ಮುಳುಬಾಗಿಲು ಭಕ್ತರಿಂದ 7 ಟನ್​ ಬೆಲ್ಲ ಕೊಡುಗೆ

ತುಮಕೂರು: ಸಿದ್ದಗಂಗೆಯ ದಾಸೋಹಕ್ಕೆ ಕೋಲಾರ ಜಿಲ್ಲೆ ಮುಳುಬಾಗಿಲು ತಾಲೂಕಿನ ಭಕ್ತರು 7 ಟನ್​ ಬೆಲ್ಲವನ್ನು ಕೊಡುಗೆ ನೀಡಿದ್ದಾರೆ. ಶಿವಕುಮಾರ ಶ್ರೀಗಳ ಜನ್ಮದಿನ ಹಿನ್ನೆಲೆ ಕೋಲಾರ ಜಿಲ್ಲೆಯ ಮುಳುಬಾಗಿಲು, ಕಸಬಾ ಹೋಬಳಿಯ ಸುತ್ತಮುತ್ತಲಿನ ಗ್ರಾಮದ ಶ್ರೀಮಠದ ಹಳೇ ವಿದ್ಯಾರ್ಥಿಗಳು, ಭಕ್ತರು ಒಟ್ಟಾರೆ 25 ಟನ್​ ದವಸಧಾನ್ಯ, ತರಕಾರಿಯನ್ನು ಸಂಗ್ರಹಿಸಿ ದಾಸೋಹಕ್ಕೆ ದೇಣಿಗೆ ರೂಪದಲ್ಲಿ ನೀಡಿ ಭಕ್ತಿ ಸಮರ್ಪಣೆ ಮಾಡಿದ್ದಾರೆ.

ಅನ್ನ, ಅಕ್ಷರ, ಆಶ್ರಯ ಕಲ್ಪಿಸಿ ಬದುಕು ರೂಪಿಸಿದ ತ್ರಿವಿಧ ದಾಸೋಹಿ ಪೂಜ್ಯ ಶಿವಕುಮಾರ ಮಹಾಶಿವಯೋಗಿಗಳು ಅಂದರೆ ಶ್ರೀಮಠದ ಹಳೇ ವಿದ್ಯಾರ್ಥಿಗಳ ಪಾಲಿಗೆ ನಡೆದಾಡುವ ದೇವರು ಕಂಡಷ್ಟೇ ಭಕ್ತಿ, ಪ್ರೀತಿ. ಆರಾಧ್ಯದೈವನಿಗೆ ಗುರುವಂದನೆ ಸಲ್ಲಿಸಲು ಅವರ ಜನ್ಮದಿನದಂದ ನಾಡಿನೆಲ್ಲಡೆಯಿಂದ ಹರಿದುಬರುವ ಭಕ್ತರಿಗೆ ಶ್ರೀಮಠದಲ್ಲಿ ದಿನವಿಡೀ ದಾಸೋಹ ವ್ಯವಸ್ಥೆ ಮಾಡಲಾಗಿರುತ್ತೆ. ಈ ಮಹಾ ದಾಸೋಹಕ್ಕೆ ಉಪು$್ಪ, ಉಪ್ಪಿನಕಾಯಿ, ತರಕಾರಿ, ಅಕ್ಕಿ, ಸಕ್ಕರೆ, ಬೆಲ್ಲವನ್ನು ನೀಡಿ ಭಕ್ತರು ಗೌರವ ಸಮರ್ಪಣೆಯನ್ನು ಮಾಡುತ್ತಾರೆ.

ಈ ಬಾರಿ ಮುಳುಬಾಗಿಲಿನ ಸುತ್ತಮುತ್ತಲಿನ ಕಳ್ಳೀಪುರ, ಗೊಲ್ಲಹಳ್ಳಿ, ರಾಮಸಂದ್ರ, ಉರುಟಿಅಗ್ರಹಾರ, ವೇಮಗಲ್ಲು, ಕೋಲಾರ ನಗರದ ಭಕ್ತರು 7ಟನ್​ ಬೆಲ್ಲ, 5 ಕ್ವಿಂಟಾಲ್​ ರವೆ, 5 ಕ್ವಿಂಟಾಲ್​ ಹೆಸರುಬೇಳೆ, 15 ಕ್ವಿಂಟಾಲ್​ ಉಪು$್ಪ, 50 ಕ್ವಿಂಟಾಲ್​ ಅಕ್ಕಿ, 30 ಕ್ವಿಂಟಾಲ್​ ರಾಗಿ ಹಾಗೂ ತರಕಾರಿ, ಇತರೆ ಪದಾರ್ಥಗಳು ಎಲ್ಲವೂ ಸೇರಿ 25 ಟನ್​ ನಷ್ಟು ದವಸಧಾನ್ಯ ಹಾಗೂ ಇತರೆ ಪದಾರ್ಥಗಳನ್ನು ದಾಸೋಹಕ್ಕೆ ನೀಡಿ ಶ್ರೀಮಠದೆಡೆಗೆ ಅಪಾರ ಭಕ್ತಿ, ಪ್ರೀತಿಯನ್ನು ಮೆರೆದಿದ್ದಾರೆ.