ಆನ್ಲೈನ್ ಪ್ರಕ್ರಿಯೆ: ಅರಣ್ಯ ಇಲಾಖೆ ಕೆಲವೊಂದು ಮರಗಳನ್ನು ಕಡಿಯುವುದು ಹಾಗೂ ಸಾಗಾಟಕ್ಕೆ ವಿನಾಯಿತಿ ನೀಡಿದೆ. ಈ ಮರಗಳ ಪಟ್ಟಿ ತಂತ್ರಾಂಶದಲ್ಲಿ ಲಭ್ಯವಾಗಲಿದೆ. ಪಟ್ಟಿಯಲ್ಲಿಲ್ಲದ ಮರ ಕಡಿಯಲಿಚ್ಛಿಸುವವರು ಮರದ ಫೋಟೋ, ಸ್ಥಳದ ಮಾಹಿತಿ, ಭೂಮಿಯ ದಾಖಲೆ, ಮರ ಕಡಿಯಬಯಸುತ್ತಿರುವ ಕಾರಣದೊಂದಿಗೆ ಅರ್ಜಿ ಸಲ್ಲಿಸಬೇಕು. ಈ ಸಂದರ್ಭ ಅರ್ಜಿದಾರರಿಗೆ ಸಂಬಂಧಪಟ್ಟ ಅಧಿಕಾರಿಯ ವಿವರ ಹಾಗೂ ಅರ್ಜಿ ಸಂಖ್ಯೆ ಲಭ್ಯವಾಗುತ್ತದೆ. ಈ ಅರ್ಜಿ ಸಂಖ್ಯೆ ಆಧಾರದಲ್ಲಿ ಅಧಿಕಾರಿಗಳು ಜಮೀನಿಗೆ ತೆರಳಿ ಮೂಲ ದಾಖಲೆ ಹಾಗೂ ಸ್ಥಳ ಪರಿಶೀಲನೆ ನಡೆಸಿ ವಲಯ ಅರಣ್ಯಾಧಿಕಾರಿಗಳಿಗೆ ವರದಿ ಸಲ್ಲಿಸುತ್ತಾರೆ. ಬಳಿಕ ವಲಯ ಅರಣ್ಯಾಧಿಕಾರಿ ಸೂಕ್ತವೆನಿಸಿದರೆ ಮರ ಕಡಿಯಲು ಹಾಗೂ ಸಾಗಾಟಕ್ಕೆ ಅನುಮತಿ ನೀಡುತ್ತಾರೆ. ಈ ಎಲ್ಲ ಪ್ರಕ್ರಿಯೆ ಹಂತಗಳ ಮಾಹಿತಿ ಜಮೀನುದಾರರಿಗೆ ತಂತ್ರಾಂಶದಲ್ಲಿ ಲಭ್ಯವಾಗುತ್ತದೆ.
ಮರ ಕಡಿಯುವ ಪ್ರದೇಶ ಪರಿಸರ ಸೂಕ್ಷ್ಮ ವಲಯಕ್ಕೆ ಸೇರಿದ್ದು, ಕಡಿಯಲು ಅನುಮತಿ ಇಲ್ಲದಿದ್ದಲ್ಲಿ ಅಥವಾ ಮರ ವಿನಾಶದ ಅಂಚಿನಲ್ಲಿರುವ ಪ್ರಭೇದಕ್ಕೆ ಸೇರಿದ್ದರೆ ಆಯ್ಕೆ ಸಂದರ್ಭದಲ್ಲೇ ಮರ ತೆರವು ಸಾಧ್ಯವಿಲ್ಲ ಎಂಬ ಸಂದೇಶವನ್ನು ತಂತ್ರಾಂಶ ತೋರಿಸಲಿದೆ. ಸಾಗಾಟ ಸಂದರ್ಭ ಎಲ್ಲಿಂದ-ಎಲ್ಲಿಗೆ, ಯಾವ ಮರ ಹಾಗೂ ತೆರವು ಮಾಡಿದವರ ವಿವರ ತಂತ್ರಾಂಶದಲ್ಲೇ ಲಭ್ಯವಾಗಲಿದೆ.
ಐಸಿಟಿಗೆ ಹೊಣೆ: ಅರಣ್ಯ ಇಲಾಖೆಯ ಮಾಹಿತಿ ಸಂವಹನ ಮತ್ತು ತಂತ್ರಜ್ಞಾನ ಕೇಂದ್ರ(ಐಸಿಟಿ) ಈ ನೂತನ ತಂತ್ರಾಂಶ ಅಭಿವೃದ್ಧಿಪಡಿಸಿದೆ. ಕಂದಾಯ ಇಲಾಖೆ ಸಹಯೋಗದಲ್ಲಿ ರಾಜ್ಯದ ಎಲ್ಲ ವಿಭಾಗಗಳಿಂದ ಮಾಹಿತಿ ಕ್ರೋಡೀಕರಿಸಲಾಗುತ್ತಿದೆ. ತಂತ್ರಾಂಶದ ಪ್ರಾಯೋಗಿಕ ಬಳಕೆಗೆ ಇಲಾಖೆ ಮುಂದಾಗಿದ್ದು, ವಿವಿಧ ವಿಭಾಗಗಳ ಸಲಹೆಗಳನ್ನು ಆಧರಿಸಿ ಅಂತಿಮ ರೂಪ ನೀಡಲಾಗುತ್ತಿದೆ. ಇದು ಮುಗಿದ ತಕ್ಷಣ ಜನರ ಬಳಕೆಗೆ ಲಭ್ಯವಾಗಲಿದೆ. ಕೇಂದ್ರವು ಈಗಾಗಲೇ ಇ-ಟಿಂಬರ್’ ತಂತ್ರಾಂಶ ಮೂಲಕ ಮರಮಟ್ಟುಗಳ ಖರೀದಿ ಪ್ರಕ್ರಿಯೆಯನ್ನು ಯಶಸ್ವಿಯಾಗಿ ನಿರ್ವಹಿಸುತ್ತಿದೆ.
