ಹಿಂದಿನ ಎಸ್ಪಿ ಡಾ. ಕೆ.ಅರುಣಕುಮಾರ್ ಅವರು ಕಲ್ಸಂಕ ವೃತ್ತದಲ್ಲಿ ಬ್ಯಾರಿಕೇಡ್ ಅಳವಡಿಸಿದ್ದರು. ಅವರ ಈ ಕ್ರಮದಿಂದ ಕೃತವಾಗಿ ವಾಹನ ದಟ್ಟಣೆ ಇನ್ನಷ್ಟು ಹೆಚ್ಚಾಗುತ್ತಿರುವ ಕುರಿತು ಕಳೆದ ವರ್ಷ ಡಿ.27ರಂದು ಉಡುಪಿ ಕಲ್ಸಂಕಕ್ಕೆ ಖಾಕಿ ಬೇಲಿ ಎಂಬ ಫೋಕಸ್ ಸ್ಟೋರಿ ಮೂಲಕ ಜಿಲ್ಲಾಡಳಿತದ ಗಮನ ಸೆಳೆಯಲಾಗಿತ್ತು. ಈ ವರದಿ ನಗರಸಭೆಯಲ್ಲೂ ಚರ್ಚೆಗೊಂಡು ಬ್ಯಾರಿಕೇಡ್ ತೆರವುಗೊಳಿಸಿ, ಈ ಹಿಂದಿನಂತೆ ಸಿಗ್ನಲ್ ಅಳವಡಿಸಲು ಸಲಹೆ ಬಂದಿತ್ತು. ಮುಂದಿನ 15 ದಿನದಲ್ಲಿ ಸಿಗ್ನಲ್ ಅಳವಡಿಸುವುದಾಗಿ ಶಾಸಕರೂ ತಿಳಿಸಿದ್ದರು. ಆದರೆ, ಅನೇಕ ತಿಂಗಳು ಕಳೆದರೂ ಸಿಗ್ನಲ್ ಲೈಟ್ ಅಳವಡಿಸಿಲ್ಲ, ಬ್ಯಾರಿಕೇಡ್ ಅಳವಡಿಸುವುದೂ ತಪ್ಪಿಲ್ಲ. ಇದೀಗ ನೂತನ ಎಸ್ಪಿ ಹರಿರಾಮ ಶಂಕರ್ ಅವರು ಕಲ್ಸಂಕದಲ್ಲಿ ಅಳವಡಿಸುವ ಬ್ಯಾರಿಕೇಡ್ ತೆರವು ಮಾಡಿಸುತ್ತಾರೋ ಎನ್ನುವುದನ್ನು ಕಾದು ನೋಡಬೇಕಿದೆ.
