ತುಳು ರಂಗಭೂಮಿಗೆ ಲಾಕ್‌ಡೌನ್ ಹೊಡೆತ

-ಪಿ.ಬಿ.ಹರೀಶ್ ರೈ ಮಂಗಳೂರು

ನಿಗದಿಯಾಗಿದ್ದ ಸಾವಿರಕ್ಕೂ ಅಧಿಕ ನಾಟಕ ಪ್ರದರ್ಶನ ರದ್ದು. ಬಿಡುಗಡೆಯಾಗದ ಐದಾರು ಸಿನಿಮಾ. ಶೂಟಿಂಗ್ ನಿಲ್ಲಿಸಿದ ಹತ್ತಾರು ಸಿನಿಮಾಗಳು. ಕಲೆಯನ್ನೇ ನಂಬಿ ಜೀವನ ನಡೆಸುತ್ತಿದ್ದ ನೂರಾರು ಕಲಾವಿದರಿಗೆ, ಬಂಡವಾಳ ಹೂಡಿದ ನಿರ್ಮಾಪಕರಿಗೆ ಆತಂಕದ ದಿನಗಳು.. ಇದು ತುಳು ರಂಗಭೂಮಿ ಮತ್ತು ಕೋಸ್ಟಲ್‌ವುಡ್‌ಗೆ ಕರೊನಾ ಲಾಕ್‌ಡೌನ್‌ನಿಂದ ಒದಗಿದ ದುಃಸ್ಥಿತಿ.

ತುಳು ನಾಟಕ ತಂಡಗಳಿಗೆ ಮಾರ್ಚ್, ಏಪ್ರಿಲ್ ಹಾಗೂ ಮೇ ತಿಂಗಳಲ್ಲಿ ಸುಗ್ಗಿ. ವಾರದಲ್ಲಿ ಕನಿಷ್ಠ 4-5 ಪ್ರದರ್ಶನ ಇರುತ್ತದೆ. ಮುಂಬೈ ಹಾಗೂ ಇತರ ರಾಜ್ಯದಲ್ಲಿರುವ ತುಳುವರು ರಜಾ ದಿನಗಳಲ್ಲಿ ಊರಿಗೆ ಬರುವ ಕಾರಣ ಇದೇ ಅವಧಿಯಲ್ಲಿ ಸಾಲುಸಾಲು ತುಳು ಸಿನಿಮಾಗಳು ಕೂಡ ಬಿಡುಗಡೆಗೊಳ್ಳುತ್ತವೆ. ಆದರೆ ಈಗ ತುಳು ರಂಗಭೂಮಿ ಮತ್ತು ಕೋಸ್ಟಲ್‌ವುಡ್‌ಗೆ ಕರೊನಾ ಕರಿಛಾಯೆ ಆವರಿಸಿದೆ.

ನಾಟಕ ಪ್ರದರ್ಶನ ರದ್ದು

ದ.ಕ., ಉಡುಪಿ ಮತ್ತು ಕಾಸರಗೋಡು ಜಿಲ್ಲೆಯಲ್ಲಿ 15ಕ್ಕೂ ಅಧಿಕ ತುಳು ನಾಟಕ ತಂಡಗಳಿವೆ. ಸೀಸನ್‌ನ ಮೂರು ತಿಂಗಳು ಬ್ರಹ್ಮಕಲಶೋತ್ಸವ, ವಾರ್ಷಿಕೋತ್ಸವ ಹೀಗೆ ವಿವಿಧ ಸಮಾರಂಭಗಳಿಗಾಗಿ ಬಹುತೇಕ ಎಲ್ಲ ನಾಟಕ ತಂಡಗಳ ಪ್ರದರ್ಶನ ಬುಕ್ ಆಗಿತ್ತು. ಈಗ ಎಲ್ಲ ಪ್ರದರ್ಶನ ರದ್ದುಗೊಂಡಿದೆ. ತುಳು ರಂಗಭೂಮಿಗೆ ಸುಮಾರು 4.5 ಕೋಟಿ ರೂ. ನಷ್ಟ ಉಂಟಾಗಿದೆ ಎಂದು ಅಂದಾಜಿಸಲಾಗಿದೆ. ಕಲಾವಿದರ ಪೈಕಿ ಕೆಲವರು ಮಾತ್ರ ಉದ್ಯೋಗಸ್ಥರು. ಉಳಿದವರಿಗೆ ನಾಟಕದಿಂದಲೇ ಬದುಕು. ಅದರಲ್ಲೂ ಮಹಿಳಾ ಕಲಾವಿದರಿಗೆ ರಂಗಭೂಮಿಯೇ ಆಧಾರ. ಪ್ರದರ್ಶನ ಮುಗಿಯುತ್ತಿದ್ದಂತೆ ಸಂಭಾವನೆ ಕೈಸೇರುವ ಕಾರಣ ಕಲಾವಿದರ ಬದುಕಿಗೆ ಕೊಂಚ ಭದ್ರತೆ ಇತ್ತು. ಈಗ ಪ್ರದರ್ಶನವಿಲ್ಲದೆ ಕಂಗಾಲು.

ಚಿತ್ರ ಬಿಡುಗಡೆಯಾಗದೆ ಬಾಕಿ ಇಂಗ್ಲೀಷ್, ಕಲ್ಲುರ್ಟಿ ಕಲ್ಕುಡೆ, ಪೆಪ್ಪೆರೆರೆ ಪೆರೆರೆರೆ, ಏರೆಗಾವುಯೆ ಕಿರಿಕಿರಿ ಸಹಿತ 6ಕ್ಕೂ ಅಧಿಕ ತುಳು ಸಿನಿಮಾಗಳು ಬಿಡುಗಡೆಯ ಸಾಲಿನಲ್ಲಿದ್ದವು. ಭೋಜರಾಜ ಎಂಬಿಬಿಎಸ್, ಪಿರ್ಕಿಲು ಬತ್ತೆರಾ, ರಾಕೆಟ್, ಗಬ್ಬರ್ ಸಿಂಗ್ ಮುಂತಾದ ಸಿನಿಮಾಗಳು ಶೂಟಿಂಗ್ ಹಂತದಲ್ಲಿದ್ದವು. 3-4 ಸಿನಿಮಾಗಳು ಡಬ್ಬಿಂಗ್ ಹಂತದಲ್ಲಿದ್ದವು. ತುಳು ಚಿತ್ರ ನಿರ್ಮಾಪಕರು ಸುಮಾರು 9 ಕೋಟಿ ರೂ. ಬಂಡವಾಳ ಹೂಡಿದ್ದು, ಸಕಾಲದಲ್ಲಿ ಸಿನಿಮಾ ಬಿಡುಗಡೆಯಾಗದೆ ಸಂಕಷ್ಟದಲ್ಲಿದ್ದಾರೆ. ಲಾಕ್‌ಡೌನ್ ಅವಧಿ ಮುಗಿದ ಬಳಿಕವೂ ಜನ ಥಿಯೇಟರ್‌ಗಳಿಗೆ ಬರಲು ಹಿಂದೇಟು ಹಾಕಬಹುದು ಎನ್ನುವ ಆತಂಕ ಸಿನಿಮಾ ವಲಯದಲ್ಲಿದೆ.