ತುಳುಕೂಟ ಉಡುಪಿಯ ಅಧ್ಯಕ್ಷ ಲಯನ್ ಇಂದ್ರಾಳಿ ಜಯಕರ ಶೆಟ್ಟಿ ಮಾತನಾಡಿ, ಸಂಸ್ಕಾರ, ಸಂಸ್ಕೃತಿ ಮಾರುಕಟ್ಟೆಯಲ್ಲಿ ಲಭಿಸುವುದಿಲ್ಲ. ನಮ್ಮ ನೆಲ ಹಾಗೂ ಭಾಷೆಯ ಋಣ ತೀರಿಸಲು ಮೂಲ ಜನರೆಲ್ಲರೂ ಮನೆಯಲ್ಲಿ ತುಳು ಭಾಷೆಯಲ್ಲೇ ಮಾತನಾಡಬೇಕು. ಆಗಲೇ ತುಳುನಾಡಿನ ಸಂಸ್ಕೃತಿ, ಸಂಸ್ಕಾರ ಉಳಿಯಲು ಸಾಧ್ಯ. ಅನ್ಯ ಭಾಷೆ ಕಲಿಯೋಣ. ಆದರೆ, ತುಳು ಭಾಷೆ ಮರೆಯಬಾರದು. ಕರಾವಳಿ ಜಿಲ್ಲೆಯ 4 ಕಾಲೇಜುಗಳಲ್ಲಿ ತುಳು ಕೋಟಾ ಮೀಸಲಿತ್ತು. ಆದರೆ, 3 ಕಾಲೇಜುಗಳು ಡೀಮ್ಡ್ (ಸ್ವಾಯತ್ತ) ಯುನಿವರ್ಸಿಟಿ ಆಗಿದ್ದರಿಂದ ತಾಂತ್ರಿಕ ಹಾಗೂ ವೈದ್ಯಕೀಯ ಶಿಕ್ಷಣಕ್ಕೆ ತುಳು ಕೋಟಾ ಸಿಗದಾಗಿದೆ. ಹೀಗಾಗಿ ಬಡ ಕುಟುಂಬದ ತುಳು ವಿದ್ಯಾರ್ಥಿಗಳಿಗೆ ಮತ್ತೆ ಕೋಟಾ ಸಿಗುವಂತಾಗಲು ಈ ಭಾಗದ ಶಾಸಕರು, ಜನಪ್ರತಿನಿಧಿಗಳು ಸರ್ಕಾರದ ಮೇಲೆ ಒತ್ತಡ ಹಾಕಬೇಕು ಎಂದು ಆಗ್ರಹಿಸಿದರು.
