ವಿಜಯವಾಣಿ ಸುದ್ದಿಜಾಲ ಕುಂದಾಪುರ
ಕುಂದಾಪುರ ತಾಲೂಕಿನ ತ್ರಾಸಿ ಹಾಗೂ ಬೈಂದೂರು ತಾಲೂಕಿನ ಮರವಂತೆ ಸ್ಥಳಗಳ ಮಧ್ಯ ಭಾಗದ ಗಡಿ ಗುರುತು ಮಾಡುವ ಕಾರ್ಯ ಮಂಗಳವಾರ ರಾಷ್ಟ್ರೀಯ ಹೆದ್ದಾರಿ ಬಳಿ ನಡೆದಿದ್ದು, ವಿವಾದಕ್ಕೆ ಕಾರಣವಾಗಿದೆ. ಉಭಯ ಗ್ರಾಮ ಪಂಚಾಯಿತಿಗಳ ಸದಸ್ಯರ ನಡುವೆ ಮಾತಿನ ಚಕಮಕಿ ನಡೆಯಿತು.
ತ್ರಾಸಿ, ಮರವಂತೆ ಮಧ್ಯ ಭಾಗದ ನಡುವೆ ತ್ರಾಸಿ ಗ್ರಾಮದ ಗಡಿ ಗುರುತು ಮಾಡಿಕೊಡುವಂತೆ ತ್ರಾಸಿ ಗ್ರಾಪಂ ಮನವಿ ಸಲ್ಲಿಸಿತ್ತು. ಅದರಂತೆ ಕುಂದಾಪುರ ತಹಸೀಲ್ದಾರ್ ರಾಷ್ಟ್ರೀಯ ಹೆದ್ದಾರಿ 66ರ ಬಳಿ ತ್ರಾಸಿ ಹಾಗೂ ಮರವಂತೆ ಪ್ರದೇಶ ಸಂಧಿಸುವ ಗಡಿ ಗುರುತು ಮಾಡುವಂತೆ ತ್ರಾಸಿ ಬೀಚ್ ಬಳಿ ಕುಂದಾಪುರ ಮತ್ತು ಬೈಂದೂರು ತಾಲೂಕು ಗಡಿ ನಿರ್ಧರಿಸಲು ಆದೇಶಿಸಿದ್ದರು.
ಬೈಂದೂರು ತಾಲೂಕು ಕಚೇರಿ, ತಾಪಂ, ಸಂಬಂಧಪಟ್ಟ ಅಧಿಕಾರಿಗಳಿಗೆ ಗಡಿ ಗುರುತು ಮಾಡುವ ಬಗ್ಗೆ ಲಿಖಿತವಾಗಿ ತಿಳಿಸಲಾಗಿದೆ. ತಹಸೀಲ್ದಾರ್ ಆದೇಶದಂತೆ ಗಡಿ ಗುರುತು ಮಾಡಲಾಗುತ್ತಿದೆ. ಆಕ್ಷೇಪಣೆಗಳಿದ್ದರೆ ಲಿಖಿತವಾಗಿ ತಹಸೀಲ್ದಾರ್ಗೆ ಸಲ್ಲಿಸುವಂತೆ ಕಂದಾಯ ನಿರೀಕ್ಷಕ ರಾಘವೇಂದ್ರ ಹೇಳಿದರು.
ಕಂದಾಯ ಇಲಾಖೆ ಅಧಿಕಾರಿಗಳು ತ್ರಾಸಿ, ಮರವಂತೆ ನಡುವೆ ಮಧ್ಯ ಭಾಗದಲ್ಲಿ ತ್ರಾಸಿ ಗ್ರಾಮದ ಗಡಿ ಗುರುತಿಸಿ ಗುರುತಿಗಾಗಿ ಕಲ್ಲು ನೆಟ್ಟರು. ಬಳಿಕ ನಾಮಫಲಕ ಅಳವಡಿಸುವ ಸಂಬಂಧ ಎರಡೂ ಪಂಚಾಯಿತಿಯವರು ಮಾತನಾಡಿಕೊಂಡು ಸೌಹಾರ್ದಯುತವಾಗಿ ಸಮಸ್ಯೆ ಬಗೆಹರಿಸಿಕೊಳ್ಳುವಂತೆ ತಿಳಿಸಿದರು.
ಮಾತಿನ ಚಕಮಕಿ: ಗಡಿ ಗುರುತು ವಿಚಾರದಲ್ಲಿ ತ್ರಾಸಿ, ಮರವಂತೆ ಗ್ರಾಪಂ ಸದಸ್ಯರ ನಡುವೆ ಮಾತಿನ ಚಕಮಕಿ ನಡೆದು, ವಿವಾದಕ್ಕೆ ಕಾರಣವಾಯಿತು. ಕುಂದಾಪುರ ತಾಲೂಕಿನ ಆರ್ಐ, ಸರ್ವೇಯರ್ ಗಡಿ ಗುರುತು ಮಾಡುತ್ತಿದ್ದಾರೆ. ಆದರೆ ಬೈಂದೂರು ತಾಲೂಕು ಕಚೇರಿಯ ಯಾವುದೇ ಅಧಿಕಾರಿಗಳು ಇಲ್ಲದಿರುವಾಗ ಗಡಿ ಗುರುತು ಕಾರ್ಯ ನಡೆಸುತ್ತಿರುವುದು ಸರಿಯಲ್ಲ. ಎರಡೂ ತಾಲೂಕು ಆಡಳಿತ ಜಂಟಿಯಾಗಿ ಸರ್ವೇ ನಡೆಸಿ ಗಡಿ ಗುರುತು ಮಾಡಬೇಕು. ಇದಕ್ಕೆ ಮರವಂತೆ ಪಂಚಾಯಿತಿಯ ಸಮ್ಮತಿ ಇಲ್ಲ ಎಂದು ಸದಸ್ಯರು ಸ್ಥಳದಿಂದ ನಿರ್ಗಮಿಸಿದರು.
ಅನೇಕ ವರ್ಷಗಳ ಹಿಂದೆ ಸೌಪರ್ಣಿಕ ಸೇತುವೆ ಸಮೀಪ ತ್ರಾಸಿ ಗ್ರಾಪಂ ವತಿಯಿಂದ ಅಳವಡಿಸಲಾಗಿದ್ದ ನಾಮಫಲಕ ಕಿತ್ತು ಹಾಕಿದ ಘಟನೆ ನಡೆದಿತ್ತು. ಇದೀಗ ಮತ್ತೆ ವಿವಾದ ಸೃಷ್ಟಿಯಾಗಿದೆ.
ತ್ರಾಸಿ ಪಿಡಿಒ ಶೋಭಾ, ಮರವಂತೆ ಪಿಡಿಒ ಗೀತಾ, ತ್ರಾಸಿ ಗ್ರಾಮ ಆಡಳಿತಾಧಿಕಾರಿ ಅನಿಲ್, ಮರವಂತೆ ಗ್ರಾಮ ಆಡಳಿತಾಧಿಕಾರಿ ಸಂದೀಪ್ ಭಂಡಾರ್ಕಾರ್, ತ್ರಾಸಿ ಗ್ರಾಪಂ ಲೆಕ್ಕ ಸಹಾಯಕ ಶಿವಾನಂದ, ತ್ರಾಸಿ, ಮರವಂತೆ ಗ್ರಾಪಂ ಸದಸ್ಯರು, ಮಾಜಿ ಸದಸ್ಯರು, ಸಿಬ್ಬಂದಿ, ಗ್ರಾಮಸ್ಥರು ಉಪಸ್ಥಿತರಿದ್ದರು.
