ಹೊಸಪೇಟೆ: ಹೊಸಪೇಟೆ ಸಿಡಿಪಿಒ ಸ್ಥಾನಕ್ಕೆ ಒಬ್ಬರು ಇಬ್ಬರು ಅಧಿಕಾರಿಗಳ ಮಧ್ಯೆ ಹಗ್ಗಜಗ್ಗಾಟ ಶುರುವಾಗಿದೆ. ಒಬ್ಬರು ವರ್ಗವಾಗಿ ಬಂದರೆ, ಮತ್ತೊಬ್ಬರು ಕರ್ನಾಟಕ ಆಡಳಿತ ನ್ಯಾಯ ಮಂಡಳಿಯಿಂದ ತಡೆಯಾಜ್ಞೆ ತಂದಿದ್ದಾರೆ. ಅಲ್ಲದೇ, ಸೋಮವಾರ ಇಬ್ಬರು ಅಧಿಕಾರಿಗಳು ಕಚೇರಿಗೆ ಆಗಮಿಸಿ, ಆಡಳಿತ ನಡೆಸಿದ್ದರಿಂದ ಸಿಬ್ಬಂದಿಗಳು ಗೊಂದಲಕ್ಕೀಡಾಗುವಂತಾಯಿತು.
ಹೊಸದಾಗಿ ವರ್ಗಾವಣೆಯಾಗಿರುವ ಬಂದಿರುವ ಸಿಂಧು ಅಂಗಡಿ ಅವರು ಆಗಮಿಸಿದ ಬಳಿಕ ಹಿಂದಿನ ಸಿಡಿಪಿ ಬಿ.ಟಿ.ಭೋಗೇಶ ಎಂದಿನಂತೆ ಕಚೇರಿಗೆ ಆಗಮಿಸಿದಾಗ ಸಿಬ್ಬಂದಿ ಕ್ಷಣಕಾಲ ಚಕಿತರಾದರು. ಸಿಂಧು ಅವರು ಸಿಡಿಪಿಒ ಕೋಠಡಿಯಲ್ಲಿ ಕುಳಿತಿದ್ದರೆ, ಬಿ.ಟಿ.ಭೋಗೇಶ್ ಹಾಜರಿ ಪುಸ್ತಕಕ್ಕೆ ಸಹಿ ಮಾಡಿ, ಕೆಲವೊತ್ತು ಸಿಬ್ಬಂದಿ ವಿಭಾಗದಲ್ಲಿ ಕುಳಿತಿದ್ದರು. ಕೆಲ ಸಮಯದ ಬಳಿಕ ಭೋಗೇಶ ಅವರು ಇಲಾಖೆಯ ವಾಹನದಲ್ಲಿ ಕಾರಿನಲ್ಲಿ ಫೀಲ್ಡ್ ವಿಸಿಟ್ಗೆ ತೆರಳಿದರು ಎಂದು ಹೆಸರು ಹೇಳಲಿಚ್ಛಿಸದ ಸಿಬ್ಬಂದಿಯೊಬ್ಬರು ಮಾಹಿತಿ ನೀಡಿದರು.
ಈ ವೇಳೆ ಇಬ್ಬರೂ ಒಂದೊಂದು ಕಡತ ಕೇಳುತ್ತಿದ್ದರೆ, ಯಾರ ಮಾತು ಕೇಳಬೇಕು ಎಂಬ ಪ್ರಶ್ನೆ ಕಾಡುತ್ತಿತ್ತು. ಈ ಸುದ್ದಿ ಅಂಗನವಾಡಿ ಮೇಲ್ವಿಚಾಕರು, ಕಾರ್ಯಕರ್ತರಿಗೂ ಹರಡಿದ್ದರಿಂದ ಯಾರ ಆದೇಶ ಪಾಲಿಸಬೇಕು ಎಂಬ ಗೊಂದಲಕ್ಕೆ ಸಿಲುಕಿದ್ದರು. ವಿವಿಧ ಕೆಲಸಕಾರ್ಯಗಳ ನಿಮಿತ್ತ ಕಚೇರಿಗೆ ಬರುವ ಸಾರ್ವಜನಿಕರು ಇಬ್ಬರು ಅಧಿಕಾರಿಗಳನ್ನು ಕಂಡು ಬೆರಗಾಗುತ್ತಿದ್ದಾರೆ.
