ಪರಮೇಶ್ವರ್​ಗೆ ಮಠಾಧೀಶರ ಸಾಥ್​

ನಗರದ ಕೊಲ್ಹಾಪುರದಮ್ಮ ಸಮುದಾಯಭವನದಲ್ಲಿ ಗುರುವಾರ ಜಂಟಿ ಸುದ್ದಿಗೋಷ್ಠಿಯಲ್ಲಿ ಮಾತನಾಡಿದ ಎಲೆರಾಂಪುರ ಕುಂಚಿಟಿಗ ಮಹಾಸಂಸ್ಥಾನ ಡಾ.ಹನುಮಂತನಾಥ ಸ್ವಾಮೀಜಿ, 2013ರ ವಿಧಾನಸಭಾ ಚುನಾವಣೆ ಸಂದರ್ಭದಲ್ಲಿ ಕೆಪಿಸಿಸಿ ಅಧ್ಯಕ್ಷರಾಗಿ ಪಕ್ಷ$ವನ್ನು ಮುನ್ನಡೆಸಿದ್ದ ಪರಮೇಶ್ವರ್​ ರಾಜ್ಯದ ಉದ್ದಗಲಕ್ಕು ಪ್ರವಾಸ ಮಾಡಿ ಪಕ್ಷವನ್ನು ಅಧಿಕಾರಕ್ಕೆ ತರುವಲ್ಲಿ ಯಶಕಂಡಿದ್ದರು. ಆದರೆ, ದುರಾದೃಷ್ಟವಶಾತ್​ ತಮ್ಮ ಕ್ಷೇತ್ರದಲ್ಲಿ ಸೋಲುಕಂಡಿದ್ದರು.

ಅವತ್ತು ಹೈಕಮಾಂಡ್​ ಪರಮೇಶ್ವರ್​ಗೆ ಸಿಎಂ ಮಾಡುತ್ತೀವಿ ಅನ್ನುವ ಭರವಸೆ ಕೊಟ್ಟಿತ್ತು. ಆ ಮಾತು ಸತ್ಯವಾಗಬೇಕಾದರೆ ಪರಮೇಶ್ವರ್​ರನ್ನು ಸಿಎಂ ಮಾಡಬೇಕು. ಹೈಕಮಾಂಡ್​ ತನ್ನ ಮಾತಿಗೆ ಬದ್ಧ ಎಂಬ ನಿಲುವನ್ನು ತೋರಿಸಲು ಸದಾವಕಾಶವಿದು ಎಂಬುದು ನಮ್ಮ ಅಭಿಪ್ರಾಯ ಎಂದರು.

ಡಿ.ಕೆ.ಶಿವಕುಮಾರ್​ಗೆ ಬೇರೆ ಕಾರಣಗಳಿಂದ ಸಿಎಂ ಸ್ಥಾನ ಕೈತಪ್ಪಿದ ಪಕ್ಷದಲ್ಲಿ ಅಥವಾ ಹೈಕಮಾಂಡ್​ ಕೈಗೊಳ್ಳುವ ತೀರ್ಮಾನ ಒಳ್ಳಯದಾಗಿದ್ದಲ್ಲಿ ಪರಮೇಶ್ವರ್​ಗೆ ಸಿಎಂ ಸ್ಥಾನ ಕೊಡಿ ಎಂಬುದು ನಮ್ಮ ಒತ್ತಾಯವಾಗಿದೆ. ಸಿಎಂ ಆಗಿ ಜಿಲ್ಲೆಗೆ ಹಾಗೂ ರಾಜ್ಯ ಕೊಡುಗೆ ನೀಡಬೇಕೆಂಬ ಆಸೆ ಅವರದ್ದಾಗಿದೆ. ಈ ಬಗ್ಗೆ ಹಲವು ಬಾಗಿ ನಮ್ಮ ಬಳಿ ಮನದಾಳದ ಮಾತುಗಳನ್ನಾಡಿದ್ದಾರೆ. ಹೈಕಮಾಂಡ್​ ಸಿಎಂ ಅಧಿಕಾರ ಕೊಟ್ಟರೆ ಸಮಗ್ರವಾಗಿ ಅಧಿಕಾರ ನಿಭಾಯಿಸುತ್ತೇನೆ ಎಂಬ ಮಾತುಗಳನ್ನು ನಮ್ಮ ಬಳಿ ಹಂಚಿಕೊಂಡಿದ್ದಾರೆ. ಈ ಹಿನ್ನೆಲೆಯಲ್ಲಿ ಹೈಕಮಾಂಡ್​ ಮನವೊಲಿಸಲು ಜಿಲ್ಲೆಯ ಮಠಾಧಿಪತಿಗಳು ನಿರ್ಧರಿಸಿದ್ದೇವೆ ಎಂದರು.

ದೆಹಲಿಗೆ ಸ್ವಾಮೀಜಿಗಳ ನಿಯೋಗ: ನಮ್ಮ ಜಿಲಾ ್ಲಉಸ್ತುವಾರಿ ಸಚಿವರು ಸಿಎಂ ಆಗಲಿ ಎಂಬ ಸಂಕಲ್ಪ ಮಾಡಿದ್ದೇವೆ. ರಾಜ್ಯ ಕಾಂಗ್ರೆಸ್​ ಪಕ್ಷದೊಳಗೆ ನಾಯಕತ್ವ ಬದಲಾವಣೆ ಭಾವನೆ ಕಾಣುತ್ತಿದ್ದೇವೆ. ಹಾಗಾಗಿ, ಸಿಎಂ ಆಗಲಿ ಎಂಬ ಕನಸು ಇಟ್ಟುಕೊಂಡಿರುವ ಪರಮೇಶ್ವರ್​ ಪರ ನಾವೆಲ್ಲಾ ಮಠಾಧೀಶರು ದೆಹಲಿಗೆ ಹೋಗಿ ಹೈಕಮಾಂಡ್​ ಮೇಲೆ ಒತ್ತಡ ಹೇರುತ್ತೇವೆ ಎಂದು ಬೆಳ್ಳಾವಿ ಕಾರದ ಮಠದ ಕಾರದ ಶ್ರೀ ವೀರಬಸವ ಸ್ವಾಮೀಜಿ ಹೇಳಿದರು.

ಸುದ್ದಿಗೋಷ್ಠಿಯಲ್ಲಿ ಸಿದ್ದರಬೆಟ್ಟದ ಶ್ರೀ ವೀರಭದ್ರ ಶಿವಾಚಾರ್ಯಸ್ವಾಮೀಜಿ, ಅರೆಶಂಕರಮಠದ ಶ್ರೀಸಿದ್ದರಾಮಚೈತನ್ಯಸ್ವಾಮೀಜಿ, ವಿಶ್ವಕರ್ಮ ಮಠದ ಶ್ರೀ ನೀಲಕಂಠಸ್ವಾಮೀಜಿ, ಗೋಡೆಕೆರೆಯ ಮೃತ್ಯುಂಜಯಸ್ವಾಮೀಜಿ, ಬಿಂದುಶೇಖರ ಓಡೆಯರ್​, ಗೊಲ್ಲಹಳ್ಳಿಯ ಶ್ರೀ ವಿದ್ಯಾವಿಭವ ಸ್ವಾಮೀಜಿ ಸೇರಿದಂತೆ 25ಕ್ಕೂ ಹೆಚ್ಚು ಸ್ವಾಮೀಜಿಗಳು ಪಾಲ್ಗೊಂಡು ತಮ್ಮ ಅಭಿಪ್ರಾಯ ಹಂಚಿಕೊಂಡರು.