ಚಿಕ್ಕಬಳ್ಳಾಪುರ: ಕ್ಷೇತ್ರದಲ್ಲಿ ಸೂರಿಲ್ಲದೇ ಗುಡಿಸಲು ಮನೆಯಲ್ಲಿರಬಾರದು, ಗುಡಿಸಲು ಮುಕ್ತ ತಾಲೂಕುನ್ನಾಗಿಸಲಾಗುತ್ತದೆ ಎಂಬುದಾಗಿ ಜನಪ್ರತಿನಿಧಿಗಳು ಮತ್ತು ಅಧಿಕಾರಿಗಳು ಭಾಷಣಗಳಲ್ಲಿ ಬೊಬ್ಬೆ ಹೊಡೆಯುತ್ತಿದ್ದಾರೆ. ಇದರ ನಡುವೆಯೂ ಗುಡಿಸಲಿನಲ್ಲಿ ವಾಸ ಮಾಡುವವರ ಸಂಖ್ಯೆ ತ್ವರಿತವಾಗಿ ಕಡಿಮೆಯಾಗುತ್ತಿಲ್ಲ. ಇದಕ್ಕೆ ಬಾಗೇಪಲ್ಲಿ ತಾಲೂಕಿನ ಗಿರಿಯಪ್ಪಲ್ಲಿನ ಪರಿಶಿಷ್ಟ ಜನಾಂಗಕ್ಕೆ ಸೇರಿದ ಕುಟುಂಬ ಒಂದು ನಿದರ್ಶನ.
ಗ್ರಾಮದಲ್ಲಿ ಪರಿಶಿಷ್ಟ ಜನಾಂಗದ ಶ್ರೀನಿವಾಸ್ ಕಳೆದ 20 ವರ್ಷಗಳಿಂದಲೂ ಮನೆ ಮಂಜೂರಾತಿಗಾಗಿ ಸ್ಥಳೀಯ ಜನಪ್ರತಿನಿಧಿಗಳು, ಅಧಿಕಾರಿಗಳಿಗೆ ಮನವಿ ಸಲ್ಲಿಸಿದ್ದಾರೆ. ಆದರೆ, ಸ್ಪಂದನೆ ಸಿಕ್ಕಿಲ್ಲ. ಸರ್ಕಾರದಿಂದ ಮಂಜೂರಾತಿ ಇಲ್ಲ ಎಂಬ ಉತ್ತರದಲ್ಲಿ ಕಾಲಹರಣ ಮಾಡಲಾಗುತ್ತಿದೆ. ಮತ್ತೊಂದೆಡೆ ರಾಜ್ಯ ಸರ್ಕಾರವು ಪರಿಶಿಷ್ಟ ಜಾತಿ ಮತ್ತು ಪಂಗಡದ ಜನಾಂಗಕ್ಕೆ ವಸತಿ ಯೋಜನೆಯಡಿ ಬೇಡಿಕೆಗೂ ಮೀರಿ ಮನೆಗಳನ್ನು ಮಂಜೂರು ಮಾಡಿರುವ ಅಂಕಿ ಅಂಶಗಳನ್ನು ಹೇಳುತ್ತಲೇ ಇದೆ.
ಬಾಗೇಪಲ್ಲಿ ಕ್ಷೇತ್ರದಲ್ಲಿರುವ ಯಾವೊಬ್ಬ ಬಡವನೂ ಸರ್ಕಾರಿ ವಸತಿ ಯೋಜನೆಯಿಂದ ವಂಚಿತರಾಗಬಾರದು, ಮನೆ ಇಲ್ಲವೆಂದು ಅರ್ಜಿ ಸಲ್ಲಿಸಿದರೆ ತಕ್ಷಣವೇ ಮನೆ ಮಂಜೂರು ಮಾಡಿಕೊಡುತ್ತೇವೆ. ಬಡವರ ಸೇವೆಯೇ ನನ್ನ ಮುಖ್ಯ ಗುರಿ ಎಂದು ವೇದಿಕೆಯ ಭಾಷಣಗಳಲ್ಲಿ ಬೊಬ್ಬೆ ಹೊಡೆಯುವ ರಾಜಕಾರಣಿಗಳು, ಈಗಲಾದರೂ ಗಿರಿಯಪ್ಪಲ್ಲಿನ ಈ ಬಡಪಾಯಿ ಅಳಲನ್ನು ಕೇಳಿಸಿಕೊಳ್ಳಬೇಕಾಗಿದೆ.
