ಭಾರತಾಂಭೆ ಭಾವಚಿತ್ರದ ವೈಭವದ ಮೆರವಣಿಗೆ "ತಿರಂಗಾ ಯಾತ್ರೆ'

ತುಮಕೂರು: 79ನೇ ಸ್ವಾತಂತ್ರ್ಯೊತ್ಸವದ ಅಂಗವಾಗಿ ತಿರಂಗ ಯಾತ್ರಾ ಸಮಿತಿ ವತಿಯಿಂದ ತ್ರಿವರ್ಣ ಧ್ವಜಗಳ ಪ್ರದರ್ಶನದೊಂದಿಗೆ ಭಾರತಾಂಭೆ ಭಾವಚಿತ್ರದ ವೈಭವದ ಮೆರವಣಿಗೆ ತಿರಂಗಾ ಯಾತ್ರೆ ಶುಕ್ರವಾರ ನಗರದಲ್ಲಿ ವಿಜೃಂಭಣೆಯಿಂದ ನೆರವೇರಿತು.

ಶಾಸಕರಾದ ಜಿ.ಬಿ.ಜ್ಯೋತಿಗಣೇಶ್​, ಬಿ.ಸುರೇಶ್​ಗೌಡ, ಹಿರೇಮಠಾಧ್ಯಕ್ಷ ಡಾ.ಶಿವಾನಂದ ಶಿವಾಚಾರ್ಯ ಸ್ವಾಮೀಜಿ, ಸಿದ್ಧರಬೆಟ್ಟದ ವೀರಭದ್ರ ಶಿವಾಚಾರ್ಯ ಸ್ವಾಮೀಜಿ, ಬೆಳ್ಳಾವಿ ಕಾರದ ಮಠದ ಕಾರದ ವೀರಬಸವ ಸ್ವಾಮೀಜಿ, ಮಹಾಲಕ್ಷಿ$್ಮ ಪೀಠದ ಜ್ಞಾನಾನಂದ ಸ್ವಾಮೀಜಿ, ಜಿಲ್ಲಾ ಬಿಜೆಪಿ ಅಧ್ಯಕ್ಷ ಎಚ್​.ಎಸ್​.ರವಿಶಂಕರ್​ ಹೆಬ್ಬಾಕ, ರಾಜ್ಯ ಕಾರ್ಯದರ್ಶಿ ಅಂಬಿಕಾ, ಜಿಪಂ ಮಾಜಿ ಅಧ್ಯಕ್ಷ ವೈ.ಎಚ್​.ಹುಚ್ಚಯ್ಯ ಮತ್ತಿತರರು ಇದರು.

ನಗರಪಾಲಿಕೆ ಆವರಣದಲ್ಲಿ ಡಾ.ಬಿ.ಆರ್​.ಅಂಬೇಡ್ಕರ್​ ಪುತ್ಥಳಿಗೆ ಮಾಲಾರ್ಪಣೆ ಮಾಡಿ ತಿರಂಗಾ ಯಾತ್ರೆ ಆರಂಭಿಸಲಾಯಿತು. ಈ ಸಂದರ್ಭದಲ್ಲಿ ಮಾತನಾಡಿದ ಶಾಸಕ ಜಿ.ಬಿ.ಜ್ಯೋತಿಗಣೇಶ್​, ದೇಶದ ಅಖಂಡತೆ, ಸಾರ್ವಭೌಮತೆ, ಅಸ್ಮಿತೆಯನ್ನು ಮೇಳೈಸುವ ದೇಶದ ಸ್ವಾತಂತ್ರ್ಯವನ್ನು ಅತ್ಯಂತ ಶ್ರದ್ಧೆ, ಭಕ್ತಿಯಿಂದ ಆಚರಿಸಲು, ವಿದ್ಯಾರ್ಥಿ, ಯುವಜನರಲ್ಲಿ ದೇಶಾಭಿಮಾನ ಮೂಡಿಸಲು ಈ ಯಾತ್ರೆ ಪ್ರೇರಣೆಯಾಗಿದೆ ಎಂದರು.

ಶಾಂತಿ, ಸಹಬಾಳ್ವೆ, ಐಕ್ಯತೆಗೆ ಹೆಸರಾದ ತುಮಕೂರು ನಗರದಲ್ಲಿ ಈ ಬಾರಿಯೂ ಎಲ್ಲಾ ಸಮಾಜದವರೂ ಒಟ್ಟುಗೂಡಿ ಸಂಭ್ರಮದಿಂದ ತಿರಂಗಾ ಯಾತ್ರೆಯಲ್ಲಿ ಭಾಗವಹಿಸಿದ್ದಾರೆ. ದೇಶದ ರಕ್ಷಣೆ, ಸಮಗ್ರತೆ, ಪ್ರಗತಿಗೆ ಎಲ್ಲರೂ ಸಂಕಲ್ಪ ಮಾಡೋಣ ಎಂದರು.

ನಗರದ ನಾನಾ ಸಂಘಸಂಸ್ಥೆಗಳ ಮುಖಂಡರು, ನಿವೃತ್ತ ಸೈನಿಕರು, ಎನ್​ಸಿಸಿ, ಸ್ಕೌಟ್ಸ್​-ಗೈಡ್ಸ್​ ಕೆಡೆಟ್​ಗಳು, ಕಾಲೇಜು ವಿದ್ಯಾರ್ಥಿಗಳು, ಕೈಗಾರಿಕೋದ್ಯಮಿಗಳು, ವಕೀಲರು, ವೈದ್ಯರು, ವರ್ತಕರು, ಶಿಕ್ಷಣ ಸಂಸ್ಥೆಗಳು, ಬ್ಯಾಂಕ್​ಗಳ ಮುಖಂಡರು ತ್ರಿವರ್ಣ ಧ್ವಜ ಪ್ರದರ್ಶಿಸುತ್ತಾ ಸಾಗಿದರು. ಜಾನಪದ ಕಲಾತಂಡಗಳ ಆಕರ್ಷಕ ಪ್ರದರ್ಶನ ಯಾತ್ರೆಯ ಸಂಭ್ರಮ ಹೆಚ್ಚಿಸಿತು. ಬಿಜಿಎಸ್​ ವೃತ್ತದಿಂದ ಆರಂಭಗೊಂಡು ಬಿ.ಹೆಚ್​.ರಸ್ತೆ, ಎಂ.ಜಿ.ರಸ್ತೆ, ಗುಂಚಿ ವೃತ್ತದ ಮೂಲಕ ಸಾಗಿ ಸ್ವಾತಂತ್ರ್ಯ ಚೌಕದಲ್ಲಿ ತಿರಂಗಾ ಯಾತ್ರೆ ಸಮಾರೋಪಗೊಂಡಿತು.

ಯಾತ್ರಾ ಸಮಿತಿ ಸಂಚಾಲಕ ಜಿ.ಆರ್​.ಸುರೇಶ್​, ಬಿಜೆಪಿ ಮುಖಂಡರಾದ, ಎಸ್​.ಶಿವಪ್ರಸಾದ್​, ಜಿಲ್ಲಾ ಯುವ ಮೋರ್ಚಾ ಅಧ್ಯಕ್ಷ ನವಚೇತನ್​, ನಗರ ಅಧ್ಯಕ್ಷ ಕೆ.ಧನುಷ್​, ವೀರಶೈವ ಸಹಕಾರ ಬ್ಯಾಂಕ್​ ಅಧ್ಯಕ್ಷ ಕೆ.ಜೆ.ರುದ್ರಪ್ಪ, ಎಪಿಎಂಸಿ ವ್ಯಾಪಾರಿಗಳ ಸಮುದಾಯದ ಆರ್​.ಎ.ಸುರೇಶ್​ಕುಮಾರ್​, ಹಿರಿಯ ವೈದ್ಯಾಧಿಕಾರಿ ಡಾ.ಕೆ.ಪಿ.ಸುರೇಶ್​ಬಾಬು, ದಲಿತ ಸಂಘರ್ಷ ಸಮಿತಿ ಜಿಲ್ಲಾಧ್ಯಕ್ಷ ಪಿ.ಎನ್​.ರಾಮಯ್ಯ, ಬಿಜೆಪಿ ಮುಖಂಡರಾದ ಸಂದೀಪ್​ಗೌಡ, ಟಿ.ಹೆಚ್​.ಹನುಮಂತರಾಜು, ಹೆಚ್​.ಎಂ.ರವೀಶಯ್ಯ, ಬಾವಿಕಟ್ಟೆ ನಾಗಣ್ಣ, ಸತ್ಯಮಂಗಲ ಜಗದೀಶ್​, ರುದ್ರೇಶ್​, ಗಣೇಶ್​ಪ್ರಸಾದ್​, ಅಕ್ಷಯ್​ ಚೌಧರಿ, ಎಚ್​.ಜಿ.ಸದಾಶಿವಯ್ಯ, ಸುರೇಶ್​ ರಾವ್​, ಕೇಶವಮೂರ್ತಿ ಇದ್ದರು.

15ಟಿಎಂಕೆ ತಿರಂಗಯಾತ್ರೆ

*ತುಮಕೂರಿನಲ್ಲಿ 79ನೇ ಸ್ವಾತಂತ್ರ್ಯೊತ್ಸವದ ಅಂಗವಾಗಿ ತಿರಂಗ ಯಾತ್ರಾ ಸಮಿತಿ ವತಿಯಿಂದ ತ್ರಿವರ್ಣ ಧ್ವಜಗಳ ಪ್ರದರ್ಶನದೊಂದಿಗೆ ಭಾರತಾಂಭೆ ಭಾವಚಿತ್ರದ ವೈಭವದ ಮೆರವಣಿಗೆ "ತಿರಂಗಾ ಯಾತ್ರೆ' ಶುಕ್ರವಾರ ನಗರದಲ್ಲಿ ವಿಜೃಂಭಣೆಯಿಂದ ನೆರವೇರಿತು.