ಹಳೆಯದಾದ ಈ ಮಳಿಗೆಗಳನ್ನು ತಾತ್ಕಾಲಿಕವಾಗಿ ಸಿಮೆಂಟ್ ಇಟ್ಟಿಗೆಯಿಂದ ಗೋಡೆ ನಿರ್ಮಿಸಿ, ಛಾವಣಿಗೆ ಸಿಮೆಂಟ್ ಶೀಟ್ಗಳನ್ನು ಹಾಕಲಾಗಿತ್ತು. ಮಳಿಗೆ ಮುಂಭಾಗ ಸಜ್ಜಾ ನಿರ್ಮಿಸಲಾಗಿತ್ತು. ಆದರೆ ದಿನ ಕಳೆದಂತೆ ಕಟ್ಟಡದ ನಿರ್ವಹಣೆ ಇಲ್ಲದೆ ಶಿಥಿಲಾವಸ್ಥೆ ತಲುಪಿದ್ದವು. ಖಾಲಿಯಾಗಿದ್ದ ಶಿಥಿಲ ಮಳಿಗೆಗಳ ಸಜ್ಜಾ ಕೆಳಭಾಗದಲ್ಲಿ ಕೆಲ ಬೀದಿಬದಿ ವ್ಯಾಪಾರಿಗಳು ಹಣ್ಣು, ತರಕಾರಿ, ಸೊಪ್ಪು, ಹೂವು ಮಾರಾಟ ಮಾಡಿ ಜೀವನ ಸಾಗಿಸುತ್ತಿದ್ದರು. ಆದರೆ ಶಿಥಿಲಗೊಂಡಿದ್ದ ಕಟ್ಟಡದ ಕಾಂಕ್ರೀಟ್ನಿಂದ ನಿರ್ಮಿಸಿದ್ದ ಸಜ್ಜಾ ಮಧ್ಯಾಹ್ನ ಕುಸಿದು ಬಿದ್ದಿದೆ. ಈ ವೇಳೆ ವ್ಯಾಪಾರ ವಹಿವಾಟಿನಲ್ಲಿ ತೊಡಗಿದ್ದ ಅಮರನಾಥ್, ನಜೀರ್, ಜ್ಯೋತಿ ಹಾಗೂ ಗ್ರಾಹಕರಾದ ಲೀಲಮ್ಮ, ಶಿಲ್ಪಾ ಮೇಲೆ ಅವಶೇಷ ಕುಸಿದು ಬಿದ್ದಿದೆ. ಪರಿಣಾಮ ಅಮರನಾಥ್ ಸ್ಥಳದಲ್ಲೇ ಮೃತರಾದರು. ತಕ್ಷಣ ಕ್ರೇನ್ ಮೂಲಕ ಅವಶೇಷಗಳಡಿಯಲ್ಲಿ ಸಿಲುಕಿದ್ದ ನಜೀರ್, ಲೀಲಮ್ಮ, ಜ್ಯೋತಿ ಅವರನ್ನು ಬೇಲೂರು ಸರ್ಕಾರಿ ಆಸ್ಪತ್ರೆಗೆ ಕರೆದೊಯ್ದು ಚಿಕಿತ್ಸೆ ಕೊಡಿಸಲಾಯಿತು. ಹೆಚ್ಚಿನ ಚಿಕಿತ್ಸೆಗಾಗಿ ಹಾಸನದ ಹಿಮ್ಸ್ ಆಸ್ಪತ್ರೆಗೆ ದಾಖಲಿಸಲಾಗಿತ್ತು. ಚಿಕಿತ್ಸೆಗೆ ಸ್ಪಂದಿಸದೆ ನಜೀರ್ ಕೊನೆಯುಸಿರೆಳೆದರು. ಲೀಲಮ್ಮ, ಜ್ಯೋತಿ ಅವರಿಗೆ ಐಸಿಯುನಲ್ಲಿ ಚಿಕಿತ್ಸೆ ನೀಡಲಾಗುತ್ತಿದೆ. ಶಿಲ್ಪಾ ಅವರಿಗೆ ತಾಲೂಕು ಆಸ್ಪತ್ರೆಯಲ್ಲಿ ಚಿಕಿತ್ಸೆ ಮುಂದುವರಿದಿದೆ.
