ವಿಜಯನಗರ ನಿವಾಸಿ ರುಬಿನಾಗೆ ನ.9ರಂದು ತ್ರಿವಳಿ ಮಕ್ಕಳು ಜನಿಸಿದ್ದವು. ಅವಧಿ ಪೂರ್ವ ಪ್ರಸವದಿಂದಾಗಿ ಜನಿಸಿದ ಅರ್ಧ ಗಂಟೆಯಲ್ಲೇ ಎರಡು ಗಂಡು ಶಿಶುಗಳು ಮೃತಪಟ್ಟಿದ್ದವು, ಉಳಿದ ಒಂದು ಹೆಣ್ಣು ಶಿಶುವಿನ ತೂಕ 780 ಗ್ರಾಂಗೂ ಕಡಿಮೆಯಿತ್ತು. ಶಿಶುವಿಗೆ ಉಸಿರಾಟದ ತೊಂದರೆ ಸೇರಿ ಕೆಲ ಆರೋಗ್ಯ ಸಮಸ್ಯೆಗಳು ಕಾಣಿಸಿಕೊಂಡಿದ್ದವು. ಹೀಗಾಗಿ ಶಿಶುವನ್ನು ವಾಣಿವಿಲಾಸ ಆಸ್ಪತ್ರೆಗೆ ದಾಖಲಿಸಲಾಗಿತ್ತು. ಆಸ್ಪತ್ರೆಯ ಮಕ್ಕಳ ತುರ್ತು ನಿಗಾ ಘಟಕದಲ್ಲಿ ಮೂರೂವರೆ ತಿಂಗಳು ‘ಕಾಂಗರೂ ಕೇರ್’ ನೀಡಲಾಗಿದ್ದು, ಶಿಶುವಿನ ತೂಕ 1.85 ಕೆ.ಜಿ.ಗೆ ಹೆಚ್ಚಾಗಿದೆ. ಆರೋಗ್ಯದಲ್ಲೂ ಚೇತರಿಕೆ ಕಂಡುಬಂದಿದೆ. ಹೀಗಾಗಿ ತಾಯಿ ಹಾಗೂ ಮಗುವನ್ನು ಆಸ್ಪತ್ರೆಯಿಂದ ಬಿಡುಗಡೆ ಮಾಡಲಾಗಿದೆ ಎಂದು ಆಸ್ಪತ್ರೆಯ ಅಧೀಕ್ಷಕಿ ಡಾ. ಗೀತಾ ಶಿವಮೂರ್ತಿ ಮಂಗಳವಾರ ಸುದ್ದಿಗೋಷ್ಠಿಯಲ್ಲಿ ತಿಳಿಸಿದರು.
