ಹೊಸಕೋಟೆ : ಜಾತಿಜನಗಣತಿ ಹಳ್ಳ ಹಿಡಿಯುವ ಲಕ್ಷಣಗಳು ಎದ್ದು ಕಾಣುತ್ತಿವೆ. ಪೂರ್ಣ ಮಾಹಿತಿ ಹಾಗೂ ಸವಲತ್ತು ಇಲ್ಲದೆ ಅಧಿಕಾರಿಗಳು ಪರದಾಡುತ್ತಿದ್ದಾರೆ, ಗಣತಿಗೆ ಕಾಲಿಟ್ಟರೆ ತಾಂತ್ರಿಕ ದೋಷ, ಮನೆಗಳ ನೇವಿಗೇಷನ್ ಸಮಸ್ಯೆ, ವ್ಯಾಪ್ತಿ ಮೀರಿ ಗಣತಿಗೆ ಅಧಿಕಾರಿಗಳ ನೇಮಕ ಸೇರಿ ಹಲವು ಸಮಸ್ಯೆ ಎದುರಿಸುವಂತಾಗಿದೆ. 800ಕ್ಕೂ ಹೆಚ್ಚು ಸಿಬ್ಬಂದಿಯನ್ನು ತಾಲೂಕು ಆಡಳಿತ ಹಾಗೂ ಶಿಕ್ಷಣ ಇಲಾಖೆಯಿಂದ ನೇಮಿಸಲಾಗಿದ್ದು, ಅದರಲ್ಲಿ ಶಿಕ್ಷಣ ಇಲಾಖೆಯವರದ್ದೇ ಸಿಂಹಪಾಲು, 700ಕ್ಕೂ ಹೆಚ್ಚು ಶಿಕ್ಷಕರನ್ನು ಈ ಜಾತಿಜನಗಣತಿಗೆ ನೇಮಕ ಮಾಡಲಾಗಿದೆ. ಆದರೆ, ತಾಲೂಕಿನ ಉತ್ತರ ಮೂಲೆ ಸೂಲಿಬೆಲೆಯಲ್ಲಿ ಶಿಕ್ಷಕರಾಗಿರುವವರನ್ನು ದಕ್ಷಿಣ ಭಾಗದ ಅನುಗೊಂಡನಹಳ್ಳಿಯಲ್ಲಿ ಕೆಲಸ ಮಾಡಲು ನೇಮಕ ಮಾಡಿದ್ದು, ಈ ರೀತಿಯ ಗೊಂದಲಗಳು ತಾಲೂಕಿನ ಎಲ್ಲ ಭಾಗದಲ್ಲಿ ಮುಂದುವರಿದಿದೆ. ಅದರಲ್ಲೂ ಪ್ರತಿ ಅಧಿಕಾರಿಗೆ 150 ಮನೆಗಳ ಗಣತಿಗೆ ನಿಗದಿತ ಸಮಯದಲ್ಲಿ ಆದೇಶವಿದ್ದರೆ ಇನ್ನೂ ಕೆಲವರಿಗೆ 400ಕ್ಕೂ ಹೆಚ್ಚು ಗಣತಿಯನ್ನು ಅಷ್ಟೇ ನಿಗದಿತ ಸಮಯದಲ್ಲಿ ಮಾಡಬೇಕೆಂಬ ಪಟ್ಟಿ ಬಿಡುಗಡೆ ಮಾಡಲಾಗಿದೆ ಎಂಬ ಆರೋಪಗಳು ಕೇಳಿ ಬರುತ್ತಿದೆ.
