ರಾಷ್ಟ್ರೀಯ ಹೆದ್ದಾರಿಯಲ್ಲಿ ಪಲ್ಟಿಯಾದ ಟ್ರಕ್​

ನೆಲಮಂಗಲ : ರಾಷ್ಟ್ರೀಯ ಹೆದ್ದಾರಿ 48ರ ನವಯುಗ ಟೋಲ್​ ಬಳಿ ಚಾಲಕನ ನಿಯಂತ್ರಣ ತಪ್ಪಿದ ಟ್ರಕ್​ ಪಲ್ಟಿಯಾಗಿ ರಸ್ತೆ ಬದಿಯ ವಿದ್ಯುತ್​ ಕಂಬಕ್ಕೆ ಡಿಕ್ಕಿ ಹೊಡೆದ ಪರಿಣಾಮ ಟೋಲ್​ ಸಿಬ್ಬಂದಿ ಹಾಗೂ ಚಾಲಕ ಗಂಭೀರವಾಗಿ ಗಾಯಗೊಂಡಿದ್ದಾರೆ. ಟೋಲ್​ ಸಿಬ್ಬಂದಿ ಸಾವಿತ್ರಮ್ಮ, ಟ್ರಕ್​ ಚಾಲಕ ಮೊಹಮ್ಮದ್​ ಗಾಯಗೊಂಡವರು. ಸಾವಿತ್ರಮ್ಮ ತಲೆ ಮೇಲೆ ಕಂಬ ಬಿದ್ದು ಗಾಯಗೊಂಡರೆ, ಟ್ರಕ್​ ಚಾಲಕನ ಕಾಲು ಮುರಿದಿದೆ. ನಗರದ ಸಾರ್ವಜನಿಕ ಆಸ್ಪತ್ರೆಯಲ್ಲಿ ಪ್ರಾಥಮಿಕ ಚಿಕಿತ್ಸೆ ಕೊಡಿಸಿ ಹೆಚ್ಚಿನ ಚಿಕಿತ್ಸೆಗಾಗಿ ಬೆಂಗಳೂರಿನ ವಿಕ್ಟೋರಿಯಾ ಆಸ್ಪತ್ರೆಗೆ ರವಾನಿಸಲಾಗಿದೆ. ನಗರ ಸಂಚಾರಿ ಪೊಲೀಸ್​ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ. ಹೆದ್ದಾರಿ ಮಧ್ಯದಲ್ಲೇ ಟ್ರಕ್​ ಪಲ್ಟಿಯಾದ ಹಿನ್ನೆಲೆಯಲ್ಲಿ ಏಳೆಂಟು ಕಿಲೊಮೀಟರ್​ ಸಂಚಾರ ಸಿಕ್ಕು ಉಂಟಾಗಿ, ವಾಹನ ಸವಾರರು ಪರದಾಡಿದರು. ಕ್ರೇನ್​ ಮೂಲಕ ಟ್ರಕ್​ ತೆರವು ಮಾಡಿದ ಬಳಿಕ ಸುಗಮ ಸಂಚಾರ ಶುರುವಾಯಿತು.

ನಡು ರಸ್ತೆಯಲ್ಲೇ ಪತ್ನಿ ಮೇಲೆ ಹಲ್ಲೆ

ಆನೇಕಲ್​: ಗಂಡನ ಮನೆಯವರಿಂದ ಮಹಿಳೆ ಮೇಲೆ ಮರಣಾಂತಿಕ ಹಲ್ಲೆ ನಡೆದಿದ್ದು, ಪ್ರಕರಣ ಠಾಣೆ ಮೆಟ್ಟಿಲೇರಿದೆ. ಪಟ್ಟಣದ ನಾರಾಯಣಪುರದ ನಿವಾಸಿ ಶೈಲಜಾ ಮೇಲೆ ಈಕೆಯ ಪತಿ ಅರುಣ್​ ಕುಮಾರ್​, ಅತ್ತೆ ಪ್ರಭಾವತಿ ಹಲ್ಲೆ ಮಾಡಿದ್ದು, ಹಲ್ಲೆ ವಿಡಿಯೋ ಸಾಮಾಜಿಕ ಜಾಲತಾಣದಲ್ಲಿ ವೈರಲ್​ ಆಗಿದೆ. ದಂಪತಿಗೆ ನಾಲ್ಕು ವರ್ಷದ ಹೆಣ್ಣು ಮಗುವಿದ್ದು, ವರದಣೆ ಕಿರುಕುಳ ನೀಡುತ್ತಿದ್ದಾರೆ ಎನ್ನುವ ಆರೋಪವೂ ಇದೆ, ಪತ್ನಿಯನ್ನು ಅರುಣ್​ಕುಮಾರ್​ ಅನುಮಾನದಿಂದ ನೋಡುತ್ತಿದ್ದ ವಿಚಾರಕ್ಕೆ ಆಗಾಗ ಗಲಾಟೆ ನಡೆದು ರಾಜಿ ಪಂಚಾಯಿತಿಗಳು ಆಗಿದ್ದವು.

ವಾರದ ಹಿಂದೆ ತಂಗಿಗೆ ಹುಷಾರಿಲ್ಲ ಎಂದು ನೋಡಿಕೊಂಡು ಬರಲು ಮನೆಗೆ ಹೋಗಿದ್ದು, ಗುರುವಾರ ಮತ್ತೆ ಗಂಡನ ಮನೆಗೆ ವಾಪಸ್​ ಬಂದಾಗ ಗಲಾಟೆ ನಡೆದಿದೆ. ಪತ್ನಿಯನ್ನು ಮನೆಗೆ ಸೇರಿಸದೆ ರಸ್ತೆಯಲ್ಲಿ ಎಳೆದಾಡಿ ಮನ ಬಂದಂತೆ ಹಲ್ಲೆ ಮಾಡಿರುವುದು ವಿಡಿಯೋದಲ್ಲಿ ದಾಖಲಾಗಿದೆ. ಆನೇಕಲ್​ ಪೊಲೀಸರು ಆರೋಪಿಗಳನ್ನು ವಶಕ್ಕೆ ಪಡೆದಿದ್ದು ತನಿಖೆ ನಡೆಸುತ್ತಿದ್ದಾರೆ. ಶೈಲಜಾಗೆ ಆಸ್ಪತ್ರೆಯಲ್ಲಿ ಚಿಕಿತ್ಸೆ ನೀಡಲಾಗುತ್ತಿದೆ.