ರಥಬೀದಿಯಲ್ಲಿ ಪ್ರೀ ವೆಡ್ಡಿಂಗ್​ ಶೂಟ್​ ನಿಷೇಧ

ಉಡುಪಿ ಪರ್ಯಾಯ ಪುತ್ತಿಗೆ ಮಠ ಆದೇಶ

ಸಾರ್ವಜನಿಕ ದೂರಿನ ಹಿನ್ನೆಲೆಯಲ್ಲಿ ಕ್ರಮ

* ಮುಜುಗರ, ಅಸಭ್ಯ ರೀತಿಯಲ್ಲಿ ಚಿತ್ರೀಕರಣ * ಪುಣ್ಯ ಸ್ಥಳದಲ್ಲಿ ಸ್ವಾರ್ಥ ಕಾರ್ಯಕ್ಕೆ ಬ್ರೇಕ್​

ವಿಜಯವಾಣಿ ಸುದ್ದಿಜಾಲ ಉಡುಪಿ

ಶ್ರೀಕೃಷ್ಣ ಮಠದ ರಥಬೀದಿಯಲ್ಲಿ ಸಾರ್ವಜನಿಕರಿಗೆ, ಭಕ್ತರಿಗೆ ತೊಂದರೆಯಾಗುವಂತೆ, ಮುಜುಗರ, ಅಸಭ್ಯವಾಗುವ ರೀತಿಯಲ್ಲಿ ವಿವಾಹ ಪೂರ್ವ ಫೋಟೋ ಹಾಗೂ ವಿಡಿಯೋ ಚಿತ್ರೀಕರಣ ಮಾಡಲಾಗುತ್ತಿದ್ದು, ಅದನ್ನು ಪರ್ಯಾಯ ಪುತ್ತಿಗೆ ಮಠ ನಿಷೇಧಿಸಿದೆ.

ದೇಗುಲದ ಮುಂದೆ ಲವ್​ ಸೀನ್​!

ಪ್ರೀ ವೆಡ್ಡಿಂಗ್​ ಶೂಟಿಂಗ್​ಗೆ ಕೆಲವರು ರಥಬೀದಿಯನ್ನೇ ಪ್ರಮುಖ ತಾಣವನ್ನಾಗಿ ಮಾಡಿಕೊಳ್ಳುತ್ತಿದ್ದಾರೆ. ಜನಸಂದಣಿಯ ನಡುವೆಯೇ ಯುವ ಜೋಡಿಗಳು ಸಿನಿಮೀಯ ರೀತಿಯಲ್ಲಿ ಗುಲಾಬಿ ಹೂ ಹಿಡಿದುಕೊಂಡು ಓಡಿ ಬರುವುದು, ಪರಸ್ಪರ ಅಪ್ಪಿಕೊಳ್ಳುವುದು, ಮುದ್ದಾಡುವುದು, ಅಲ್ಲಿಯೇ ಕೂದಲು ಬಾಚುವಂತಹ ಶೂಟಿಂಗ್​ ಮಾಡಲಾಗುತ್ತಿದೆ. ಮಂಡಿಯೂರಿ ಕುಳಿತು ಪ್ರಿಯತಮೆಗೆ ಪ್ರೇಮ ನಿವೇದನೆ ಮಾಡುವ ಲವ್​ ಸೀನ್​'ನ ಫೋಟೋ ಶೂಟ್​ ನಡೆಸಲಾಗುತ್ತಿದೆ.

ಶ್ರೀಕೃಷ್ಣ ಮಠದ ಸೊತ್ತು ಬಳಕೆ

ಇವೆಲ್ಲವೂ ಅಷ್ಟ ಮಠಗಳ ಮುಂದೆ, ಶ್ರೀಕೃಷ್ಣ ಮಠದ ರಥದ ಮುಂದೆ, ಕನಕ ಗೋಪುರದ ಮುಂದೆ ಜನರಿಗೆ ಅಸಹ್ಯವಾಗುವ ರೀತಿಯಲ್ಲಿ ಚಿತ್ರೀಕರಿಸಲಾಗುತ್ತಿದೆ. ಕೆಲವು ಫೋಟೋಗ್ರಾಫರ್ಸ್​ಗಳು ಮಠದ ಆವರಣದ ಸುತ್ತಮುತ್ತ ಇರುವ ಹಾಗೂ ಸುಲಭವಾಗಿ ಲಭಿಸುವ ಸಂಪ್ರದಾಯಬದ್ಧ ಮಠಗಳ ಪರಿಕರಗಳನ್ನು ಮದುವೆ ಫೋಟೋ ಶೂಟ್​ಗೆ ಬಳಿಸಿಕೊಳ್ಳುತ್ತಿರುವುದು ಸೂಕ್ತವಲ್ಲ. ಇತ್ತೀಚೆಗಿನ ಕೆಲ ತಿಂಗಳಿಂದ ಸ್ಥಳೀಯ ಹಾಗೂ ಹೊರ ರಾಜ್ಯದ ಕೆಲ ಪಡ್ಡೆ ಹುಡುಗರು ಇಂತಹ ಕೃತ್ಯ ನಡೆಸತೊಡಗಿದ್ದಾರೆ. ಇಂತಹ ವಾತಾವರಣ ಮತ್ತೆ ಕಂಡುಬಂದಲ್ಲಿ ಸ್ಥಳೀಯರು ಪೊಲೀಸರಿಗೆ ಅಥವಾ ಮಠದ ಆಡಳಿತದ ಗಮನ ತರಬೇಕೆಂದು ಶ್ರೀಕೃಷ್ಣ ಮಠದ ಪರ್ಯಾಯ ಆಡಳಿತ ಮಂಡಳಿ ವಿನಂತಿಸಿದೆ.