ಉಡುಪಿ: ವಾರಾಂತ್ಯ ರಜೆಯ ಹಿನ್ನೆಲೆಯಲ್ಲಿ ಕಳೆದ 3 ದಿನಗಳಿಂದ ಕೃಷ್ಣ ಮಠಕ್ಕೆ ಸಹಸ್ರ ಸಂಖ್ಯೆಯಲ್ಲಿ ಭಕ್ತರು ಭೇಟಿ ನೀಡಿದ್ದಾರೆ. ಕೃಷ್ಣನ ದರ್ಶನಕ್ಕೆ ಸಾಗುವ ಮಾರ್ಗದಲ್ಲಿ ಉದ್ದನೆಯ ಸರತಿ ಸಾಲು ಇತ್ತು. ದೇಗುಲದ ರಥಬೀದಿ ಭಕ್ತರಿಂದ ತುಂಬಿಹೋಗಿತ್ತು.
ಸುತ್ತಮುತ್ತಲಿನ ಅಂಗಡಿಗಳಲ್ಲಿ ಪ್ರವಾಸಿಗರಿಂದ ಖರೀದಿ ಭರಾಟೆಯೂ ಜೋರಿತ್ತು. ಡಿಸೆಂಬರ್ ತಿಂಗಳ ಅಂತ್ಯದಲ್ಲಿ ರಾಜ್ಯದ ಶಾಲಾ ಮಕ್ಕಳ ಪ್ರವಾಸವೂ ಇರುವುದರಿಂದ ಕೃಷ್ಣ ಮಠದಲ್ಲಿ ಸಾವಿರಾರು ಸಂಖ್ಯೆಯಲ್ಲಿ ವಿದ್ಯಾರ್ಥಿಗಳು ಕಂಡುಬಂದರು. ಕನಕನ ಕಿಂಡಿ ಹಾಗೂ ಕನಕಗೋಪುರ ವೀಕ್ಷಣೆಗೆ ಜನರು ಮುಗಿಬಿದ್ದಿದ್ದರು. ಮಠದ ಪಾರ್ಕಿಂಗ್ ಸ್ಥಳವು ಪ್ರವಾಸಿಗರ ವಾಹನದಿಂದ ಭರ್ತಿಯಾಗಿದೆ.
