ಹೇಮನಾಥ್ ಪಡುಬಿದ್ರಿ
ದೀಪಾವಳಿಯಿಂದ ಪ್ರಾರಂಭವಾಗಿ ಕಾರ್ತಿಕ ಮಾಸದಲ್ಲಿ ತುಳಸಿ ಪೂಜೆಯೊಂದಿಗೆ ನಡೆಯುವ ತುಳಸಿ ಸಂಕೀರ್ತನೆ ನೃತ್ಯ ಪ್ರಾಕಾರ ಇಂದಿಗೂ ಕರಾವಳಿಯ ಬ್ರಾಹ್ಮಣ ಸಮುದಾಯದ ಮಠ, ಮಂದಿರಗಳು, ಮನೆ, ಮನೆಗಳಲ್ಲಿ ನಡೆಯುತ್ತಿವೆ.
ಕೈಯಲ್ಲಿ ತಾಳ, ಕಾಲ ಹೆಜ್ಜೆಯ ಕ್ರಮಬದ್ಧ ಸಂವಹನದೊಂದಿಗೆ ವಾದಿರಾಜರು ಬರೆದ ದೇವರನಾಮ ಸಂಕೀರ್ತನೆಗಳನ್ನು ಬಾಯಲ್ಲಿ ಪಠಿಸುತ್ತಾ ತುಳಸಿಕಟ್ಟೆಗೆ ಪ್ರದಕ್ಷಿಣೆ ಹಾಕುವ ಈ ಪದ್ಧತಿ ಈಗ ಕಾಣಸಿಗುವುದೇ ವಿರಳ. ಆದರೂ ಹಿರಿಯರಿಂದ ನಡೆಸಿಕೊಂಡು ಬಂದ ತುಳಸಿ ಸಂಕೀರ್ತನೆಯನ್ನು ಪಡುಬಿದ್ರಿ ತರಂಗಿಣಿ ಮಿತ್ರಮಂಡಳಿ ಈಗಲೂ ಮುಂದುವರಿಸುತ್ತಿದೆ.
ಪಡುಬಿದ್ರಿ ತರಂಗಿಣಿ ಮಿತ್ರಮಂಡಳಿಯು 35ವರ್ಷಗಳಿಂದ ನಾಡಿನಾದ್ಯಂತ ಈ ಕಲೆ ಪಸರಿಸಿ ಹಲವು ಪುರಸ್ಕಾರ ಪಡೆದಿದೆ. ಜತೆಗೆ ಪಡುಬಿದ್ರಿಯ ನಳಿನಾಕ್ಷಿಯಮ್ಮ, ಬಾಲಪ್ಪ ಗುರಿಕಾರ ಬಾಲಚಂದ್ರರಾವ್, ಪೋತ ನಾರಾಯಣ ರಾವ್, ಸುಶೀಲಮ್ಮಾ, ಪತ್ತಪ್ಪ ಅಮರೇಂದ್ರ ಆಚಾರ್, ನಾಣಯ್ಯ ಮಾಧವ ರಾವ್, ಬಾಲಪ್ಪ ಅನಂತರಾಮ ರಾವ್, ಸುಧಾಕರ ರಾವ್, ಹೆಜಮಾಡಿ ರಾಮಚಂದ್ರ ಭಟ್, ತಮ್ಮಾಜ ಕೃಷ್ಣಮೂರ್ತಿ ಆಚಾರ್, ಹೆಜಮಾಡಿ ರಂಗಣ್ಣ ಭಟ್, ಪಾಂಡುರಂಗ ಭಜನಾ ಮಂಡಳಿ, ಅದಮಾರು, ಕಟಪಾಡಿ ಮಟ್ಟು, ಕುಂಜಾರು, ಪಡುಬಿದ್ರಿ, ಎಲ್ಲೂರು, ಬೆಳಪು, ಆರೂರು, ಕಡಂದಲೆ, ಪಾವಂಜೆಗಳಲ್ಲಿ ತುಳಸಿ ಸಂಕೀರ್ತನೆಯನ್ನು ನಿರಂತರ ನಡೆಸಿಕೊಂಡು ಬರಲಾಗುತ್ತಿದೆ. ಅಷ್ಟಮಠಾಧಿಪತಿಗಳ ವಿಶೇಷ ಅನುಗ್ರಹಕ್ಕೂ ಪಾತ್ರವಾಗಿದೆ.
