ಎಸ್ಸೆಸ್ಸೆಲ್ಸಿಯಲ್ಲಿ ಶೈಕ್ಷಣಿಕ ಜಿಲ್ಲೆಯ ಹೊಸ ದಾಖಲೆ

ತುಮಕೂರು ಶೈಕ್ಷಣಿಕ ಜಿಲ್ಲೆ ಶೇ.92.20 ದಾಖಲೆ ಫಲಿತಾಂಶ ಪಡೆದು ಕಳೆದ ಬಾರಿಗಿಂತ ಶೇ.24.90 ರಷ್ಟು ಹೆಚ್ಚು ವಿದ್ಯಾರ್ಥಿಗಳು ತೇರ್ಗಡೆ ಹೊಂದಿದ್ದಾರೆ. ಆದರೂ, ರಾಜ್ಯದಲ್ಲಿ 29ನೇ ಸ್ಥಾನಕ್ಕೆ ಕುಸಿದಿದೆ. ಕಳೆದ ಬಾರಿ 20ನೇ ಸ್ಥಾನದಲ್ಲಿತ್ತು.

ಮಧುಗಿರಿ ಶೈಕ್ಷಣಿಕ ಜಿಲ್ಲೆ ಶೇ.90.24 ವಿದ್ಯಾರ್ಥಿಗಳು ತೇರ್ಗಡೆ ಹೊಂದಿದ್ದು ಶೇ.29.25ರಷ್ಟು ಸರಾಸರಿ ಫಲಿತಾಂಶ ಹೆಚ್ಚಳವಾಗಿದೆಯಾದರೂ, ರಾಜ್ಯಕ್ಕೆ 34ನೇ ಸ್ಥಾನ ಪಡೆದಿದೆ. ಕಳೆದ ಬಾರಿ 28ನೇ ಸ್ಥಾನಗಳಿಸಿತ್ತು. ಒಟ್ಟಾರೆ ಸರಾಸರಿ ಫಲಿತಾಂಶದಲ್ಲಿ ಉತ್ತಮ ಸುಧಾರಣೆ ಕಂಡಿದೆಯಾದರೂ ತುಮಕೂರು ಹಾಗೂ ಮಧುಗಿರಿ ಶೈಕ್ಷಣಿಕ ಜಿಲ್ಲೆಗಳು ಇಡೀ ರಾಜ್ಯದಲ್ಲಿ ಸ್ಥಾನಗಳಿಕೆಯಲ್ಲಿ ಪತನ ಕಂಡಿವೆ.

ತುಮಕೂರು ಶೈಕ್ಷಣಿಕ ಜಿಲ್ಲೆಯಲ್ಲಿ ಪರೀಕ್ಷೆಗೆ 20466 ವಿದ್ಯಾರ್ಥಿಗಳು ಹಾಜರಾಗಿದ್ದು 18869 ವಿದ್ಯಾರ್ಥಿಗಳು ಮಾತ್ರ ತೇರ್ಗಡೆ ಹೊಂದಿದ್ದು ಸರಾಸರಿ ಶೇ.92.24 ಫಲಿತಾಂಶಗಳಿಸಿದೆ. ಮಧುಗಿರಿ ಶೈಕ್ಷಣಿಕ ಜಿಲ್ಲೆಯಲ್ಲಿ ಪರೀಕ್ಷೆಗೆ ಹಾಜರಾಗಿದ್ದ 11037 ವಿದ್ಯಾರ್ಥಿಗಳ ಪೈಕಿ 9960 ವಿದ್ಯಾರ್ಥಿಗಳು ಮಾತ್ರ ತೇರ್ಗಡೆ ಹೊಂದಿದ್ದಾರೆ.

ತುಮಕೂರು ನಗರದ ಶ್ರೀದೇವಿ ಸಮೂಹ ಶಿಕ್ಷಣ ಸಂಸ್ಥೆಯ ಶ್ರೀದೇವಿ ವಿದ್ಯಾಮಂದಿರದ ಸಾದಿಯಾಬಾನು (624) ರಾಜ್ಯಕ್ಕೆ ದ್ವೀತಿಯ ಟಾಪರ್​ ಶ್ರೇಯಕ್ಕೆ ಪಾತ್ರರಾಗಿದ್ದಾರೆ. ಕುಣಿಗಲ್​ ತಾಲೂಕಿನ ಸ್ಟೆಲ್ಲಾ ಮೇರಿಸ್​ನ ಜಿ.ವಿ.ಭೈರವಿ (622), ಬಿ.ಜಿ.ಚಂದನ (622), ಚಿಕ್ಕನಾಯಕನಹಳ್ಳಿ ತಾಲೂಕಿನ ಮೇಲನಹಳ್ಳಿ ಮೊರಾರ್ಜಿ ದೇಸಾಯಿ ವಸತಿಶಾಲೆಯ ಕೆ.ಯಶ್ವಂತ್​ (622) ಅಂಕಗಳಿಸಿದ್ದಾರೆ. ಇನ್ನೂ ಮಧುಗಿರಿ ಶೈಕ್ಷಣಿಕ ಜಿಲ್ಲೆಯ ಚಿರಾಗ್​ ಶಾಲೆಯ ಹರ್ಷಿತಾ (623) ರಾಜ್ಯಕ್ಕೆ ತೃತೀಯ ಟಾಪರ್​ ಆಗಿದ್ದಾರೆ.

73 ಸರ್ಕಾರಿ ಶಾಲೆಗಳಿಗೆ ಶೇ.100: ಈ ಬಾರಿ ತುಮಕೂರು ಶೈಕ್ಷಣಿಕ ಜಿಲ್ಲೆಯಲ್ಲಿ 73 ಸರ್ಕಾರಿ ಶಾಲೆಗಳು ಶೇ.100 ಫಲಿತಾಂಶ ದಾಖಲಿಸಿವೆ. 29 ಅನುದಾನಿತ, 54 ಅನುದಾನರಹಿತ ಶಾಲೆಗಳು ಶೇ.100 ಫಲಿತಾಂಶಗಳಿಸಿರುವುದು ವಿಶೇಷವೆನಿಸಿದೆ.