ಉಡುಪಿ ಕೊಚ್ಚಿನ್​ ಶಿಪ್​ಯಾರ್ಡ್​ನಲ್ಲಿ​ ಟಗ್​ ಹಸ್ತಾಂತರ

ಉಡುಪಿ: ಮಲ್ಪೆ ಶಿಪ್​ ಯಾರ್ಡ್​ ಮುಂದಿನ ದಿನಗಳಲ್ಲಿ ಹಡಗು ಮತ್ತು ಟಗ್​ ನಿರ್ಮಾಣದಲ್ಲಿ ಮುಂಚೂಣಿ ಸ್ಥಾನ ಪಡೆಯಲಿದ್ದು, ಕಳೆದ 2 ವರ್ಷಗಳಲ್ಲಿ 16ಕ್ಕೂ ಅಧಿಕ ಮೀನುಗಾರಿಕಾ ದೋಣಿಗಳು, ಅತ್ಯುತ್ತಮ ಗುಣಮಟ್ಟದ 2 ಟಗ್​ಗಳನ್ನು ನಿರ್ಮಿಸಲಾಗಿದೆ. ಬ್ಯಾಟರಿ ಚಾಲಿತ ಗ್ರೀನ್​ ಟಗ್​ ನಿರ್ಮಾಣಕ್ಕೆ ಯೋಜನೆ ರೂಪಿಸಲಾಗಿದೆ ಎಂದು ಕೊಚ್ಚಿನ್​ ಶಿಪ್​ ಯಾರ್ಡ್​ ಅಡಳಿತ ನಿರ್ದೆಶಕ ಮಧು ಎಸ. ನಾಯರ್​ ಹೇಳಿದರು.

ಬುಧವಾರ ಮಲ್ಪೆಯ ಉಡುಪಿ-ಕೊಚ್ಚಿನ್​ ಶಿಪ್​ಯಾರ್ಡ್​ ಲಿಮಿಟೆಡ್​ನಲ್ಲಿ ಅದಾನಿ ಗ್ರೂಪ್​ ಕಂಪನಿ ಓಷನ್​ ಸ್ಪಾರ್ಕಲ್​ ಲಿಮಿಟೆಡ್​ಗಾಗಿ ನಿರ್ಮಿಸಿದ 62 ಟಿ ಬೊಲ್ಲಾರ್ಡ್​ ಪುಲ್​ ಟಗ್​ ಹಸ್ತಾಂತರ ಕಾರ್ಯಕ್ರಮದಲ್ಲಿ ಅವರು ಮಾತನಾಡಿದರು.

ಕಂಪೆನಿಯಲ್ಲಿ ಸದ್ಯ 400 ಮಂದಿ ಕಾರ್ಯನಿರ್ವಹಿಸುತ್ತಿದ್ದು, ಮುಂದಿನ ದಿನಗಳಲ್ಲಿ 800ಕ್ಕೂ ಅಧಿಕ ಉದ್ಯೋಗಿಗಳನ್ನು ನೇಮಕ ಮಾಡಿಕೊಳ್ಳಲಾಗುವುದು. 6 ಸಾವಿರಕ್ಕೂ ಅಧಿಕ ಮಂದಿಗೆ ಪರೋಕ್ಷ ಉದ್ಯೋಗಗಳು ಲಭಿಸಲಿವೆ. ಸ್ಥಳಿಯ ಐಟಿಐ ಮತ್ತು ಡಿಪ್ಲೊಮಾ ವಿದ್ಯಾರ್ಥಿಗಳಿಗೆ ತರಬೇತಿ ನೀಡಲಾಗುವುದು. ಸರ್ಕಾರಿ ಶಾಲೆಗಳ ಅಭಿವೃದ್ಧಿಗೆ ಕಂಪೆನಿಯ ಸಿಎಸ್​ಆರ್​ ನಿಧಿ ಬಳಕೆ ಮಾಡಲಾಗುವುದು ಎಂದು ತಿಳಿಸಿದರು.

ಜಿಲ್ಲಾಧಿಕಾರಿ ಕೆ. ವಿದ್ಯಾಕುಮಾರಿ ಮಾತನಾಡಿ, ಮಲ್ಪೆ ಶಿಪ್​ಯಾರ್ಡ್​ ಬೆಳವಣಿಗೆಯಿಂದ ಉಡುಪಿಯಲ್ಲಿ ವಾಣಿಜ್ಯ ಚಟುವಟಿಕೆಗಳು ಹೆಚ್ಚಾಗಲಿವೆ. ಹಳೆಯ ಸರ್ಕಾರಿ ಶಾಲೆಗಳ ಅಭಿವೃದ್ಧಿಗೆ ಸಿಎಸ್​ಆರ್​ ನಿಧಿ ನೀಡಿ ಸಹಕರಿಸಬೇಕು ಎಂದರು.

ಯುಸಿಎಸ್​ಎಲ್​ನ ಸಿಇಒ ಹರಿಕುಮಾರ್​ ಮಾತನಾಡಿ, ಹೈಸ್ಪೀಡ್​ ಗಸ್ತು ದೋಣಿಗಳು ಮತ್ತು ಇಂಟರ್​ಸೆಪ್ಟರ್​ ಬೋಟ್​ಗಳನ್ನು ತಯಾರಿಸಲು ಭಾರತೀಯ ಕೋಸ್ಟ್​ ಗಾರ್ಡ್​ ನಮಗೆ ಅನುಮೋದನೆ ನೀಡಿದೆ. ಪ್ರಧಾನ ಮಂತ್ರಿ ಮತ್ಸ್ಯ ಸಂಪದ ಯೋಜನೆ (ಪಿಎಂಎಂಎಸ್​ವೈ) ಅಡಿಯಲ್ಲಿ ಯುಸಿಎಸ್​ಎಲ್​ ಆಳ ಸಮುದ್ರ ಮೀನುಗಾರಿಕೆ ಹಡಗುಗಳನ್ನು ತಯಾರಿಸಲು ಕೇರಳ ರಾಜ್ಯವು 10 ಹಡಗುಗಳಿಗೆ ಆರ್ಡರ್​ ಮಾಡಿದೆ. 5 ಬೋಟ್ಗಳನ್ನು ಈಗಾಗಲೇ ವಿತರಿಸಲಾಗಿದೆ. ಉಳಿದ ಐದು ವಿತರಣೆಗೆ ಸಿದ್ಧವಾಗಿದೆ ಎಂದು ಹೇಳಿದರು.

ಓಷನ್​ ಸ್ಪಾರ್ಕಲ್​ ಲಿಮಿಟೆಡ್​ನ ಮುಖ್ಯ ಕಾರ್ಯನಿರ್ವಹಣಾಧಿಕಾರಿ ಸಂಜಯ್​ ಕುಮಾರ್​ ಕೇವಲ್ರಮಣಿ ಹಾಗೂ ರಿತು ಸಂಜಯ್​ ಕುಮಾರ್​ ಕೇವಲ್ರಮಣಿ , ಕೊಚ್ಚಿನ್​ ಶಿಪ್​ಯಾರ್ಡ್​ ನಿರ್ದೇಶಕ (ತಾಂತ್ರಿಕ) ಬಿಜೋಯ್​ ಭಾಸ್ಕರ್​, ಮುಖ್ಯ ಹಣಕಾಸು ಅಧಿಕಾರಿ ಶಂಕರ್​ ನಟರಾಜ್​, ಕರಾವಳಿ ಭದ್ರತಾ ಪಡೆ ಪೊಲೀಸ್​ ವರಿಷ್ಠ್ಠಾಧಿಕಾರಿ ಅಂಶು ಕುಮಾರ್​ ಉಪಸ್ಥಿತರಿದ್ದರು.

ಟಗ್​ ವಿಶೇಷತೆ: ಉಡುಪಿ ಕೊಚ್ಚಿನ್​ ಶಿಪ್​ಯಾರ್ಡ್​ ಲಿಮಿಟೆಡ್​ (ಯುಸಿಎಸ್​ಎಲ್​) ಮಲ್ಪೆಯಲ್ಲಿರುವ ಶಿಪ್​ ಬಿಲ್ಡಿಂಗ್​ ಯಾರ್ಡ್​ನಲ್ಲಿ ಶಿಪ್ಪಿಂಗ್​ ಮತ್ತು ಹಾರ್ಬರ್​ ಸೇವೆಗಳಿಗಾಗಿ 49.84 ಕೋಟಿ ರೂ. ವೆಚ್ಚದಲ್ಲಿ ನಿರ್ಮಿಸಿದ 62 ಟನ್​ ಬೊಲ್ಲಾರ್ಡ್​ ಪುಲ್​ ಟಗ್​ ಬಂದರುಗಳಲ್ಲಿ ಈ ಟಗ್​ ಉದ್ದವಾದ ಹಡಗುಗಳನ್ನು (ಸುಮಾರು 250 ರಿಂದ 300 ಮೀಟರ್​ ಉದ್ದ) ಕಡಿಮೆ ತ್ರಿಜ್ಯದಲ್ಲಿ ತಿರುಗಿಸಲು ಸಹಾಯ ಮಾಡುತ್ತದೆ. ಟಗ್​ 33 ಮೀಟರ್​ಗಳ ಉದ್ದ, 11.9 ಮೀಟರ್​ಗಳ ಅಗಲ ಮತ್ತು 5.40 ಮೀಟರ್​ ಆಳವಿದೆ. ಬಂದರುಗಳಲ್ಲಿ ಅಗ್ನಿಶಾಮಕ ದಳವಾಗಿ ಕಾರ್ಯನಿರ್ವಹಿಸುತ್ತದೆ. ಸಾಲ್ವೇಜ್​ ಟೋವಿಂಗ್​ಗೆ ಉಪಯೋಗಿಯಾಗಿದೆ. ಅದರ 80 ಪ್ರತಿಶತ ಭಾಗಗಳನ್ನು ಭಾರತದಲ್ಲಿಯೇ ತಯಾರಿಸಲಾಗಿದೆ.