ಕಾವೇರಿ ವಿವಾದವಿರುವ ತಮಿಳುನಾಡು ಗಡಿಯಲ್ಲಿ ಎರಡೂ ರಾಜ್ಯಗಳ ಪೊಲೀಸರು ಬಿಗಿ ಭದ್ರತೆ ನಿಯೋಜಿಸಿದ್ದರು. ಬೆಳಗ್ಗೆ 8 ಗಂಟೆವರೆಗೂ ಕರ್ನಾಟಕ ನೋಂದಣಿ ವಾಹನಗಳನ್ನು ತಮಿಳುನಾಡಿಗೂ ಅಲ್ಲಿಯ ವಾಹನಗಳನ್ನು ರಾಜ್ಯದೊಳಗೆ ಬಿಟ್ಟುಕೊಳ್ಳದೆ ನಿರ್ಬಂಧಿಸಲಾಗಿತ್ತು. ಊಟಿ ಹಾಗೂ ಚಾಮರಾಜನಗರ ಜಿಲ್ಲೆಗಳ ಎಸ್ಪಿಗಳ ಮಟ್ಟದಲ್ಲಿ ಚರ್ಚಿಸಿದ ನಂತರ ನಿರ್ಬಂಧ ತೆರವುಗೊಳಿಸಲಾಯಿತು. ಆದರೂ ತಮಿಳುನಾಡಿನ ಯಾವುದೇ ವಾಹನಗಳು ರಾಜ್ಯದತ್ತ ಮುಖ ಮಾಡಲಿಲ್ಲ. ಎರಡೂ ರಾಜ್ಯಗಳ ಸಾರಿಗೆ ಬಸ್ಗಳ ಸಂಚಾರ ಸ್ಥಗಿತಗೊಳಿಸಿದ್ದರಿಂದ ಬಂದ್ ಬಗ್ಗೆ ಖಚಿತ ಮಾಹಿತಿಯಿಲ್ಲದೆ ಆಗಮಿಸಿದ್ದ ತಮಿಳುನಾಡಿಗೆ ಹೋಗುವ ಪ್ರವಾಸಿಗರು ಪರದಾಡಿದರು. ಟ್ಯಾಕ್ಸಿ, ಆಟೋ ಹತ್ತಿ ಗಡಿಯವರೆಗೂ ಪ್ರಯಾಣಿಸಿದರು.
