ವಿಜಯವಾಣಿ ಸುದ್ದಿಜಾಲ ತೂಬಗೆರೆ
ತೂಬಗೆರೆಯ ಪ್ರಸಿದ್ಧ ಕೆಂಪುತೊಳೆಯ ಹಲಸಿನ ಹಣ್ಣಿನ ಘಮ ದೊಡ್ಡಬಳ್ಳಾಪುರದಲ್ಲಿ ಗ್ರಾಹಕರನ್ನು ಸೆಳೆಯುತ್ತಿದೆ. ಲಾಟುಗಟ್ಟಲೆ ಹಲಸಿನ ಹಣ್ಣು ಮಾರುಕಟ್ಟೆಗೆ ಬಂದಿದ್ದು, ಖರೀದಿಗೆ ಜನ ಮುಗಿಬೀಳುತ್ತಿರುವ ದೃಶ್ಯ ಕಂಡುಬರುತ್ತಿದೆ.
ಗ್ರಾಮಾಂತರ ಜಿಲ್ಲೆಯಲ್ಲಿನ ದೊಡ್ಡಬಳ್ಳಾಪುರ ತಾಲೂಕಿನ ತೂಬಗೆರೆ ಹಲಸಿಗೆ ಎಲ್ಲಿಲ್ಲದ ಬೇಡಿಕೆ ಇದೆ. ರಾಜ್ಯದಲ್ಲಿಯೇ ಪ್ರಸಿದ್ಧಿ ಪಡೆದಿರುವ ತೂಬಗೆರೆಯ ಕೆಂಪುತೊಳೆಯ ಹಲಸಿಗೆ ಜನ ಬಾಯಿಚಪ್ಪರಿಸುತ್ತಾರೆ. ಪ್ರಸ್ತುತ ಹಲಸಿನ ಕಾಲವಾಗಿದ್ದು, ನೆರೆಯ ಚಿಕ್ಕಬಳ್ಳಾಪುರ, ಕೋಲಾರ, ತುಮಕೂರು ಭಾಗದ ಜನ ತೂಬಗೆರೆ ಹಲಸು ಕೊಳ್ಳಲು ದೊಡ್ಡಬಳ್ಳಾಪುರಕ್ಕೆ ಆಗಮಿಸುತ್ತಿದ್ದಾರೆ.
ತೂಬಗೆರೆಯಲ್ಲಿ ವಿಶೇಷ ಮರಗಳು: ತೂಬಗೆರೆ ಹೋಬಳಿಯಲ್ಲಿ ತೂಬಗೆರೆ ಗ್ರಾಮ ಸೇರಿ ಸುತ್ತ ಮುತ್ತಲಿನಲ್ಲಿ ಗ್ರಾಮಗಳಲ್ಲಿ ಈ ವಿಶೇಷ ಹಲಸಿನ ಮರಗಳಿವೆ ಅದರಲ್ಲೂ ‘ಕಾಚ್ಚಹಳ್ಳಿ ಗ್ರಾಮ’ದಲ್ಲಿನ ಕೆಂಪು ತೊಳೆಯ ಹಲಸಿನ ಹಣ್ಣು ಗಮನ ಸೆಳೆಯುತ್ತಿದೆ. ಮರದ ಬುಡದಿಂದಲೇ ಆರಂಭವಾಗಿ ಇಡೀ ಮರವನ್ನೇ ಆವರಿಸಿಕೊಂಡು ಬೆಳೆಯುವ ಹಲಸಿನ ಹಣ್ಣಿನ ಗೊಂಚಲನ್ನು ನೋಡುವುದೇ ಸೋಗಸು ಎಂಬಂತಿರುತ್ತದೆ. ಇಲ್ಲಿನ ಮರಗಳಲ್ಲಿ ಹಳದಿ ಬಣ್ಣದ ತೊಳೆಯ ಹಲಸು, ಕೆಂಪು ಬಣ್ಣದ ಹಲಸು, ಹೆಬ್ಬಲಸು ಸೇರಿ ವಿಧದ ಬಣ್ಣ ರುಚಿಯ ಹಲಸಿನ ಹಣ್ಣುಗಳು ಕಂಡುಬರುವುದು ಇಲ್ಲಿನ ವಿಶೇಷ.
ಹೊರಜಿಲ್ಲೆಗಳಿಗೆ ರಪ್ತು: ನೆರೆಯ ಆಂಧ್ರ ಸೇರಿ ಮಂಗಳೂರು, ಕೋಲಾರ, ಮೈಸೂರು, ಬೆಂಗಳೂರು ಭಾಗಗಳಿಗೆ ಅತಿ ಹೆಚ್ಚಾಗಿ ಇಲ್ಲಿನ ಹಲಸಿನ ಹಣ್ಣು ರಪ್ತಾಗುತ್ತದೆ. ಪ್ರತಿವರ್ಷ ಈ ಕಾಲದಲ್ಲಿ ಸಾವಿರಾರು ಹಣ್ಣುಗಳು ಹೊರ ಭಾಗಗಳಿಗೆ ರ್ತಾಗುತ್ತವೆ. ವರ್ಷಕ್ಕೆ ಮೊದಲೇ ಮರಗಳ ಗುತ್ತಿಗೆಪಡೆದವರು ಈ ಕಾಲದಲ್ಲಿ ಬಂದು ಹಣ್ಣು ಕೀಳಿಸಿಕೊಂಡು ಸಾಗಿಸುವುದು ಸಾಮಾನ್ಯವಾಗಿದೆ.
