗ್ರಂಥಾಲಯ ತೆರೆಯುವ ಅಭಿಯಾನ ಮುಂದುವರಿದಿದೆ.

2,600ಕ್ಕೂ ಹೆಚ್ಚು ಪುಸ್ತಕ

ವೈಚಾರಿಕ ಲೇಖನ, ಕಾದಂಬರಿ, ಪುರಾಣ ಗ್ರಂಥ, ಆರೋಗ್ಯ ಮಾಹಿತಿಯ ಪುಸ್ತಕ, ಕವನ ಸಂಕಲನ, ಸಣ್ಣ ಕಥೆಗಳು ಹೀಗೆ ಜ್ಞಾನದಾಯಕವಾಗಬಲ್ಲ ಎಲ್ಲ ಬಗೆಯ ಪುಸ್ತಕಗಳನ್ನು ಉಚಿತವಾಗಿ ನೀಡಲಾಗಿದೆ. ಈ ಕಾರ್ಯಕ್ಕೆ ಅನೇಕರು ಸಹಕಾರವನ್ನೂ ನೀಡಿದ್ದಾರೆ. ಹಲವರ ಮನೆಗಳಲ್ಲಿ ಪುಸ್ತಕಗಳ ಸಂಗ್ರಹವೇ ಇದ್ದು, ಅವುಗಳನ್ನು ಓದುವವರಿಲ್ಲದೆ ಖಾಲಿ ಇತ್ತು. ಅಂತಹವರು ನೀಡಿದ ಪುಸ್ತಕ, ಇತ್ತೀಚೆಗಿನ ಯುವ ಬರಹಗಾರರು ನೀಡಿದ ಪುಸ್ತಕವನ್ನೇ ಅಭಿಯಾನದಲ್ಲಿ ನೀಡಲಾಗಿದೆ. ಈವರೆಗೆ 2,600ಕ್ಕೂ ಅಧಿಕ ಪುಸ್ತಗಳು ಮನೆಗಳಲ್ಲಿ ತೆರೆದ ಗ್ರಂಥಾಲಯಗಳಲ್ಲಿ ಇವೆ.

ವಿದೇಶದಲ್ಲೂ ಕನ್ನಡದ ಕಲರವ

ಸಾಗರೋತ್ತರ ದೇಶವೂ ಸಹ ಈ ಅಭಿಯಾನಕ್ಕೆ ಸ್ಪಂದಿಸಿದೆ. ಸಿಂಗಾಪೂರ್​ ಮತ್ತು ಮಲೇಷಿಯಾದಲ್ಲಿರುವ ಉಡುಪಿ ತಾಲೂಕಿನ 10 ಕುಟುಂಬಗಳಲ್ಲೂ ಸಹ ಕಸಾಪದ ವತಿಯಿಂದ 'ಮನೆಯೇ ಗ್ರಂಥಾಲಯ' ತೆರೆದು, ಕನ್ನಡದ ಪುಸ್ತಕ ನೀಡಲಾಗಿದೆ. ಯಾಂತ್ರೀಕೃತ ಬದುಕಿನ ನಡುವೆಯೂ ಆ ಕುಟುಂಬಗಳೀಗ ಕನ್ನಡದ ಪುಸ್ತಕಗಳ ಅವಲೋಕನ ಆರಂಭಿಸಿವೆ.

ಆಸ್ಪತ್ರೆ, ಸಾರ್ವಜನಿಕ ಸ್ಥಳವೂ ಓದುವ ಮನೆ!