ಕಾಂಗ್ರೆಸ್​ ಕಚೇರಿಗೆ ಪೋಸ್ಟರ್​ ಅಂಟಿಸಲು ಬಿಜೆಪಿ ಯತ್ನ

ಕಾರ್ಯಕರ್ತರ ತಡೆದ ಉಡುಪಿ ಪೊಲೀಸರು | ಕಡಿಯಾಳಿಯಲ್ಲಿ ಪ್ರತಿಭಟನೆ

ವಿಜಯವಾಣಿ ಸುದ್ದಿಜಾಲ ಉಡುಪಿ
ಬಿಜೆಪಿ ಅಧಿಕಾರಕ್ಕೆ ಬಂದರೆ ಸಂವಿಧಾನ ಬದಲಾಯುಸುತ್ತಾರೆ ಎಂಬ ಕಾಂಗ್ರೆಸ್ಸಿಗರ ಆರೋಪ ಖಂಡಿಸಿ ಜಿಲ್ಲಾ ಕಾಂಗ್ರೆಸ್​ ಕಚೇರಿಗೆ ಪೋಸ್ಟರ್​ ಅಂಟಿಸಿ, ಪ್ರತಿಭಟಿಸಲು ಮುಂದಾದ ಜಿಲ್ಲಾ ಬಿಜೆಪಿ ಕಾರ್ಯಕರ್ತರನ್ನು ಪೊಲೀಸರು ಸೋಮವಾರ ತಡೆಹಿಡಿದ ಘಟನೆ ನಡೆಯಿತು.

ಇತ್ತೀಚೆಗೆ ಕಾಂಗ್ರೆಸ್​ ವರಿಷ್ಠರೂ ಸೇರಿದಂತೆ ರಾಜ್ಯ ನಾಯಕರು ಸಂವಿಧಾನದ ವಿಚಾರವಾಗಿ ಬಿಜೆಪಿಯ ಹಾಗೂ ಪ್ರಮುಖ ನಾಯಕರ ಹೆಸರು ಕೆಡಿಸುವ ಯತ್ನ ಮಾಡುತ್ತಿದ್ದಾರೆ. ಸಂವಿಧಾನವನ್ನು ನಿತ್ಯ ಉಲ್ಲಂಘಿಸಿದವರು ಕಾಂಗ್ರೆಸ್​ನವರೇ ಆಗಿದ್ದಾರೆ ಎಂದು ಪ್ರತ್ಯಾರೋಪಿಸಿ, ನಾಲ್ಕು ಪ್ರಮುಖ ಪ್ರಶ್ನೆಗಳನ್ನು ಹೊಂದಿರುವ ಪೋಸ್ಟರ್​ಅನ್ನು ಬಿಜೆಪಿ ಸಿದ್ಧಪಡಿಸಿತ್ತು. ಅದನ್ನು ಕಾಂಗ್ರೆಸ್​ ಕಚೇರಿಗೆ ಅಂಟಿಸಲು ತೆರಳುತ್ತಿದ್ದಾಗ ಜಿಲ್ಲಾ ಬಿಜೆಪಿ ಕಚೇರಿ ಮುಭಾಂಗದ ಕಡಿಯಾಳಿ ಕ್ರಾಸ್​ ಬಳಿ ಪೊಲೀಸರು ತಡೆ ಹಿಡಿದರು.

ರಾಹುಲ್​ ಗಾಂಧಿ, ಮಲ್ಲಿಕಾರ್ಜುನ ರ್ಖಗೆ ಹಾಗೂ ಸಿದ್ದರಾಮಯ್ಯ ಅವರನ್ನು ಪ್ರಶ್ನಿಸಿರುವ 4 ಪೋಸ್ಟರ್​ಗಳನ್ನು ಹಿಡಿದು ಬಿಜೆಪಿ ಜಿಲ್ಲಾಧ್ಯಕ್ಷ ಕಿಶೊರಕುಮಾರ್​ ನೇತೃತ್ವದಲ್ಲಿ ಕಾರ್ಯಕರ್ತರು ಪ್ರತಿಭಟಿಸಿದರು. ಈ ವೇಳೆ ಡಿವೈಎಸ್ಪಿ ಪ್ರಭು ಡಿ.ಟಿ., ಮಣಿಪಾಲ ಠಾಣೆ ಇನ್ಸ್​ಪೆಕ್ಟರ್​ ದೇವರಾಜ್​, ಪಿಎಸ್​ಐ ರಾಘವೇಂದ್ರ ಸಿ., ಸೀಮಾ ಬಿ. ಹಾಗೂ ಇನ್ನಿತರ ಪೊಲೀಸ್​ ಅಧಿಕಾರಿ ಹಾಗೂ ಸಿಬ್ಬಂದಿ ತಡೆಹಿಡಿದರು.

ಪ್ರತಿಭಟನೆಯಲ್ಲಿ ಜಿಲ್ಲಾ ಪ್ರ.ಕಾರ್ಯದರ್ಶಿಗಳಾದ ದಿನಕರ ಶೆಟ್ಟಿ ಹೆರ್ಗ, ರೇಶ್ಮಾ ಯು. ಶೆಟ್ಟಿ, ಸಂಧ್ಯಾ ರಮೇಶ್​, ನಳಿನಿ ಪಿ. ರಾವ್​, ಶ್ಯಾಮಲಾ ಕುಂದರ್​, ಶ್ರೀನಿಧಿ ಹೆಗ್ಡೆ, ಶಿವಕುಮಾರ್​ ಅಂಬಲಪಾಡಿ ಹಾಗೂ ಅನೇಕ ಕಾರ್ಯಕರ್ತರು ಇದ್ದರು.

ಏನಿದೆ ನಾಲ್ಕು ಪೋಸ್ಟರ್​ನಲ್ಲಿ?

• ತುರ್ತು ಪರಿಸ್ಥಿತಿಯಲ್ಲಿ ಸಂವಿಧಾನಕ್ಕೆ ಕಾಂಗ್ರೆಸ್​ ಮಾಡಿದ್ದ ದ್ರೋಹಕ್ಕೆ ರಾಹುಲ್​ ಗಾಂಧಿ ಕ್ಷಮೆ ಕೇಳಲಿ.
• ತುರ್ತು ಪರಿಸ್ಥಿತಿ ಹೇರಿ ಸಂವಿಧಾನದ ದುರ್ಬಳಕೆ ಮಾಡಿಕೊಂಡಿದ್ದ ಇಂದಿರಾ ಗಾಂಧಿ ಪರವಾಗಿ ಮಲ್ಲಿಕಾರ್ಜುಕ ರ್ಖಗೆ ಕ್ಷಮೆ ಕೇಳಲಿ.
• ಜೆಡಿಎಸ್​ನಲ್ಲಿದ್ದಾಗ ತುರ್ತು ಪರಿಸ್ಥಿತಿ ವಿರೋಧಿಸಿದ್ದ, ಈಗ ಕಾಂಗ್ರೆಸ್​ನಲ್ಲಿ ಮುಖ್ಯಮಂತ್ರಿಯಾಗಿದ್ದುಕೊಂಡು ದಿವ್ಯ ಮೌನ ವಹಿಸಿರುವ ಸಿದ್ದರಾಮಯ್ಯ ಕ್ಷಮೆ ಕೇಳಲಿ.
• ಸಂವಿಧಾನದ ಬಗ್ಗೆ ಕಾಂಗ್ರೆಸ್​ ನಾಯಕರಿಗೆ ಮಾತನಾಡಲು ನೈತಿಕತೆ ಎಲ್ಲಿದೆ?